ሉቃሴ 15:1-23

¹ኮርሞ ዓሶይዳፓ ሚኢሾ ቡኩሳ ዓሶና ጎሞ ዓሶና ቢያ ዬሱሴ ዔርዛ ዔርዚፆ ዋይዛኒ ቡኪንቲ ዒዛ ኮራ ሙኬኔ።

²ፔርሴ ዓሶና ሙሴ ዔርዜ ዎጎ ዔርዛ ዓሶና ጋዓንቴ ዬያ ዛጋዖ፦ «ሓይ ሃይሾ ጎሞ ዓሶ ናሽኪ ዔኪ፥ ዔያቶና ዎላ'' ሙዓኔ» ጌዒ ጌዒ ዬሱሴ ዾንኪሢ ዓርቄኔ።

³ዬያሮ ዬሱሴ ሃያ ኮኦኪንሦ ዔያቶም ሂዚ ጌዒ ኬኤዚሢ ዓርቄኔ።

⁴«ዒንሢዳፓ ፄኤታ ማራይ ዓኣ ዓሲ ፔቴ'' ማራይ ባይቄቶ ዎይታንዳያ ዒንሢም ማላይ? ታዞጲታሚ ታዞጶ ማራቶ ካያ ሃሺ''፥ ዬያ ባይቄ ማራዓሢ ዴንቃኒ ኮዓኒ ዴንዳዓዳ?

⁵ዬካፓ ዒዚ ዴንቃዖ ኮሺ'' ዎዛዺ፥ ጌኤታ ኬዲ ማሂ ዔኪ ሙኪ፥

⁶ማኣሪ ሄሌ''ስካፓ ፔኤኮ ላጎና ዓሺኖና ፔቴ''ይዳ ዔኤሊ''፦ ‹ታኣኮ ባይቄ ማራዓሢ ታ ዴንቄሢሮ ታ ዎዛዻኔ፤ ታኣና ዎዛዹዋቴ!› ዔያቶም ጋዓንዳኔ።

⁷ጎሜ ቡኡፂ ማዓኒ ኮይሱዋ፥ ታዞጲታሚ'' ታዞጶ ጌኤዦ ዓሶይዳፓ ባሼ ጎሞ ቡኡፂ ጌኤሽካ ፔቴ'' ጎሜ ዓሲ ዛላና ፆኦሲ ካኣቱሞይዳ ዎዛ ማዓኔ ታ ዒንሢም ጋዓኔ» ጌዔኔ።

⁸ሄሊ''ሳዖ ዬሱሴ፦ «ታጶ ቢራ ዓኣ ላኣሊኮ ፔቴ'' ቢራ ባይቄቶ ዒዛ ዎዳ''ንዳያ ዒንሢም ማላይ? ፖዒ ፖዒሲ ጋሮዋ ፒፂ'' ዴንቃንዳያ ሄላ''ንዳኣና ዓኣሺንቴ ቤዞ ቢያ ኮዓዓዳ?

⁹ዬካፓ ዒዛ ዴንቃዖ ዒዞኮ ላጎና ዓሺኖና ፔቴ''ይዳ ዔኤሊ'' ‹ታኣኮ ባይቄ ቢሬሎ ዴንቂ ታ ዎዛዻሢሮ፥ ታኣና ዎላ'' ዎዛዹዋቴ!› ዔያቶም ዒዛ ጋዓንዳኔ።

¹⁰ጎሜ ቡኡፂ ጌኤሽካ ፔቴ'' ጎሜ ዓሲ ዛላና ጫሪንጮይዳ ኪኢታንቻ ዬያጉዲ ዎዛዻኔ፥ ታ ዒንሢም ጋዓኔ።»

¹¹ሃሣ ዬሱሴ፦ «ፔቴ'' ዓሲኮ ላምዖ ናይ ዓኣኔ፤

¹²ጌኤዛሢ ዓዳሢ ኮራ ‹ዓዴ! ኔኤኮ ዓኣ ባካፓ ፓቂ፥ ታና ሄላ''ዞንሢ ሃሢ ታኣም ዒንጌ› ጌዔሢሮ፥ ዓዳሢ ዓኣ ባኮ ላምዖ ናኣቶ''ም ጊሽኬኔ።

¹³ዻካ'' ኬሊ''ኮ ጊንፃፓ ጌኤዛሢ ፔኤኮ ፓቂ ዔኬ ባኮ ሻንቺያ ሻንቺ ሃሣ ላኣሚያ ላኣሚ ዔካዖ ሃኬ ዓጪ ዴንዴኔ፤ ዒኢካ ዒ ዓኣዼ ቤዛ ፔኤኮ ሚኢሾ ቢያ ጉሪ ላኣሊ ባይዜኔ።

¹⁴ሚኢሾ ዒ ፔኤኮ ቢያ ጋፒሴስካፓ ዬኖ ዓጬ''ሎይዳ ሚርጌ ናይዚ ኬስኬሢሮ ሜቶይዳ ዒ ኬዴኔ።

¹⁵ዬያ ሜታሢዳፓ ዔቄያና ዬኖ ዓጮ''ይዳ ዓኣ ፔቴ'' ዓሲስኬያ ኮይላ'' ናንጋኒ ጌላዛ፥ ዬይ ዓሢ ፔኤኮ ቆሎ ጉዱንፆ ሄንቂሴኔ።

¹⁶ናያ ዶዴሢሮ ናዓሢ ጉዱንፃ ሙዓ ሃኣኮ ዲልቦ ሙዒ ሚሽካኒ ዓፃዼቶዋ ዬያ ዒዛም ዒንጋ ዓሲ ባይቄኔ፤

¹⁷ዒማ''ና ናዓሢ ፔኤኮ ዻቢንቶ ዔሪጋፓ ‹ታ ዓዶ ማኣሮይዳ ማዾ'' ማዻኒ ጌላ ዓሳ ካሦ ሙዒ ሚሽኬም ዓዓታንቴ፥ ታኣኒ ሃይካ ናዮና ሃይቃኔ፤

¹⁸ዓካሪ ታ ዔቂ ታ ዓዶ ኮይላ'' ዓኣዺጋፓ፦ «ዓዴ! ፆኦሲና ኔኤናና ቤርታ ታ ዻቤኔ፤

¹⁹ሃካፓ ሴካ ኔ ናይ ታ ጌይንታኒ ታኣም ኮይሱዋሴ፤ ጋዓንቴ ኔኤኒ ማዺሻ፥ ዓይሎ''ይዳፓ ፔቴ''ሢ ታና ማሄ ታ ጋዓንዳኔ» › ጌዒ ማሌኔ።

²⁰ዬያ ጋዓዖ ዔቂ ዓዶ ባንሢ ዓኣዼኔ። «ዬካፓ ዓዴ ሃጊ ሃኬ ዓኣንቴ ናዓሢ ዴንቃዖ፥ ሚጪንቲ ዒዛ ባንሢ ጳሽኪ ኮንቂ ዒዛ ሄርቄኔ።

²¹ናዓሢያ፦ ‹ዓዴ! ፆኦሲና ኔኤና ቤርታ ታ ዻቤኔ፤ ሃይፓ ሴካ ኔኤኮ ናይ ጌይንታኒ ታና ኮይሱዋሴ› ጌዔኔ።

²²ዓዴ ጋዓንቴ ማዻ ዓሶ ዔኤላ''ዖ፦ ‹ዑካዺ ቃራ ማኣዖ ዔኪ ሙኪ ማይሱዋቴ፤ ኬኤሎ''ይዳ ዢኢሮ፥ ቶኮ''ይዳኣ ዱርሲ ዓኣሡዋቴ፤

²³ሃሣ ቃራ ማሊ'' ቡዋ ዔኪ ሙኪ ሹኩዋቴ፥ ሙዒ ኑ ዎዛዾም፤