Lucangundru 15:1-23

¹Mardatandra kampanietja ja kana madlentji marapu nunkangu karakarana wonti nina ngarala.

²Ja Pharisaiali ja jaura jinkinietjali kuterilkana wonti ja jatana wonti: “Nulupini kana madlentji patai, ja tanali jelali tajiai.”

³Nulu tanangu ninapini jeribaka jaura kaukaubana wonti ja jatana wonti:

⁴“Warlenulu kanali jurangundru, nulu 100 tjipi ngamalkanani, ja kulno tanangundru tintanani, wata nulu 99 wolja woraranani pitarani ja wapantinani nunkangu, nau matja tintaterina, nulu nina mankamankalalu?

⁵Ja nulu nina matja mankamankana, nulu mankina nina pilperani kurana tarai.

⁶Ja nau pungani matja tikana, nulu kamaneli ja jenimalinietja karkai ja tanangu jatai: “Ngakangunto mankianimai, ngangu tintani tjipi ngakani ngato mankamankana warai.”

⁷Ngani jurangu jatai: Jeruja bakana pariwilpani mankina nganala nganai kana madlentji kulnundru, nau madlentjandrn karitjinani, morla 99 talkuni, tana wata madlentjandru karitjinanto.

⁸Widla kulnujeli kara mardatandra marapratjana ngamalkanani, ja nandru mardatandra kulno tintanani, wata praitji miribai, ja punga darbai, ja jiglerali wontiai, nina mankamankalalu?

⁹Ja nandru nina matja mankamankana, nandru kamaneli ja jenimalinietja karkai ja jatai: “Ngakangunto mankianimai, ngangau nina mardatandra ngato mankamankana warai, nina ngato tintana warai.”

¹⁰Jeruja bakana ngani jurangu jatai: Godaia angela mankila nganai kana madlentji kulnundru, nau madlentjandru karitjinani.”

¹¹Nau jatana wonti: “Kana kulnujeli ngatamura mandru ngamalkana wonti.

¹²Ja wakaia kupali ngaperani jatana wonti: “Ngaperiai, jinkiau ngakangu jenia poto ngakani pilki nganai.” Ja nulu pudlangu poto puntibana wonti.

¹³Ja ditji palpani ngadani wakaia kupali pratjana ngokana wonti ja mita woritaia palkana wonti; ja jelaua nulu poto nunkani tintana wonti tepi madlentjali.

¹⁴Nulu pratjana matja tintana, nunkangupini mitani maua pirna pantjina wonti; ja nulu wonina wonti maua ngamala.

¹⁵Ja nau wapana wonti ja nunkangupini mitani kana kulnuja mili pantjina wonti; ja nulu nina mitani nunkananj jinpana wonti nganti ngamalkananto.

¹⁶Ja nau ngalkujeli nganana wonti mandra nunkaui tandra talali jerturila, tanana ngantieli tajina wonti, ja wata kulnujeli nunkangu jinkina wonti.

¹⁷Nau burkali pantjina wonti ja jatana wonti: “Worderuntja mili ngaperali ngakanali ngamalkai, tanali buka marapu ngamalkai, ja ngani mauali paliai.

¹⁸Ngani jiritjila nganai, ja ngapinangu tikala nganai, ja nunkangu jatala nganai: “Ngaperiai, ngato madlentji ngankanala pariwilpani ja jinkangu,

¹⁹Ngani wata morla talku nganai jundru ngana ngatamura jinkani dikananto; ngana mili jinkani ngankamai.”

²⁰Ja nau jiritjina wonti, ja ngaperani nunkanani wokarana wonti. Nau matja worita nganana, ngaperali nunkanali nina najina wonti, ja nau nunkangu kalumiltjamiltjarina wonti ja mindrina wonti, ja nina munkana wonti ja manatapana wonti.

²¹Ngatamura nunkangu jatana wonti: “Ngaperiai, ngato madlentji ngankanala pariwilpani ja jinkangu; ngani wata morla talku nganai, jundru ngana ngatamura jinkani dikananto.”

²²Ngaperi milini nunkanani jatana wonti: “Nurujeli kati ngumu pirna dukaranau ja nunkangu widmanau, ja marani nunkanani marapirapira kuranau, ja tidnaputa tidnani nunkanani,

²³Ja nina nganti kuparu manipirna manianau ja nandranau; ja ngaiana tajinanto ja mankinanto;