Luka 15:1-23

¹Pherdo carinici hem prešunde grešnici čedena pe ine uzalo Isus te šunen le.

²A o fariseja hem o učitelja e Mojsijasere zakonestar mrmljinde vaćerindoj: “Akava primini kora peste e grešnikonen hem xala olencar.”

³Adalese o Isus phenđa lenđe akaja paramiz:

⁴“Te nekas tumendar isi šel bakre i jekh olendar našaldilo, so ka ćerel? Ka ačhaj e enjavardešuenjen ko jekh than hem ka džal te rodel e našalde bakre sa đikote na arakhi le.

⁵I ked ka arakhi le, ka radujini pe, ka čhivel le ko piče

⁶hem ka legari le čhere. Tegani ka vičini ple amalen hem ple komšijen kora peste hem ka phenel lenđe: 'Radujinen tumen mancar! Arakhljum mle našalde bakre.'

⁷Vaćerava tumenđe, ađahar da ano nebo ka ovel po bari radost zako jekh grešniko ked obratini pe nego li zako enjavardešuenja pravednici kola mislinena da na valjani te obratinen pe.”

⁸O Isus phenđa hem akava: “Ili te nesava đuvlja isi deš srebrna kovanice i jekh našali, so ka ćerel? Ka tharel o svetlo, ka šulaj o čher hem šukar ka rodel i kovanica đikote na arakhi la.

⁹I ked ka arakhi la, ka vičini ple amalinjen hem ple komšiken kora peste hem ka phenel lenđe: 'Radujinen tumen mancar! Arakhljum i kovanica savi našalđum.'

¹⁰Ađahar, vaćerava tumenđe, ovela radost maškaro anđelja e Devlesere zako jekh grešniko ked irini pe ko Devel.”

¹¹I o Isus phenđa: “Jekhe manuše ine duj čhave.

¹²I o tikneder čhavo phenđa ple dadese: 'Dade, de man akana o kotor oto barvalipe klo so preperela maje.' I ađahar o dad ulavđa lenđe plo barvalipe.

¹³I palo nekobor dive o tikneder čhavo čedinđa sa so inole, dželo ki durutni phuv hem adari xalja sa plo barvalipe ađahar so živinđa dilikane.

¹⁴Ked xalja sa o love, ulo baro bokhalipe ani adaja phuv i tegani na inole so te xal.

¹⁵I dželo te ćerel buti koro jekh manuš kova živinđa adari. Adava manuš bičhalđa le pese ko polje te arakhi balen.

¹⁶O čhavo edobor inele bokhalo da manglja te xal adava so xana o bale, ali niko na dinđa le xajbnase.

¹⁷A ked lelja te razmislini šukar, phenđa: 'Mle dadesere bućarnen isi da buderi xajbnase, a me akate merava bokhatar!

¹⁸Ka irinav man koro mlo dad hem ka phenav lese: 'Dade, grešinđum anglo Devel hem angla tute!

¹⁹Na injum dostojno akana te vaćerav da injum klo čhavo. Molinava tut, le man sar jekhe bućarne te ćerav buti kora tute.'

²⁰I lelja te džal koro plo dad. Pana sar inele dur ple dadesere čherestar, lesoro dad dikhlja le sar avela. Pelo e dadese žal, prastandilo đi leste, zagrlinđa le hem čumudinđa le.

²¹Tegani o čhavo phenđa: 'Dade, grešinđum anglo Devel hem angla tute! Na injum dostojno akana te vaćerav da injum klo čhavo.'

²²A o dad phenđa ple slugenđe: 'Sig anen o najšužo fostani hem hurjaven le! Čhiven lese i angrustik ko naj hem o sandale ko pre!

²³Anen okole thuljarde telco te čhinen, te xa hem te slavina,