Numperis 11:13-32

¹³Ia üpwe küt me ie fituk pwe üpwe ngeni ekei aramas meinisin? Pun ra lal ngeniei o üra, ‘Kopwe ngenikem fituk pwe aipwe ochoch.’

¹⁴Ngang üsap tufich le akaleäman ngeni weiresin tümwünün ekei aramas, pun a kon chou ngeniei.

¹⁵Nge are kopwe föri iei usun ngeniei, kopwe ümöümöch ngeniei o nieila iei chök pwe üsap chüen küna ei sokun weires.”

¹⁶Iwe, ewe Samol mi Lapalap a üreni Moses, “Kopwe körato rei fik mwän seni lein ekewe souakomwen Israel, chokewe ka sileer pwe ir souakom me sounemenemen ekewe aramas. Kopwe emwenireto ren ewe imw mangaku ia aramas ra churiei ie, pwe repwe etuk le ütä ikenan.

¹⁷Ngang üpwe feitiu o kapas ngonuk ikenan. Iwe, üpwe angei och manamanen ewe ngün mi nom womw o isetä wor. Repwe etuk le mwärelong fän weiresin tümwünün ekewe aramas pwe kosap akaleäman le mwärelong fan.

¹⁸Iwe, kopwe üreni ekewe aramas, ‘Oupwe apinikemi fän iten lesor pwe oupwe ochoch fituk. Pun ewe Samol mi Lapalap a rongorong ämi lal pwal ämi apasa: Iö epwe ngenikem ochäm fituk? Pun aia nonomöch lon Isip. Iei mine ewe Samol mi Lapalap epwe ngenikemi fituk pwe oupwe ochoch.

¹⁹Nge ousap ochoch fituk lon eu chök rän ika ruu rän ika limu rän ika engol rän ika rüe rän,

²⁰pwe lon unusen eu maram, tori epwe nipoon ngenikemi o notä womi. Pun oua oput ewe Samol mi Lapalap mi nom lefilemi o lal ngeni lupwen oua apasa: Pwota mwo chök sia towu seni Isip?’”

²¹Nge Moses a üreni Kot, “Iei üa emweni wonopükü ngeröü aramas, nge en ka apasa pwe kopwe ngeniir fituk, pwe repwe ochoch lon ükükün unusen eu maram.

²²Ifa usun, epwe naf ekewe pwiin sip me kow, pwe repwe ninnila fän iter? Ika epwe naf ngeniir ikenen leset meinisin?”

²³Nge ewe Samol mi Lapalap a pälüeni Moses, “Ifa usun, a aükük ai manaman? Iei kopwe küna ika ai kapas ngonuk epwe fis ika esap fis.”

²⁴Iwe, Moses a feila o asile ngeni ekewe aramas än ewe Samol mi Lapalap kapas. A emwichato fik mwän seni me lein ekewe souakomwen ekewe aramas o anomuur pwelin ewe imwenfel seni mangaku.

²⁵Mürin, ewe Samol mi Lapalap a feitiu lon ewe kuchu o kapas ngeni Moses. A angei och manamanen ewe ngün mi nom won Moses o isetä won ekewe fik souakom. Iwe, lupwen ewe ngün a nom wor, ra osuni. Nge mürin resap chüen osunisefäli.

²⁶Nge mi wor ruoman mwän iter Eltat me Metat ra alealaong lein ekewe fik ra chök nom lon ewe ia ra nonom ie, nge resap feila ren ewe imwenfel seni mangaku. Iwe, ewe ngün a feito wor pwe ra pwal osuni me ewe ia ra nonom ie.

²⁷Iwe, eman alüal a säla ren Moses o üreni, “Eltat me Metat ra osuni me lon ewe leni ia ra nonom ie.”

²⁸Nge Josua nöün Nun mwän, nöün Moses we soualilis seni lealüalün, a apasa, “Ai samol Moses, kopwe aükätiu ar osuni.”

²⁹Nge Moses üreni, “Ifa usun, ka apangau won wisei? Amwo, nöün ewe Samol mi Lapalap aramas meinisin repwe soufos, pwe epwe anomu Ngünün wor.”

³⁰Mürin, Moses me ekewe souakomwen Israel ra liwiniti ewe ia ekewe aramasen Israel ra nonom ie.

³¹Iwe, ewe Samol mi Lapalap a awora och asepwäl mi pönato mansüsü iter kweil seni lematau. Iwe, ra nom pwelin ewe ia ekewe aramasen Israel ra nonom ie ükükün langatamen än eman sai lon eu rän me lepelian meinisin, nge ra ässitiu tori ükükün ülüngat fiit seni won pwül.

³²Iwe, ekewe aramas ra ütä o ionifengeni ekewe kweil lon unusen ewe rän me unusen ewe pwin tori unusen ewe rän mürin. Nge ätewe mi chokükün ionian a ioni ükükün ülüngat ngeröü wonopükü paun. Iwe, ra apwaseer pwelin ünükün lenier we.