Make 8:1-26

¹Gii mendepa endakali kambu andake mende deaka ipao kateami dokaitanya nee nasia. Dopa piamosa, Jisasame baanya disaipolo dupa epena latala lamaiyoo,

²“Endakali dakaita namba-pipa yuu gii tepoma katapuma. Indupa nee etalame-lamo dokonya, nambame dakaita kondo kaelyo.

³Yangi dupa tependa tangena, nee nanao andaka pena latopa, kaitinisa laowambe lapae setamina” lea.

⁴Dopa leamopa, disaipolo dupame baa lamaiyoo, “Endakali napalenge yuu dakenya, naimame nee anja-tae nyepala nena maimape?” leami.

⁵Jisasame, “Nyakamanya betesa akipate silyape?” leamopa, nyakamame, “7-pela silyamo” leami.

⁶Dopa leaminopa, baame endakali kambu doko isa petena lea. Dopa latala betesa 7-pela dutupa nyepala, Gote lao yaka pilino latala konjia. Konjepala baanya disaipolo dupame mokosoo maina lao maiya. Maiyamopa, baanya disaipolo dupame endakali kambu peteamino dupa dii lao mokosoo maiyami.

⁷Pisa kuki mendatupa apata siaka, dutupa Jisasame Gote lao yaka pilino latala, apata mokosoo maina lea.

⁸Endakali dokaitame nao tiaka kaeyateaminopa, konjepae kakana siamo dupa 7-pela baseketanya tumbasiami.

⁹Akali nee neamino dupa 4 tausenepi mende. Dokaita napeaminopa, Jisasame andaka pena lea.

¹⁰Pena latala baanya disaipolo dupa-pipa sipi mendenya pyakalyetala, yuu Damanuta peami.

¹¹Dokopa Parasai dupame ipupala, Jisasa pii yanda pimaiyami. Dupame baa minao makande pyoo, “Embame kalai pilino doko, Gote-kisa katao pilini-lamo lao kandamanana, mirakolo mende pii” leami.

¹²Dopa leaminopa, Jisasame mona ŋee yale pyoo latala, “Aipuma endakali indupa palelyamino dupame mirakolo mende pii lelyamipi? Nambame nyakama kiningi langilyo: Mirakolo mende nyakama kanjepale lao napitoana” lea.

¹³Dopa latala baame dokaita yakinatala, disaipolo dupa-pipa sipinya pyakalyetala, endaki pete dokonya omotena peami.

¹⁴Disaipolo dupame betesa kame sepala ipateaminopa, sipi dokonya mendai iki sia.

¹⁵Dokopa Jisasame disaipolo dokaita kongali lao lamaiyoo, “Parasaipi, Erote Antipasapinya yisa dupame nyakama koeyasetamina, wandyuu kalyepape” lea.

¹⁶Dopa leamopa, nyakamalapo laloo pyoo, “Naimanya betesa nasipumu dokonya, baame dopa lelyamona” leami.

¹⁷Dopa leamino doko Jisasame kandatala dokaita lamaiyoo, “Nyakamame aipuma betesa nasilyamo lao mende lamai-lamai pilyamipi? Nyakama nongo pyapala, namba kandao apipi lao masala naelyamipi?

¹⁸Nyakama lenge tenge-lamo doko, angi kanja naelyamipi? Nyakama kale katenge-lamo doko, angi nasilyamipi? Nambame kalai pilyo dupa nyakamame kame silyamipi?

¹⁹Nambame 5-pela betesa nyepala, akali 5 tauseneme nena lao konjakamaiyo dokonya nao, kakana baseketa akipatenya tumbasiamipi?” lao Jisasame tipa pia. Dupame yanu pyao, “12-pela baseketana” leami.

²⁰Jisasame dee tipa pyoo, “Nambame 7-pela betesa nyepala, akali 4 tauseneme nena lao konjakamaiyo dokonya nao, kakana baseketa akipatenya tumbasiamipi?” lea. Dopa leamopa, dokaitame, “7-pela baseketana” leami.

²¹Dopa leaminopa, baame dokaita lamaiyoo, “Nyakamame namba kandao apipi lao masala naelyamipi?” lea.

²²Dokopa Jisasa baanya disaipolo dupa-pipa Betsaida yuu dokonya peami. Pupala kateaminopa, endakali dupame akali lenge monda mende baa kateamo dokonya laminao ipupala, Jisasame watandena lao tee leami.

²³Jisasame akali lenge monda doko kinginya minatae katao, taono yakane doko yakinatala peambi. Pupala baame sopokali talyinya lenge dolaponya pisetala, baanya kinginya minia. Dopa petala, “Embame dopale mende kandelepe?” lea.

²⁴Dopa leamopa, baame kandalyetala, “Nambame endakali dupa kandapupa, ita jepae mendapu kaita paele pilyaminona” lea.

²⁵Dokopa Jisasame akali dokonya lenge dolapo deaka kingimi minia. Minateamopa, baame dupa pitaka auu pyoo kandea.

²⁶Kandeamopa, Jisasame akali doko lamaiyoo, “Emba taononya napenya, andaka puu” lea.