Luk 15:1-23

¹En avong tai, meatin keil ten takis ka meatin tisa sav keil emun umai ven Iesu keke avalong hihiseien keil onen.

²Ka navong Farasi keil ka tiser keil ten mengkatien keil onen Mosis alesi, asel kutut kati avit, “Meatin ekek mul vise meatin tisa keil en tuak ka mul kanian emun ral min keil.”

³Ka Iesu viten tatavolien koanek min keil vit,

⁴“?Vahit tai en kami, sipsip osen vi handred tai (100) ka tai en keil vuol, kei houmon sa? Kei helokovein sipsip teisav keil osen il ian oumunai en mesai, ka heha helekat tai koa vuol heha vio … hehotini.

⁵Ka navong votini, kei hesi kei hehi houlu, hehousi en vatisin, ka heha ris teim.

⁶Ka navong rokol teim osen, hehise tunali keil ka koakeil aro vesesal veni imai, ka hehiteni min keil hehit, ‘!Rehesi ir veni navotin sipsip osak koa vuol!’

⁷Naviteni min kami, koakeil en out nesa amul asi keil houlu mok navong meatin tai koa vuol en tisaen viles moulien onen keke vousil Ahi, mulin meatin houlu koa avit amal tuai ka asakras avahiles.”

⁸Ka Iesu viten tatavolien tamun vit, “Vahit ahin tai ling revi mani halualim (10) onen, ka evus, lesi keke tai en keil vuol. ?Kei houmon sa? Henit laet tai, heteas en out neim, ka helekat mani koa vuol en out vasi heha vio … hehotini.

⁹Ka navong votini, kei hehise tunahin keil ka koakeil aro vesesal veni imai. Ka hehiteni min keil hehit, ‘!Rehesi ir veni navotin mani onak koa vuol!’

¹⁰Naviteni min kami, angelo keil onen Ahi, avasi keil houlu mok navong meatin tai koa vuol en tisaen viles moulien onen keke vousili.”

¹¹Iesu viten tatavolien tamun vit, “En out tai, meatin tai ro ral min natnali heite elu.

¹²En avong tai, koa tasite viteni min tata onen vit, ‘!Tata, titi vas tounah keil onom ven komal. Hevus, kisan onak kosa!’ Sakini tamealu riti vas tounah keil onen min keilu.

¹³“Avong teis muli, koa tasikor lah vasin tounah keil onen, ka mual va en out tai soutin. En out enek, kei purun mani vasi keil onen en moulien tai koa romal tei.

¹⁴Ka navong ehon enek vulhul vasin mani onen, out koa ro ien, ous romustei ka anien tovuol. Sakini, amai kati ka mai vi livere vareis.

¹⁵Sakini, kei va mum min meatin tai en out enek koa sila va vato vatal min vuas keil osen ka vahengan keil.

¹⁶En rendemien onen, kei en vati van tei anien an vuas keil, ka meatin tovuol vasan anien mini vani.

¹⁷Evus, rendemien onen mae ris tahos ka kei viteni min kei sasen vit, ‘Meatin toumien vasi keil onen tata onak, anien ae houlu. Ka inau, hervitei tuetin, nimat ven amai en out ekek.

¹⁸Nimea, niha ris niles tata onak. Ka navong nilesi, nihiteni mini nihit, “Tata, nakilea namum tisa en meten Ahi ka en metom.

¹⁹Narvinvintei mun kovahise nau en natmali. Kumoni minau hesuval navi meatin toumien tai onom.”’

²⁰Sakini, kei mea, va ris en teim sen tata onen. “Ka navong kei mul veah soutin neli ran out teim, tata onen lesi. Navong lesi, tata onen en mahisi ka mea muloh veni. Navong rokoli, kav kati ka musi en vivin.

²¹Ka natnali viteni mini tata onen vit, ‘Tata, namumoni tisa en meten Ahi ka en metom. Narvinvintei kovahise inau en natmali.’

²²“Ka tata onen vise slev keil onen umai ka viteni min keil vit, ‘!Mihekalah! Mihekur eisin tai koa tahos imok hemai ka mihesin en kei eni. Miheling ring en kalihen vatie lati keke vi natkuli kati. Ka mihesan sandel heheasi vatie lati rovitei mun livere.

²³!Hevus, mihou vini titan buluk tai koa aven musising revi keke rovoumon mari anien, veni rosi ir houlu mok kosa!