Luka 15:1-23

¹Takesi roro â sâqocne bapa Jesurao miti‐ticne mananiŋte mâretec fisi jumbieŋ.

²Epie farisaio â miti qaqazu jaŋe irec manapie sâqoreme Jesure ʒiŋuc mumbiŋ: “Ŋic e sâqocne bapa rocjoparâ iqic‐joparâ jaŋehec nânâ nâekac.”

³Eme irec Jesuzi dâŋ suŋsuŋne moc ʒiŋuc jazawec:

⁴“Ŋoŋeraonec moc e lama 100 jucneniŋmu. Eme mocsâkoazi qâsorieme beheocmu me? Aricne, e gâcne sâko 99 tuhuo behec‐joparâ qâsoriekicne basaocmu.

⁵Basaku bâfuarâ bubiaŋ manahuc âsickerâ

⁶haeo fisirâ âgofâcne wira‐jarerâ muocmu: ‘Lama‐nane qâsoriekicne bâfuakopacte ʒeri enaŋ.’

⁷No ŋazape mananiŋ, ŋic tiŋne 99 maŋ bâbârisiere mi mumu‐jarene jaŋere erâ sambâŋko ʒeri aafecne fuaha sâqocne bapa mocjaha maczi maŋne bârisieme ere erâ sambâŋko ʒeri fekicne fuaocmu.

⁸“Ŋokac moczi siliwa moneŋ 10 bajuocmu. Bajuhame mocjaha wahame beheocmu me? Aricne, e waha qazerâ fic ofaŋne qâzuc ehuc basaocmu.

⁹Basaku bâfuarâ ŋokac âgofâcne wira‐jarerâ ʒiŋuc jazaocmu: ‘Moneŋ‐nane sifuckejec i bâfuakopacte ʒeri enaŋ.’

¹⁰Mupe mananiŋ, Anuture aŋelofâc jaŋe iŋuc jaha sâqocne bapa mocjahazi mac maŋne bârisieme bubiaŋ manaeŋgopieŋ.”

¹¹Jesuzi binaŋ moc ʒiŋuc bawec: “Ŋic moc ŋokâ jahec‐ticne jajahec jupic.

¹²Juku ʒâhec ŋokâzi mamac‐ticne ʒiŋuc âzâcnewec: ‘Mamac, go moneŋ mafa nore biŋe qakicne i narec.’ Mume moneŋ mafa bâtâc barâ jactewec.

¹³Eme ʒâhec ŋokâ e gie bapa afecne jurâ mafa wiac‐ticne bâmockerâ ame susuckerâ rawec. Erâ ocna sasec gie bahuc nânâ qowire nâ areŋ ehuc moneŋ mafa‐ticne ititiŋke‐fârewec.

¹⁴Ititiŋke‐fârerâ juhame mâreŋ ira roroc sâko fuawec. Eme motec e kitac qatac eku

¹⁵mâreŋ rune moc erao ra qohotame eki mume susubecfâc‐ticne soŋaŋ‐jopawec.

¹⁶Ehuc bec jaŋere nânâ nâocte ecnewec i wâc sakarecnembiŋ.

¹⁷Iŋuc juku maŋnezi mumu hehec ecneme ʒiŋuc muwec: ‘Mamac‐nanere kiŋaŋ qaqa wemo afecne juŋgopieŋ, eme jaŋe nânâ nâqiŋ qâqiŋ ehuc juhapie no ŋokâ‐ticnezi ʒira rorocte sipirickezo ekopac.

¹⁸Irec no hae‐naneo rarâ mamac‐nanerao fisirâ ʒiŋuc muhuc âzâcnezepac: Mamac, no sâqocne bape kiŋnanezi sambâŋko â gorao ŋemâckekac.

¹⁹Irec wemocko ŋokâge mocwâc munarepie jupemu, go mâc kiŋaŋ motecge bacnutec juzepac.’

²⁰Iŋuc murâ ʒawierâ mamac‐ticnerao rawec. Raku hae upeo fisihame mamac‐ticnezi biac honerâ bune sâqoreme gasacke ra hâpo mumuduc ecnewec.

²¹Eme motec e ʒiŋuc âzâcnewec: ‘Mamac, no sâqocne bape kiŋnanezi sambâŋko â gorao ŋemâckekac, irec wemocko ŋokâge mocwâc munarepie jupemu.’

²²Iŋuc mume mamac‐ticnezi kiŋaŋ motec jazarâ muwec: ‘Ŋoŋe picpac jaha ŋaqi biaŋne jâmbâŋ moc baware hecnepie huoc, â megâŋ menao hecnepie feoc, â kikehuhu mâmâc râcneniŋ.

²³Erâ bulimakao motecne biuc sâko i hezu rikec epie nâhuc ʒeri enʒepeneŋ.