LUKU 15:1-23

¹Bɛ'ↄgↄsirinↄ kũ durunnakɛrinↄ tɛn na Yesui de ò a yã ma ń pínki.

²Akũ Farisinↄ kũ ludayãdannɛrinↄ yãkete kà ò pì: Gbɛ̃ díkĩna dì durunnakɛrinↄ sí à pↄ́ ble kũńwo lɛɛlɛ.

³Akũ Yesu yã díkĩna lɛ̀kↄ̃ańnɛ à pì:

⁴Ò pì á gbɛ̃ke sã vĩ mɛ̀n basↄↄro, akũ a do sã̀tɛ, àdi a basↄↄro donsari tó sɛ̃̀n à pɛ́tɛ sã kũ à sã̀tɛ pìii ari à gɛ́ leroo?

⁵Tó à bòa, àdi a sɛ́ à da a gã̀n kũ pↄnnao

⁶à táo bɛ, à a gbɛ̃nnanↄ kũ a fárandidenↄ sísi à pińnɛ: À pↄnna kɛ kũmao. Ma a sã kũ à sã̀tɛ pìi lè.

⁷Lɛmɛ dↄ matɛn oárɛ, oni pↄnna kɛ ludambɛ durunnakɛri mɛ̀n do kũ à nɛ̀sɛɛ lìtɛ yã musu de gbɛ̃ mana gbɛ̃nↄn basↄↄro donsari kũ ò nɛ̀sɛlitɛna ni vĩronↄla.

⁸Nↄgbɛ̃ kũ à andurufu ↄgↄwapu vĩ mɛ̀n kuri sↄ̃ bi, tó a mɛ̀n do sã̀tɛ, àdi fitila na à kpɛ́ wara, à wɛtɛ busɛbusɛ ari à gɛ́ leroo?

⁹Tó à bòa, àdi a gbɛ̃nnanↄ kũ a fárandidenↄ sísi à pińnɛ: À pↄnna kɛ kũmao. Ma a andurufu ↄgↄ kũ à sã̀tɛ pìi lè.

¹⁰Lɛmɛ dↄ matɛn oárɛ, Luda malaikanↄ dì pↄnna kɛ durunnakɛri mɛ̀n do kũ à nɛ̀sɛɛ lìtɛ yã musu.

¹¹Yesu pì dↄ: Gbɛ̃ke mɛ́ à kun à nɛ́gↄ̃gbɛ̃nↄ vĩ mɛ̀n pla.

¹²Akũ Sabi pì a denɛ: Baa, ǹ ma baka kũ manigↄ̃ vĩ túbi gũn kpáma. Akũ de pì a aruzɛkɛ kpàatɛtɛńnɛ.

¹³Adi kɛ gↄrↄ plaro, akũ Sabi a pↄ́nↄ nàkↄ̃a pínki, à tà bùsu pãnden zã̀zã. Gwen à a aruzɛkɛ kàkatɛn pãpãkɛnaa gũn.

¹⁴Kũ à pↄ́ kũ à vĩnↄ dɛ̀ pínki, akũ nà gbãna kà bùsuu pìn, akũ à gↄ̃̀ kũ takasio.

¹⁵À gɛ̀ɛ à nà bùsuu pì gbɛ̃kei zamalingakɛri ũ, akũ gbɛ̃ pì a gbàrɛ a bura à pↄ́ble kpá alɛdɛnↄa.

¹⁶Àdigↄ̃ ye à pↄ́ tɛ̀kɛ kũ alɛdɛnↄ tɛn ble ble à kã, ama òdi pↄ́ke kpáaro.

¹⁷Kũ à laakarii sù à pì: Ma de zamalingakɛrinↄn pↄ́ble vĩ dińyĩ, akũ matɛn ga kũ nàao la.

¹⁸Mani futɛ mà tá ma de kĩnaa, mani pinɛ: Baa, ma durunna kɛ̀ Ludanɛ kũ mↄkↄ̃nwo,

¹⁹mádi ká ò ma sísi n nɛ́ ũ doro. Ǹ ma ditɛ n zamalingakɛrinↄ do ũ.

²⁰Akũ à fùtɛ àtɛn tá a de kĩnaa. Kũ à tɛ́ zã̀ àtɛn su, a de pì a è, akũ à kɛ̀nɛ wɛ̃nda. À bàa sì à gɛ̀ɛ à kùsia, à lɛ́ pɛ̀a.

²¹Akũ nɛ́ pìi pìnɛ: Baa, ma durunna kɛ̀ Ludanɛ kũ mↄkↄ̃nwo, mádi ká ò ma sísi n nɛ́ ũ doro.

²²Akũ de pìi pì a zĩkɛrinↄnɛ: À gɛ́ likalika, à uta zↄ̃kↄ̃ mana kũ à de a kparanↄla sɛ́ à suo à danɛ, à tãnka danɛ, à kyate kpánɛ.

²³À zùsanɛ bↄ̀rↄ mɛ̀kpana kũ à dɛ, ò só pↄnnakɛnaa gũn,