Luk 15:1-23

¹Nere takis tegou fai bagu, nere une fai bagu, Yesus nomo beele aaguwei nomo bode, hinomu la mayane.

²Ono wanenga, nere Farisi bagu, nere nuuni beele isou fai bagu, honggoro bode benou lewane, “Fai beha une tafagou fai bagu da gaara nyi-nyide.”

³Ono wanenga, Yesus no muuji beele beha lenigai,

⁴“Fai ete tere gama la no nomo sipsip 100, ariya ete huwariwei mata wonga, no sipsip 99 waha awa nigonga da nyi bode haumu ete la golo gogunga, no etenga huwariwai waha kurudu goi toroba dunga awonbona.

⁵Saini no sipsip waha torobadu bona, no isoudu te boila la inyemu tudu edega bona auledu matane gidu goyonbona.

⁶Saini no nomo mata langa heigedu bona, no nomo ilibumu gane bagu, nomo matane etenga bagu, yaure nigonga mai komo wogunga lenigonbona, ‘Tere ji ngate edegawei nomo! Ji yame sipsip ete huwariwai waha kurudu amina torobanaha.’”

⁷Onodu bona, Yesus no lewai, “Ji tere ngalenga letingi, edegawou onohanga ha laluwa la heige-heigena, saini une fai ete no huwanya ubuluna la. Ngalenga, nere fai 99, nere huwanyanege ubuluwei nomo haruwe uwau, wa nere aminaha tigini yafa gane maina, waha bode edega-edegade. Onou wa, une fai ete no huwanya ubuluwei mata wonga, edegawou anyakaro heige-heigena.”

⁸Ariya, Yesus no ege onou lenigai, “Aita ete no nomo moni wan kina waha 10 oruwa, ete mata la huwariwei mata wonga, no adadu ono wonbona? No lama dugedu, mata abiya kunu bona igeidedu kurudu goi torobadu tonbona.

⁹Saini no moni huwariwai waha ege torobadu tona la, no nomo ilibumu gane bagu, nomo matane etenga bagu, yaure nigonga mai komo wogunga no lenigonbona, ‘Tere ji ngate edega woboya! Ji yame moni ete huwariwai waha, ji kurudu boni ege torobadu tenaha!’ ”

¹⁰Onodu Yesus no onou lenigai, “Ji tere ngalenga letigini, saini une fai ete huwanya ubuluna la, edegawou onohanga nere Itou nomo ensel gamanege langa heige-heigena.”

¹¹Yesus no ege benou lenigai, “Fai ete no nomo idau gane nga nononga.

¹²Ariya, idau huuntaha wa, no umamu benou letuwai, ‘Jijei, ne name dada oruwa ere baabo ngare wese harau ganga waha, ji onou ninafe isini, ji yame bona wa, ne elebe wesedu hiyei nomo gau hina.’ Ono wainga umamu no nomo dada oruwanga, foure ngadu bona idau gane nga nononga wese narai.

¹³Ono wainga udidiwei uwa, idau huuntaha wa no nomo dada oruwa komomudu bona, fai ila langa huuruwai. Onodu no moni tedu bona, goi matane ete baae langa yafai. No matane waha langa edegawou hogo fere-fere tafa bona yafa gainga, no nomo moni oruwanga usuwai.

¹⁴Saini no nomo moni oruwa usuwai langa, mau saini anyakaro matane waha langa heigai. Ono wainga no dada ete te uwau, ewenga yafai.

¹⁵Onou waha bona, no goidu bona matane wahaha fai ete la haruwe torobawai. Ono wainga fai wa no huuru tuwainga, nomo buuwa orei la oofa nigei nomo bona goyai.

¹⁶Ariya, no buuwa sayori osoka nyi gane nerigedu bona no huweli usumuwei nomo bona ila elegedu nyei nomo inyangaro gau tuwai. Onou wa fai ete no huwanya huweli bona da te tuwei uwa.

¹⁷“Ariya nomo isou hilou mayainga lewai, ‘Ji yame jijei nomo haruwe magana nere da baingaro. Ariya, ji belanga huweli ma te boni yafani.’

¹⁸Buyona, ji jaidu ege gidu boni yame jijei bagu goyonboni. Ji goidu benou letuwon boni, ‘Jijei, ji ne Itou ngare, une tafa tirene.

¹⁹Elebe ne ege ji yame magana hiyei nomo ji fai hilou uwa. Ne ji awa hiyahenga, ne name haruwe magana ete dorofe yafoni.’”

²⁰No onou ledu bona, jaidu umamu bagu goyai. “Saini no iinga baae la golowai mai gainga, umamu no ago ayadu bona idau mai gainga uredu, aau danga bagu warai. Onodu bona, no guriyedu goidu yaasu tudu, dobole tubona uumba tuwai.

²¹Ono wainga, idau no umamu benou letuwai, ‘Jijei, ji ne Itou ngare une tafa tireneha. Onou waha bona, elebe ne ege ji yame magana hiyei nomo, ji fai hilou uwa.’

²²Ono wainga umamu no nomo haruwe magana yaure nigainga mayanenga lenigai, ‘Tere yame kolos ufaro hilobainga waha fasadu tetamaidu bonade, tagumu tuwagu. Onodu owo jirou la ring ete tanimu fuwagu nigai. Onodu bonade, su afo langa tani fuwagu nigai.

²³Onodu tere goi bulumakao magana ngasagou waha te tamaidu, dukote wadenga ajidu nyi boya edegawei nomo.