Luk 15:1-23

¹Ara bung a kum tene los takis ma a kum tene sakino det wan torom o Iesu sur det in longoro i.

²Ikut a kum Parisi ma a kum tene ususer tagun a Warkurai det ururai un o Iesu lena, “A musano ri, i lason kut tomo nama kum tene sakino, ma i wangon tomo nam det.”

³Ra o Iesu i watung a wasiso elelar tandet lena:

⁴“Ra taio tagun mot anunu tu mar na sipsip, ma ara tagun det in raro. Pepetlai, ken nan pas gusun a lisu na noino ma lisu tiro una nubual ra det wangon iai, ma in sisio sur ara ra i raro, tuk ra in sio melet pasi?

⁵Ra i sa sio pasi, in ubek pasi unin kabarano, ra in nan nama gasgas.

⁶In milet melet nami, ra in kabo tomo pas a kum paspasano ma det ra det kis milau, ra in watungi tandet lena, ‘Dat in gas, uni a sa sio melet pas anung a sipsip ra i raro.’

⁷A watungi tamot, i lenkutkai ra sapat una langit, a gasgas una tene sakino ra i nukpukus in labo taun a gasgas una lisu na noino ma lisu ra det sa tokodos, ma ka det in nukpukus melet.

⁸“Ra tu ino anunu tu noino mani, ra i sa ban raro ru ara. Pepetlai, ken ungangon pas a lam, ra in surupu a rumu, ma in sisio wakak ut suri, tuk ra in sio melet pasi?

⁹Ra i sa sio pasi, in kabo tomo pas a kum paspasano ma det ra det kis milau, ra in watungi tandet lena, ‘Dat in gas, uni a sa sio melet pas ara mani ra a ban raro tari.’

¹⁰A watungi tamot, i lenkutkai ra a gasgas epotor nisan a kum ensel anun o God un ara tene sakino ra i nukpukus.”

¹¹O Iesu i watungi lena, “Ara musano aru nutnutunu, aru nat musano.

¹²A murmur i watungi tan o tamano lena, ‘Tita, un pitar tar anung a tinibo tagun anum a kum ululeng.’ Ra a tamander i isuaro tar anun a kum ululeng tander.

¹³A iso bung bat tari kut, a murmur i ubek tomo pas anun a ululeng rop, ra i wan sur a tamon bakbak, ma i urop ru anun a ululeng una ngas na nilaun ra ke wakak.

¹⁴Ra i sa urop ru a ututna, a labino munurak i wanpat una tamon ra, ra i murak mo.

¹⁵Ra i wan, ma i papam torom ara musano tagun a tamon ra. Ra a musano ra i tulu tari una nun in noworo na boro sur in tamtabor det.

¹⁶I nemi sur in nan a kum pinino bin ra a kum boro det wanani sur in masur, ikut katutaio i tabori.

¹⁷“Ra a wakak na nuknuk i wanpat melet toromi, i watungi lena, ‘A kum tultul rop anun o tita det wangangon ma det masmasur pas kut gusun a kum utna. Ikut iau, kuri a mat nama munurak!

¹⁸Uniri an katutur pas ra an milet melet sur o tita. An watungi tano lena, “Tita, a sa pam tar a sakino petutna torom o God ma torom ui kai.

¹⁹Iau ka wakak mo sur un watung iau a nutumlik. Un ubek tar iau mukut sur an elar nam ara tagun anum a kum tultul.” ’

²⁰Ra i katutur pas ma i wan sur o tamano. “Ra i bakbak utmakai, o tamano i sa tama pasi, ra in balano i tupukus nami. I kalabor toromi, i tal pasi ra i gom a wano.

²¹Ra o nutunulik i watungi tano lena, ‘Tita, a sa pam tar a sakino petutna torom o God ma torom ui kai. Ka wakak mo sur un watung iau a nutumlik.’

²²Ikut o tamano i watungi tan anun a kum tultul lena, ‘Aiapiap! Mot in los lakit tin namalu ra i wakak doko urin, ma mot in upipis tari nami. Mot in ubek tar a ring una lamano, ma mot in pas tari kai aru su un aru kikino.

²³Mot in nan, ma mot in dat pas tu barman na bulumakau ra i butbut urin, mot in um doko pasi, sur dat in nangon ma dat in gas tomo.