Kʋkɑlʋɣʋ 24:3-22

³Nɑ ɩ́ mɑ kɑwǝyɑɣɑ sɩ: Peyɔɔ pǝyɑlʋ Pɑlɑɑm mɑ́, mɑ kʋkpɑɑlǝtʋ ntɔ. Pǝ kulɑ mɑ ɩsɛ kɛ́.

⁴Mɑ nɩɩkɩ Ɩsɔ kʋyɔɣɔtʋtʋ kɛ́, nɑ mɑ́ pɑɑsǝɣǝnɑ nti Tomɑ tǝnɑ tʋ hʋlǝɣɩ-m tɔ. Ye mɑ sɛɛkɩ-ɩ ɩ hʋlǝɣɩ-m ɩ tǝɣɩ.

⁵Ɩsɛɣɛlɩ yǝlɑɑ Yɑkɔpʋ lʋlʋɣʋ nyǝ́mɑ mɛ, mǝ cokɑ tewɑɣɑ pǝ tɩɩ fɛɩ.

⁶Pǝ cɑɣɑ kɛ́ ɩsɩɩ lɔɔŋ wei ɩ kpeŋ tɔ, yɑɑ pɔɣɔ kʋtemiŋ tɔɔ hɑlǝm. Yɑɑ tɩɩŋ kʋpɑŋ wei Tɑcɑɑ tuuwɑ pɔɣɔ nɔɣɔ tɔ.

⁷Pǝ cɑɣɑ ɩsɩɩ lʋm sukuɣu nɑ pǝ wɑtǝɣɩ tɩɩŋ tɛɛ tɔ. Pɑ wulɑʋ kɑ́ kǝlɩ Akɑkɩ nɑ pɑ kɑwulɑɣɑ tɛɛ toŋ.

⁸Ɩsɔ lǝsǝnɑ-wɛɣɛ Icipiti tɑɑ, nɑ tomiŋ ɩsɩɩ tɑɑlɛ nɑʋ. Nɑ pɑ́ yɔkǝɣɩ pɑ kolontunɑɑ mʋwɑ nɑ pɑ́ cʋtǝtǝɣɩ-wɛɣɛ nyǝmɑ́.

⁹Pɑ luŋiɣi kɛ́ ɩlɛnɑ pɑ hǝntɩ ɩsɩɩ tɔɣɔlɑsɩ. Awe pǝsǝɣɩ nɑ ɩ́ kʋsɩ-wɛ nɑ toŋ? Ɩsɛɣɛlɩ, pǝ́ kooli kʋpɑntʋ kɛ nyɑ́ kʋpɑntʋ koollu. Pǝ́ tǝŋsɩ mpusi kɛ nyɑ́ mpusi tǝŋsǝlɑɑ.

¹⁰Tǝnɑɣɑlɛ pɑ́ɑ́nɑ́ kpɑ Pɑlɑkɩ nɑ ɩ́ kɑlǝɣɩ nɑ ɩ́ fiisiɣi niŋ nɑ ɩ́ tɔŋ sɩ: Mɑ kɔnɑ-ŋ kɛ́ sɩ ń tǝŋsɩ mɑ kolontunɑɑ kɛ mpusi. Tɔm tooso nyǝm ntɔ n kooliɣi-wɛɣɛ kʋpɑntʋ.

¹¹Polo ń kpe. Mɑɑ sɩɩwɑ sɩ mɑɑ kʋsɩ nyɑ́ nyʋɣʋ kɛ́. Amɑ Tɑcɑɑ kisɑɑ.

¹²Ḿpʋ́ɣʋ́ Pɑlɑɑm cɔwɑ Pɑlɑkɩ sɩ: Anɩ mɑɑ tɛmɑ nyɑ́ tillɑɑ kɛ heeluɣu sɩ,

¹³pɑɑ n kɑ́ cɛlɛ-m nyɑ́ kɑwulɑɣɑ tɑɑ liɣitee nɑ wʋlɑ tǝnɑ, pǝ fɛɩ sɩ mɑ́ kpɛɛsǝnɑ Tɑcɑɑ. Nti tǝ tike ɩ́ kɑ́ tʋ mɑ nɔɣɔ tɑɑ tɔɣɔ mɑɑ yɔɣɔtɩ.

¹⁴Tɔʋ, nɔɔnɔɔ mɑɑ mǝlɩ mɑ yǝlɑɑ kiŋ. Ɩlɛ kɔɔ nɑ mɑ́ hʋlɩ-ŋ mpi Ɩsɛɣɛlɩ nyǝ́mɑ kɑ́ wɑkǝlɩ nyɑ́ yǝlɑɑ kɛ kʋyɑkʋ nɑkʋlɩ tɔ.

¹⁵Ntɛnɑ ɩ́ mɑ́ kɑwǝyɑɣɑ sɩ: Peyɔɔ pǝyɑlʋ Pɑlɑɑm mɑ́, mɑ kʋkpɑɑlǝtʋ ntɔ. Pǝ kulɑ mɑ ɩsɛ kɛ́.

¹⁶Mɑ nɩɩkɩ Ɩsɔ nyɑ́ kʋyɔɣɔtʋtʋ kɛ́, nɑ mɑ́ pɑɑsǝɣǝnɑ nti n hʋlǝɣɩ-m tɔ. Ye mɑ sɛɛkɩ-ŋ n hʋlǝɣɩ-m nyɑ́ tǝɣɩ.

¹⁷Mɑ loosiɣi mpi pɩɩ tɛ nɑ pǝ́ lɑ́ tɔ, nɑ mɑ́ nyǝnǝɣɩ-wɩ. Ɩsɔtʋlʋŋɑ kɑ́ lɩɩ Yɑkɔpʋ lʋlʋɣʋ tɑɑ. Wulɑʋ kɑ lɩɩ Ɩsɛɣɛlɩ tɑɑ nɑ ɩ́ mɑ́ Mowɑpʋ nyǝ́mɑ lǝkpɑɣɑsɑɣɑ nɑ Sɛɛtɩ lʋlʋɣʋ nyǝ́mɑ nyɔɔŋ tɑɑ.

¹⁸Ɩsɛɣɛlɩ nyǝ́mɑ kɑ́ lɛɛkɩ pɑ kolontunɑɑ Ɩtɔm nyǝ́mɑ tɛtʋ Seyii nɑ pɑ́ pǝsɩ ɑkɑnɑɑ.

¹⁹Yɑkɔpʋ lʋlʋɣʋ nyǝ́mɑ kpilɑ pɑ kolontunɑɑ. Pɑ kpiisiɣi mpɑ pǝ kɑɑsɑɑ tɔɣɔ pɑ ɑcɑlɛɛ tɑɑ.

²⁰Ḿpʋ́ɣʋ́ Pɑlɑɑm nɑwɑ Amɑleke nyǝ́mɑ, nɑ ɩ́ tɔ sɩ: Amɑleke nyǝ́mɑ kɛ piitim sɔsɔɔm kɛ́. Amɑ ncɑɑlɛ tǝkpɑtɑɑ kɛ pɑɑ tɛɛsǝnɑ.

²¹Ɩ nɑwɑ Keni nyǝ́mɑ, ɩlɛnɑ ɩ tɔ sɩ: Pǝ cɑɣɑnɑ-mɛɣɛ mǝ tɛtʋ tɑɑ kɛ́ ɩsɩɩ Tɑntɛ pusuɣunɑ kʋkpɑmʋɣʋ tɔ.

²²Pɑɑ nɑ mpʋ kɔkɔ kɑ́ niisinɑ mǝ tǝcɑɣɑlɛ, nɑ Asilii nyǝ́mɑ nɑ́ɑ́ kuu-mɛɣɛ yomle.