NUMERA 11:13-32

¹³Vamu na edeseni ai baina abia, ini taunimanima loḡora iubulaidia? Badina be idia na lau vairagu ai e taimu, e tomu “Vamu a henimai, baia ania”.

¹⁴Lau na sibogu ini taunimanima loḡora ireḡudia asiname heḡereḡere; maduna na metau herea, ihuana na asi goadagu.

¹⁵Emu ura egu ai bema unuheto, namona be boma bogagu hisi, ina harihari boma alagu mase, bena egu hemarai na basie hedinarai.

¹⁶Bena Iehova ese Mose e haḡania, eto, Israel tau-badadia hitu-ahui bavabidia hidi, oi dibamu tau-badadia korikori bona mai siahudia taudia; bena ba haboudia hebou kalagana vairanai, oi ida bae gini.

¹⁷Bena lau baina diho, baina hereva henimui unuseni ai; bona oi vada na henimu siahuna kahana baina abia lou, idia baina henidia; ini taunimanima ireḡudia madunana na oi ida ba huaia hebou, sibomu basio huaia.

¹⁸Taunimanima danu ba hamaorodia, baoto: Sibomui ba hahelaḡa ela bona kerukeru, bena vamu bavania; badina be Iehova o tai henia, oto “Daika ese amai vamu baine henimai? Aigupto ai bogamai e kunuva”. Taunabunai, Iehova ese vamu baine henimui, bavania.

¹⁹Dia dina tamona eiava rua bona eiava ima eiava gwauta eiava ruahui,

²⁰a hua ena dina iboudiai vamu bavania, ela bona ianina ai ba hesiku, bena ba dadaraia. Badina be Iehova, bogaragimui ai e nohomu Diravana, vada o dadaraia, ia vairanai o tai, oto “Dahaka dainai Aigupto a rakatania?”

²¹A Mose eto, Be, egu bese taudia iboudiai be domaga tauratoi aedia amo e rakamu: taudia; a oi na o tomu “Vamu baina henidia, bae ania, ela bona hua ta baine ore”.

²²Mamoe seridia bona nani seridia bae aladia ore, adia vamu, a? Eiava davara gwarumedia iboudiai bae abidia ore, idia bogadia ihakunudia a?

²³Iehova ese Mose e haere henia, eto, Iehova imana e tunamu a? Do ba itaia, lauegu hereva baine momokani eiava lasi.

²⁴Taunabunai Mose e raka lasi, Iehova ena hereva na Israel taudia e hamaorolaidia, a Bena tau badadia hitu-ahui e abidia hidi, hebou kalagana murimurinai e haginidia heḡeḡe.

²⁵Bena Iehova na ori ai e diho, e hereva henia, a bona e henia siahuna kahana na hari hitu-ahuiosi e henidia; bena hari siahu idia latadiai e kau negana ai idia na e peroveta, to una negana ai mo.

²⁶Tatau rarua taruha ai e nohova, ta ladana na Eledad, ma ta ladana na Medad; bena siahu na idia danu latadiai e kau. Idia be e abidia hidi taudia rarua, a hebou kalagana asiela, bena taruha lalonai e peroveta.

²⁷Bena eregabe tauna ta ese Mose dekena e heau lao, eto, Eledad bona Medad be taruha ai e perovetamu.

²⁸Bena Iosua Nunu, Mose ena hesiai tauna bona ena abi-hidi tauna ta, e hereva, eto, Mose Rahobada e, ba gwaudia tao.

²⁹A Mose ese e haere henia, eto, Lau daigu ai o vaḡeḡemu a? Iehova ena orea taudia iboudiai bema peroveta bona Iehova ena siahu be iboudiai latadiai bema kau bema namo.

³⁰Bena Mose, Israel tau-badadia ida, taruha e lou henia.

³¹Una negana ai Iehova ese lai ta e siaia; bena una lai ese kibi momo davara kahana e harohodia diho edia taruha tanona ai, ela bona dina ta laolaona heḡereḡerena taruha kahana ai, bona ma kahana ai danu dina ta laolaona heḡereḡerena, tano daenai kiubit rua heḡereḡerena.

³²Bena taruha taudia e tore isi, kibi na e haboudia boi, e haboudia rani, ma dina iharuana ai e haboudia boi; e habou maraḡi tauna ese homere gwauta e haboudia. Bena edia kalaga badibadidiai e hakaukaudia.