Lucas 15:1-23

¹Nayan, medita se iskribinti aw doma otaw nelegeb te salà migpedapag diyà ki Jesus amon domineg dan te itoladà din.

²Yan se doun te migtindaet se menge Parisiyo aw menenoladà te punù, aw minikagi dan, “Medaet se eg-inangen din, so egsigelaken din se menge otaw egpekesalà aw eglàpang te punù ingkeliwat i Moises. Medaet so egpengaen sikandin doma dan.”

³Pegketaga-taga i Jesus te eg-ikegiyen dan, mig-indan sikandin te tegdeyanan seini, kagi din,

⁴“Aw doen otaw doen sebad gatos ayam-ayam din karniro, aw metalon se sebad, tenanan din se kesyaman teg siyam doton te tanà doen sagbet, aw pemehaen din se sebad netalon lamig kitaen din.

⁵Pegkità din, ontò sikandin meluba aw ibingen din molì.

⁶Aw molì sikandin, tewalen din se menge sigalak din aw simbalay din, kagi din, ‘Keilangan meluba kaw heman, so kinità ko den se karniro netalon.’

⁷Nayan, penenalan kaw te kagi ko. Iling heman kenyan, pengkey sidebok se otaw nelegeb te salà, aw megselsel sikandin, doen keluba doton te langit labi pa dakel diyà te keluba tepad te kesyaman teg siyam otaw wedà pegselsel so eg-inang dan te metòlid.”

⁸“Aw doen sempolò se kwarta te bayi plata meelagà, aw metalon se sebad, temteman din se solò, aw ponasan din heman se balay, aw ontò din pemehaen lamig kitaen din.

⁹Aw kitaen din iyan, tewalen din se menge sigalak din aw menge simbalay, kagi din, ‘Keilangan meluba kaw heman, so kinità ko den se kwarta netalon.’

¹⁰Penenalan kaw te kagi ko. Iling heman kenyan, meluba se menge anghil te Timanem pengkey olò sebad se otaw megselsel te salà din.”

¹¹Minikagi heman si Jesus, “Doen otaw dowa se batà din meama.

¹²Minikagi se adi diyà te amay din, ‘Amà, ibeg ko ibegay no den kanak se ketengà te tanà aw kedònan tenanan no kenami aw matay ka.’ Penga niyan, tinengà te amay se tanà din, aw imbegay din iyan diyà te didowa batà din.

¹³Penga niyan te wedà kenamay, imbeligyà te adi se tanà imbegay kandin, aw nesayo sikandin nengibing te kwarta din. Dimoton sikandin te ontò mediyò ogpeanan, aw pigbàtan din se kwarta din kidoen pineokit te medaet eg-inangen din wedad ontong.

¹⁴Pegkeamin te kwarta din, dimateng se ontò medaet bayil, aw ontò den sikandin nelidò.

¹⁵Penga niyan, migpeido-ido sikandin diyà te sebad otaw doen tanà kidoen, aw impetonggò sikandin te menge osa.

¹⁶Ontò sikandin binallos, aw kànen din peden se egpengànen te osa, so wedad doma kànen din. Wedad otaw neido kandin, aw wedad heman kànen imbegay kandin.

¹⁷Meneng mig-aneng-aneng sikandin, ‘Se kedita te otaw egterbaho kidoen te amay ko, ontò dakel se kànen dan. Meneng siak, agpet a matay dini tandà te ballos ko.

¹⁸Mèpiya aw molì a den doton te amay ko, aw megselsel a diyà te Timanem aw diyà te amay ko.

¹⁹Mikagi a heman diyà kandin te mepakay aw eked a din peden tewali batà din, meneng inangen a din iling te otaw egtendanan din.’

²⁰Penga niyan, timindeg sikandin aw minolì. “Pengkey mediyò pa se balay, meneng kinità sikandin te amay din aw neidowan din. Kimagnan se amay doton te batà din, aw kimeles kandin, aw nengadek kandin.

²¹Minikagi se batà din, ‘Amà, doen salà ininang ko diyà te Timanem aw diyà heman kamno. Eked a no peden tewali batà nikaw.’

²²Meneng timawal se amay din diyà te menge sineligan, kagi din, ‘Kegaen kaw. Ibingi niyo se ontò mèpiya saol ekasan din. Pepeningsingi niyo heman sikandin, aw pesepetosi niyo.

²³Engayi niyo se nati te baka melambò amon iyawen, so meg-inang kidon te dakel kànen tandà te luba tadon.