Dagalene 24:3-22

³ogodagua mbiwia hene. I̱ Bero igini Balamahanda mbiwia harogo I̱na ngagobi deme bayuwa ngoalia howa hondowa

⁴Ngode Datagaliwabehanda bi larago hale halu Ngode Datagaliwabe Hongo Haiheore kagome de gandeba mo walia haragola i̱ de handaya ho wiaabo halu latagi haro.

⁵Yagaba-o í̠naga balai anda baya gibioredane hendedo. Isaraele-o í̠ holeneore baya gibioredane hendedo.

⁶Balai anda biaru duguni ayage ale mini dedi ho dugu haradagua hoyu pedane hendedo. Iba poraru angeni mabu wuyu poradagua bidane hendedo. Anduane Homogohanda ira mini aloru mabu ogoriani hengene mbauleda. Ira tamia iba ange ange hoyu poradagua bia.

⁷Isaraele tinaga dindini dalu iba ho wiaabo holebira. Tigua dindi mo hini haragola tomo hongolebira. Isaraele tinaga kini ibu Agaga ale ndo ibu hongohe mini lene daligaore holebira. Ibunaga handame howa haru holene timbuni yangale daliga wulebira.

⁸Ngode Datagaliwabehanda ti Iyibi dindi howa haru tagira ibiya. Ibugua bulumaga gabuame hongo hagadagua bialu tinaga wai bia hole hongo haga ka. Tinaga waitigirubi bo ibira hai halu Kuni gingiru lalu timubi bulubaga biaga.

⁹Isaraeleali uruni gabua laiono hongo gibiorehe ale ka. Ogoni ibu padaria mbiralime barila hole ai kabe. Mbiralime Isaraele bayale helo mo bayale hayagua ibubi bayale holebira. Mbiralime Isaraele ko helo ha hayagua ibubi ko helo ha hene holebira, lalu Balamahanda mbiwia hene.

¹⁰Balagahanda bi ogoni mbiwia hayagola Balama ibugua keba timbuniore howa ibunaga gi kirabali tanda lowa Balamahondo lalu, I̱na í̠ olarugo wali agali uruni ha habelo olaru. Anigo í̠na bi halu tebo larigoni bibahende bayale hangu lari.

¹¹Ai i̱ manga ho kogo wahalu dai bia. I̱na í̠ yolo buliya larugoni Anduane Homogohanda yolo biagoni namibelo mo wahayada, lene.

¹²Ani layagola Balama ibugua ladai bialu lalu, Í̠naga agaliru i̱ hewaria bi yalu pu lariyaruhondo ogodagua larugoni ndobe.

¹³Í̠na kini andagaha muni siliba ngolobi ngeru bibahende ngiai hariyaguabi Anduane Homogohanda langirago mo wahalu i̱ni hame ledodagua nabulebero. Anduane Homogohanda la larago hangu labehe ko lalu tihondo lamirugoni, lene.

¹⁴Balamahanda Balagahondo lalu, Áyu i̱ i̱ninaga wali agali karia dai bulebero. Isaraele wali agali o karunime mani í̠naga wali agalihondo ogodagua bulebira lalu í̠ manda bu habelo mo walia haro.

¹⁵Ani lowa ibugua mbiwia ogodagua lene. I̱ Bero igini Balamahanda mbiwia harogo I̱na ngagobi deme bayuwa ngoalia howa hondowa

¹⁶Ngode Datagaliwabehanda bi larago hale halu Mbirali Daligaorene Daliga Kagome manda mo wia hene ko. Ngode Datagaliwabe Hongo Haiheore kagome de gandebaha mo walia haragola i̱ de handaya ho wiaabo halu latagi haro.

¹⁷Mbirali hendedogo mani holebiragonaga de hondo ko. I̱na Isaraele hameigini de hendedo. Kini mbira yakundi ale hameigini uruniha howa tagira ibulebira. Ibunaga halimbu Isaraeleha howa tagira ibulebira. Kini ogoni ibugua Moabalinaga haguane tuguda hole bialu Sede hameiginiru mo ko hai holebira.

¹⁸Ibugua ibu waitigi Idomo bo waholebira. Tinaga dindi karulowa ibunaga wulebira. Isaraelenaga hongo anda halu ha ho wiaabo holebira.

¹⁹Isaraele hameiginirume bibahende karu bo hengeda hai holebira. Tano timbuni ogoriani yu wahene karu bo hilu wahai holebira.

²⁰Balama ibugua de gandeba handalu hearia Amalegealiru paleago hondowa mbiwia halu lalu, Ala Amalegeali ti hameigini bibahendenaga hongo bolangua hene. Mani ti bo ereba hai holebira.

²¹Ani lowa Balama ibugua de gandeba dege handalu Kenialiru paleago hondowa mbiwia ogodagua hene. Kenialiru tí holeneore pabeme bu mabu bupeheda. Í̠naga anda hari nene ngaru obeneni ega hariaweme biradagua bu kamigonida.

²²Anigoyu Asiria tigua tí garabaya haru haragola tí bo haealabagabu waholebira.