Luke 15:1-23

¹Artwernem apwert kapmentew akarreley-angker-rnem angka Moses-wenh apentey-angenh-rnem-then rernem akarrerrew, Jesus-ew awelh-aynteyew.

²Artwa Pharisee-rnem artwa angka Moses-wenhew akalty-anthey-angker-rnem-then rernem tyel-angkenh Jesus-ew alakenh, “Artwa nhenhan apmwarl! Inkwerelhemel artwa apmwernem-itwew anerl-apeyel, amern-then arlkwerl-apeyel!”

³Jesus-el awew, rernemarl angkerrenh, rap angkanem ilenh.

⁴“Artwa yep-yepew-artey anyent anenh, yep-yep-rnem 100 rarl atnyenenh. Yep-yep anyent ament alhew, rap aperrerterrew-anem. Artwa yep-yepew-arteyel 99 ingwer-rnem iwerl-alhew, atherrk arlkwaynteyew. Rap alhew, yep-yep anyent ikwer nthweyew. Rap nthwenh nthwenh arey-alheyew-atety.

⁵Renharl arey-alhewel rap artewentyel inkwerelhewan, nthek-warl tywenerl-alhemel akngey-alpew-anem apmer-warl.

⁶Rarl apmer-warl aremerrey-alpew, rap arlkey-alpew ikwer apelty-rnemew, ‘Apetyenh-arey arrantherr! Anantherr ingkerrenh inkwerelheyew. Yep-yep nhanyem atha inerl-alpew aperrertarl irrew-penh!’

⁷Ingwerenty Akngey iterl-arey-angenh ra nyerrerremel ikwer-warl angkeperrenty, irrwerlel aneyel-rnem inkwerelhem, yep-yepew-artey inkwerelhew-apeny yep-yep ikwerenhew. Ingwer-rneman kel-anteyarl arraty ikwer aneyel.”

⁸Jesus-el angka ingwer-anem ilenh. “Arelh anyent anenh ngkwelty-rnem 10-akert. Ngkwelty-rnem gold-penh, nthakenh anthey-angenh, nthakenh iwey-angenh, arrangkw. Rerneman impenarl ikwerenh, ra atnyenenh mwanty-antey. Ngkwelty anyentan aytnew, ywerrew-anem. Arelhel lyenenty-anem arrtyew, warl ikwerenh irrarlkemel arternp. Rap nthwenh nthwenh arey-alheyew-atety.

⁹Renharl arey-alhewel rap artewentyel inkwerelhewan. Rap ikwer apelty-rnemew arlkew, ‘Apetyenh-arey arrantherr! Anantherr ingkerrenh inkwerelheyew. Ngkwelty impen nhanyem atha arey-alhew ywerrewarl-penh!’

¹⁰Ingwerenty Akngey iterl-arey-angenh ra nyerrerremel ikwer-warl angkeperrenty, irrwerlel aneyel-rnem inkwerelhem, arelh inkwerelhew-apeny ngkwelty ikwerenhew.”

¹¹Jesus-el angka ingwer-anem ilenh. “Artwamp anyent alerikw atherr-akert.

¹²Akelyelan aynikw ayernew, ‘Akngeyay! Ingwer-ingweran ntwa akalkelhelem ampwal-rnem apwert-rnem-then aylernew, anewantherrenh-angkwarr. Rlengk-antey aylernew ntwa alakenh-anyem akalkelem!’ Artwampel rap akalkelhelew-anem alerikwew-atherr.

¹³Ikwer-penh ingwer-ingwer alerikw akelyel akarrelew ilek-ilek apwert-rnem-then. Rap apmer ikwerenh iwerlelpew, apmer ingwer-warl-anem alpew arleng intem. Apmer ikwer-itwew ra arrkentel-arlengant anenh, apwert-akerr arimpemel apmwel-ayeth.

¹⁴Apwertan ikwerenh ingkerr ywerrew. Apatemel-anem ra aneyelpew. Apmer ikwer-itwew kwaty rntwey-angenh, arrangkw. Aynterrk ayntenh, amern-weny-then ayntenh. Akngerran angayakw anenh. Artwa akely ran angayakw arrpemarl anenh. Ywarn ra iterrenh, amern ineyew arlkweyewan.

¹⁵Rap artwa ilkwa apmer ikwer-areny warrkew-anem ayernew. Artwa ilkwel renh thwenew, pikepik ikwerenh-rnem arntarnt-araynteyew. Rap pikepik-rnem wantenh.

¹⁶Angwenhel renh amern anthey-angenh, arrangkw. Rap angayakw-antey anenh, amern apmwa pikepik-rnem-wenh angwarenh.

¹⁷Ran iterrenh, ‘Ayengan angayakw-anem inngey, ayengarl apmwelhelew. Artwa warrkenh akngey atyenh-wenh-rnem rernemap amern akngerr arlkwem atnertengerreyew-atety. Ayenganap angayakwarl ilweyel!

¹⁸Atha apmer nhenh iwerlelpemer, akngey atyenh-wenh apmer-warl alpemel. Ayengap ikwer angkey-alpemer, “Akngeyay, ayeng-antey apmwelhelew ngkweng. Iylpelant atha ngenh awenh, Akngey irrwerl-areny-then.

¹⁹Ayenh alerey antwey-angenh. Ayengan nyerrerreyel. Warrkenh-anem ayenh arrerna ngkweng.” Alakenh-anyem ayeng akngey atyenh-warl angkeyew.’ Rap akwenterl-alhew, anperl-alhew-anem aynikw-wenh apmer-warl-anem.

²⁰Rap arrer-anem alpenh aynikw-wenh apmer-warl. Artwampan intemey arntarnt-arelhenh ikwer, rap renh arnarew-anem arleng-itwew. Rap alerikw ikwerenhew amperrngerrew. Ra anterrew, atnyenew-anem arrwantyemel.

²¹Alerikw ikwerenh angkew, ‘Akngeyay, ayeng-antey apmwelhelew ngkweng. Iylpelant atha ngenh awenh, Akngey irrwerl-areny-then. Ayenh alerey antwey-angenh.’

²²Aynelikwanap renh akeleytelew, arlkemel artwa warrkenh ikwerenh-rnemew, ‘Apetyenh-arey arrantherr! Anamerl alhenh-arey, arnkwa mwerr ineyew, alerey atyenh aylpeyew! Iltyew-arelh-then pwet atherr-then ikwer akngetyey, ra aylpeyew!

²³Aker kapey-kapey anterant ikwer atwey, anantherr amperneyew! Rlengk anantherr kwenty arlkwem!