Kʋkɑlʋɣʋ 11:13-32

¹³Yɑɑ leɣe mɑ kpǝlǝɣɩ nɑntʋ nɑ mɑ́ cɛlɑ sɑmɑɑ ɩnɛ nɑ ɩ́ tɔɣɔ? Mpi tɔ, pɑ wiikinɑ-m sɩ mɑ́ cɛlɑ-wɛɣɛ nɑntʋ nɑ pɑ́ tɔɣɔ.

¹⁴Mɑ tike mɑ kɑɑ pǝsɩ pɑ sǝɣǝlɑ, ɑ tɛɛ-m.

¹⁵Ye tɑmpɑnɑ sɩ n cɑɑ ń lɑ-m kʋpɑntʋ, pǝ kǝlɑ teu sɩ ń kʋ-m nɑ mpi n kɑ lɑkɩ-m ɩsǝntɔ tɔ. Mɑ́ tɑɑ nɑ mɑ kʋnyɔntɔɣɔlɛ.

¹⁶Ntɛnɑ Tɑcɑɑ cɔ Moisi sɩ: Koti yǝlɑɑ mpɑ lɛlɑɑ tʋɣʋnɑ nɑ pɑ́ kɛ́ nyʋɣʋ nyǝ́mɑ tɔɣɔ nɩɩtoso nɑ nɑɑnʋwɑ. Ɩlɛnɑ nyɑnɑ-wɛ ɩ́ kɔɔ ɩ sǝŋ Ɩsɔ cokǝle nɔnɔɣɔ.

¹⁷Ɩlɛ mɑɑ tii nɑ mɑ́ nɑ-ŋ tǝ́ yɔɣɔtɩ tǝnɑ, nɑ mɑ́ tʋ-wɛɣɛ nyɑ́ lǝmɑɣɑsǝlɛ. Ɩlɛnɑ pɑ́ sǝnɑ-ŋ nɑ ń tɑɑ sǝɣǝlɩ sɑmɑɑ sǝɣǝlɑ kɛ nyɑ́ tike.

¹⁸Ɩlɛnɑ ń tɛlǝsɩ yǝlɑɑ sɩ, ɩ́ tɑɣɑnɩ mǝ tǝɣɩ cele tɔɔ. Mɑɑ hɑ-mɛɣɛ nɑntʋ nɑ ɩ́ tɔɣɔ. Mpi tɔ, mɑ nɩɩ ɩsǝnɑ luluŋ pɩɩ-mɛ, nɑ ɩ́ kʋntǝɣɩ, nɑ ɩ́ tɔŋ sɩ mǝ nɩɩkɑɣɑ leleŋ kɛ Icipiti tɔ.

¹⁹Pǝ tɑɣɑ kʋyɑkʋ kʋlʋmʋɣʋ yɑɑ nɑɑlɛ yɑɑ kɑkpɑsɩ yɑɑ nɑɑnʋwɑ tike kɛ ɩ́ kɑ́ tɔɣɔ-tɩ.

²⁰Amɑ ɩsɔtʋ tǝcu kɛ́, hɑlǝnɑ tǝ lɩɩ-mɛɣɛ sɔŋ. Mpi pǝ tɔɔ ɩ́ lɔwɑ Tɑcɑɑ mɑ wei mɑ wɛ mǝ hɛkʋ, nɑ ɩ́ kʋntǝɣɩ mǝ Icipiti tɑɑ lɩɩʋ tɔɔ tɔ.

²¹Tǝnɑɣɑlɛ Moisi nɔɣɔ tǝkpɑʋ sɩ: Yoolɑɑ pɑnɛ pɑ tɑ sɛkɩ iyisi nɑsǝtoso (600.000). Nɑ ń mɑɣɑsǝɣɩ sɩ n kɑ́ cɛlɑ-wɛɣɛ nɑntʋ kɛ ɩsɔtʋ nɑ?

²²Pɑɑ tǝ kʋwɑ tɑ nɑɑŋ, nɑ tɑ heeŋ, nɑ tɑ pǝ́ŋ tǝnɑ. Yɑɑ tǝ kpɑwɑ teŋku tɑɑ tiinɑ tǝnɑ pɩɩ hɑŋǝɣǝnɑ-wɛ.

²³Ntɛnɑ Tɑcɑɑ sɩ: Mɑ tomɑ tɑ tɔɔ? N kɑ́ nɑnɑ nyɑ́ ɩsǝpǝle kɛ nɔɔnɔɔ sɩ, pɩɩ lɑ mpʋ yɑɑ pǝ kɑɑ lɑ?

²⁴Ḿpʋ́ɣʋ́ Moisi lɩɩwɑ nɑ ɩ́ tɛlǝsɩ Ɩsɛɣɛlɩ sɑmɑɑ kɛ Tɑcɑɑ kʋyɔɣɔtʋtʋ. Pǝ wɑɑlɩ kɛ́ ɩ kotɑ Ɩsɛɣɛlɩ nyʋɣʋ nyǝ́mɑ nɩɩtoso nɑ nɑɑnʋwɑ, nɑ ɩ́ pɩɩlɩ-wɛ nɑ ɩ cɔɔnɑ Ɩsɔ cokǝle.

²⁵Ɩlɛnɑ Tɑcɑɑ tii ɩsɔŋmʋntʋɣʋ tɑɑ, nɑ ɩ́ yɔɣɔtǝnɑ Moisi, nɑ ɩ́ tʋ́ nyʋɣʋ nyǝ́mɑ mpɛ pɑ tɑɑ kɛ́ Moisi lǝmɑɣɑsǝlɛ. Nɑ pɑ́ sʋʋ yɔɣɔtʋɣʋ ɩsɩɩ Ɩsɔ kʋyɔɣɔtʋtʋ tɛlǝsǝlɑɑ. Ɩlɛ pǝ tɑ leeli kɛ́.

²⁶Amɑ nyʋɣʋ nyǝ́mɑ mpɛ pɑ tɑɑ nɑɑlɛ, Ɩlǝtɑ nɑ Metɑ pɑ tɑ polo Ɩsɔ cokǝle kiŋ. Amɑ tǝsikile tɑɑ kɛ́ pɑ sɑɑlɑɑ. Nɑ Ɩsɔ tʋ́ ɩ lǝmɑɣɑsǝlɛ kɛ pɑ tɑɑ nɑ pɑ́ yɔɣɔtǝɣɩ, ɩsɩɩ Ɩsɔ kʋyɔɣɔtʋtʋ tɛlǝsǝlɑɑ.

²⁷Ntɛnɑ ɩfepu nɔɣɔlʋ ɩ́ kpɑɣɑ ɑsewɑ nɑ ɩ́ polo ɩ́ heeli Moisi kɛ nti Ɩlǝtɑ nɑ Metɑ pɑ lɑkɩ tɔ.

²⁸Mpʋɣʋlɛ Nuŋ pǝyɑlʋ Yosuwee wei ɩ lɑkɑɣɑ Moisi tǝmlɛ kɛ tuu ɩ pǝcɑɑtʋ tɔ, ɩ tɔmɑ sɩ: Mɑ cɛ heeli-wɛ sɩ pɑ́ su.

²⁹Ntɛnɑ Moisi sɩ: N lɑkɩ-m ɩsɛsɛɛmlɛ kɛ́? Hɑlɩ pǝ cɑɣɑ mɑɣɑ ɩsɩɩ Tɑcɑɑ ɩ́ tʋ́ ɩ lǝmɑɣɑsǝlɛ kɛ Ɩsɛɣɛlɩ nyǝ́mɑ tǝnɑ tɑɑ, nɑ pɑ́ lɑ Ɩsɔ kʋyɔɣɔtʋtʋ tɛlǝsǝlɑɑ.

³⁰Ɩlɛnɑ Moisi nɑ Ɩsɛɣɛlɩ nyʋɣʋ nyǝ́mɑ mpɛ pɑ́ mǝlɩ tǝsikile.

³¹Ḿpʋ́ɣʋ́ Tɑcɑɑ kʋsɑ heelimuɣu nɑ teŋku tɔɔ. Nɑ pǝ́ kɔnɑ lɛɛsɩ tuutuumɑ kɛ tǝsikile hɔɣɔlʋɣʋ, nɑ pǝ́ polo ɩsɩɩ kʋyɑkʋ kʋlʋmʋɣʋ tɔntɛ, nɑ pǝ́ cɔɔ tǝsikile. Nɑ sɩ́ kɑɑ huɣule ɩsɩɩ mɛɛtǝlɩ kʋlʋm.

³²Ntɛnɑ sɑmɑɑ kuu-sǝɣɩ kʋyɑkʋ ŋkʋ, nɑ pǝ ɑhoo nɑ pǝ tɛʋ kʋfemuɣu. Pɑɑ wei ɩ kɑ tɔɔsɑ pǝcɔ tɔ, pǝ lɩɩkɩ-ɩ kiloonɑɑ iyisi iyisi kɛ́. Ḿpʋ́ɣʋ́ pɑ lemɑ-sǝɣɩ ilim nɑ pǝ cɔɔnɑ tǝsikile.