Luuka 15:1-23

¹Wakathi nkina anamariphisa lumpuru na anatwampi khusala ata oteela onsiila Yinsa.

²Mafwarizeewu na anamanozela a kano khusala aapa araka: “Mwinyi otu oniwaapokherela anatwampi khusala aja vamote na-yo.”

³Aphano Yinsa khuwooza nlikaniso mmote araka:

⁴“Paani mmote wa mweyo anraaye arina pwittipwitthi zawe miiya khumwaashikha moote, khuhilikhi ntthuttu epile tiisiini na tiisiya zisaliyeezo, eettela etile moote emwaashikhiyeeyo mpakha opattha?

⁵Amana asikana ontta ovikela ari woofurahi,

⁶khusala arutela owawe. N'oofiya oniwaakhuwela maswaahipu zawe na anamwaattamanani awe awooze yoori: ‘Nlaweni nitthape, maana kapattha pwittipwitthi yaka etile yaakaashikhiyeeyo.’

⁷Khwa nanna etthiipo kiniwuuzani yoori onttela wiiyawo otthapa nwulweene pinkuuni mwaasa wa natwampi othupwiya, zayita atthu tiisiini na tiisiya anashariya ahinhithajiyaaye othupwiya.”

⁸Kuvira araka: “Ama muukha-ni anraaye arina nzurukhu awe khumi, khumwaashikha mmote khuhikhozi khantteya aseela nnyupa mwawe, eekesa w'aakhilivo mpakha opattha?

⁹Amana apattha oniwaakhuwela maswaahipu zawe na anamwaattamanani awe awooze yoori: ‘Nlaweni nitthape, maana kapattha nzurukhu aka opule waakaashikhiyeeyo.’

¹⁰Miiyo kiniwuuzani yoori eniiyavo furaha khuluyeene vakatthi wa malayikha a Nnyizinku mwaasa wa natwampi mmote othupwiya.”

¹¹Yinsa khurutela theenya yoori: “Aarivo mwinyi mmote aariina aanaawe awiri.

¹²Otu nttiitthi aya khumuuza papaawe yoori: ‘Paapa, mwikinkhe lifunku la erathi yaka.’ Papaawe khuwaawanyela maali epile aanaawe.

¹³Oviriyeevo wakathi vattitthiiru, mwaana otule nttiitthi khuthuula maali zawe epile aawanyeliweezo khulawa tuniya kiina ya woolepawo. Ottuukho khuharipu maali zawe epile khwa mwentto woololo.

¹⁴N'ooharipu zooshi khupuwa jala ya waatta mmuti mwaya mphule, ye khusala ahankayikha.

¹⁵Khulankha mpakha wa mwinyi mmote wa tuniya ethiitile khunvekela khaazi, ye khumwinkha oshukisa kuluwe zawe ntthuttu.

¹⁶Ye aari ohithajiya oja vitthu epile zaari ojiwaazo pi kuluwe na khaavo aari omwinkhaaye etthu-yoojiwa.

¹⁷Khujipayini khuri: ‘Anakhaazi a paapa ana etthu-yoojiwa yoowaafiyela, miiyo kiri okhuno entta okikhola jala.

¹⁸Kintta olankha kilawe wa paapa khamuuze yoori: Paapa, kakosa mmakhono wa Nnyizinku na mmakhono mwenu.

¹⁹Akinsuhi theenya wiitthiwa yoori ki mwanenu, mwikipokherele nkhama mmote wa anakhaazi enu.’

²⁰Khulankha khusala alawa mpakha wa papaawe. Nalelo ari peetiwene papaawe khumoona, khwiiyana huruma khuluyeene khusala antthirela khulawa khumpatikha na khumpejari.

²¹Attaaphale mwaana otule khumuuza papaawe yoori: ‘Paapa, kakosa mmakhono wa Nnyizinku na mmakhono mwenu. Akinsuhi wiitthiwa yoori ki mwanenu.’

²²Ila papaawe khuwooza akarumeya awe yoori: ‘Mwaakuve, mwitiise kuwo zooziti oshapweya mwinwalise. Na peetthe mwinwalise nzaala mwawe na shapattho mmoolu mwawe.

²³Mwilawe onzizi mwanthuule mwaana wa mompe otule eesheliyeeyo oneneva mwite mwishije, nirette njampo la furaha.