Luka 15:1-23

¹Vat nanang sesun gandu nan gisin nanan kulapi wa dasu kitin yesu idin lanzughe.

²Afarsayawa nan nanang niyerte wa din gbulu idin belu natimene, “unit ulele din sesu aman kulapi amini din nlii nanghenu.”

³Yesu benle nani tinankuguldo,

⁴“Ghari nanya mine, a wadi nin nakam akut likure ada dira kurum naye na aba sunu akut kutir nin kutir a doo mpiziru kurume nanya kushue se ase kuninba?

⁵A wanin se kuning, na ama ti kunin nabandang a su ayi aboo ba.

⁶A wa saa kilari, a yicila adondong nan nanan kupoo mye, abelin nani, “Bunoni liburu liboo, bara nan nse Kukam nighe na kuna wulu.”

⁷Nbelin munu au nanere, liburi liboo ba yitu kitene kani bara unan kulapi warum ule na a suna kulapi mye, akatin anit akut kutir nin kutir ale na idi nanya kulapi mene.

⁸Sa u yeme uwaniari na adi nin nikubu likure, firum wa wulughe, na aba ti ula limoo a kuu kutyye a piziru sey a see fi nin ba?

⁹A wa see, a yicila adondong nin naman kupoo mye a benle nani “buno ni liburi liboo bara nam see fikubunighe na fina wulu.”

¹⁰Nanere, mbelen minu, liburi liboo ba yitu nbun nnono kadura Kutelle uwarum nwa sun kulapi mye.”

¹¹Yesu moro, “Umong unit wadi nin nano niba, ubene nanya myene woron ncife,

¹²'Ucif, nai unang ugadue,' a koso nani utamani mye vat.

¹³Ma itaa ayiri ba, ubene fita udun kan kipen piit, adi wultun vat imong ile na iwa nighe nan nadondong a hem.

¹⁴Na amala uwultune vat, kukpong kudindya deu nanyan mgene, anin cizina upiziru nimonli.

¹⁵Ado adi piziru katwa kitin kon kunang myenne, a naghe katwa libya na ledu.

¹⁶Aso nin nayiaboo adin lii nimonli naledu bara na umong naghe imonli ba.

¹⁷Bara nani na kibinaiye nsa kidomomye, aworo, 'Acin ncef nighe amashinnari din lii imonli igutuzuna, mmile da sosin kikane kukpon ba moliia!

¹⁸Mba sunu kikane ndo kitin ncif ning, nning belinghe, “Ucif, nta kulapi nnang kitene, nin kiti fe.

¹⁹Na mbatin iyicilai usaun fe ba; tai nafo nkong kucin fe.”'

²⁰Usaun ubene nya udu kitin ncife, na awa doo piit, ucife yeneghe, anin lanzan nkunekune me, a taa ucum, adi gbindiringhe a luluu kukpan nuu me.

²¹Usaune woroghe, 'Ucif, nta kulapi kitene kani nin bun fe. Na mbatin i yicilai usaun fe ba.'

²²Ucife woro na cinme, 'Daan nin nimoon icine, i shoonghe, i tighe ficancan, nin na kpatok nabunu me.

²³Daan ning fina fi gbondilong ida boo fining. Na ti li tisu liburi liboo.