1Ngudda nawu ngurrihni kunred Jerusalem, wanjh ngurridolkka! Ngurridin kore kumwolkayindanj ngudberre. Nawu Yawey nungan nuye namakmak ngunmarnebolkwolkang.
2Birribuyika bininj kore kubolkbubuyika bedberre wanjh kabirridjaldi kunkak duninjh manbu kabenbalhme. Dja ngudda ngurridi kore nawu Yawey ngunmarnebolkwolkan yiman kayime nawu kundung kabame dja ngurrinan nuye kunmakmak duninjh.
3Kaluk bu kunmekbekenh wanjh birriwern nawu birridjenbubuyika bininj kabirrimre kore ngudda, dja kings bedberre wanjh kabirrinan kore Yawey kawernhbolkwolkan ngudberre yiman kamdungbebme kore kunbarnangarrakerrnge.
4Wanjh kunu ngurribolknabolkna! Ngurrbennan kabirrimirndewernmerren nawu kabirrimre kore ngudda. Nawu bebeywurd ngudberre kabirrimre kore djarrehbeh. Nawu ngalbebeywurd ngudberre warridj kabirrimre, dja nawu Yawey kabenngorrkan yiman kayime wurdwurd.
5Kuhni rowk ngurrikurdunan, dja wanjh ngurrimarrmarr duninjh. Ngudda ngurrideldelme bu kunnjilngmak dorrengh. Kaluk birribuyika bininj kabirrimkan namakmak bedberre ba bu ngundiwon. Kabirrimkan kunwernkenh bedberre kore kabbala ba bu ngundiwon.
6Kaluk ngurrimang mayh nawu camels nawern, nawu kabirrimmirndekan kore kunbolkbuyika yiman Midian dja Ephah. Birriwern bininj kabirrimre kore kunbolk Shebabeh warridj, kabirrimyikan wirlmurrng gold dja mankalkkidjmanjmak ba bu ngundiwon. Bedda wanjh kabirrimulewan kunwok kunmak bu kabirriyolyolme kore nawu Yawey kurduyimeng.
7Wanjh Yawey kayime, “Nawu mayh rowk sheep namirndewernkenh kore kunbolk Kedar, wanjh ngurrimang! Nawu sheep narangem rowk kore Nebaioth, wanjh kabirrimre ba bu kandimarnekinje kore manbu altar ngardduk. Dja wanjh ngaye nawu Yawey ngamarnbun ngardduk Temple bu mandjalmakkaykenh duninjh kunrurrk.”
8“Nangalengale nawu ngabennan kabirrire yiman kunngol kaddum kabirringolre, dja yiman kayime doddorrok bu kabirridokme kore rehred bedberre?
9Nahni kabirrimre bininj nawu ngurrbenbornnang. Bedda kabirribarndi kabbala manbu kunred Tarshishbeh, dja kabirrimre djarrehbeh kabirrimkan silver dja gold. Bedda wanjh kabirrdjare ngaye ngandingeykukenwon, ngaye Yawey nawu God ngudberre ngudda nawu Israel ngunkebmawahmeng, dja ngaye ngadjalkudji ngadjaldjamun duninjh ngudberre. Ngaye wanjh ngeykimukwong dja mak kukenwong ngudberre.”
10“Bininj nawu birrikang kubolkbubuyika wanjh kabirrimre ngundimarnerurrkmarnbun manbu kawarnamyo kore kunredkimuk ngudberre. Nawu kings bedberre ngundimarnedurrkmirri. Yoh, ngaye dungi ngudberre dja buni kore ngayidduy ngudberre, dja bolkkime wanjh ngaye kongibun ngudberre.
11Ngudda ngurridangbawon kurrangkimuk kore ngudda kunredkimuk. Kadjaldangmarrhmiyindi bu kunbarnangarra dja kunkak, dja wanjh kamak. Bininj nawu birridjenbubuyika kabirrimngimen kore ngudda wanjh kabirrimkan ngundiwon kunmakmak kore birribolkbubuyikabeh. Nawu kings bedberre warridj ngundiburlume yiman bu ngurrbenyurrhke rowk.
12Bininj kore kubolkbubuyika nawu ngundiwirrihme dja minj mak ngundimarnedurrkmirri, wanjh kabirribularrbuyindan.”
13“Ngabenmarnbun bininj bu kabirrirurrkname kunredkimuk Jerusalem, dja mak kabirrikerrngehkmen manbu Temple ngardduk. Bedda wanjh kabirrimkan kundulk manbu manmakmak kore kunbolkkimuk Lebanonbeh, ngayime manbu pine kundulk, dja mak juniper dja cypress kundulk. Bu birrimekbe bininj kabirriyakwon rowk kore kabirrirurrkmarnbun, wanjh birriwarlahkenh bininj ngandibolkburlume kore ngaye ngahdi.
14Nawu mawahmawah bedberre bininj nawu ngundiwirrihme, nakka wanjh ngundimarneboddan kore kurrenge ngudberre. Bininj rowk nawu boyen ngundiyolyolmi kunwarrekenh wanjh kaluk kabirrimre dja ngundimarneboddan. Dja birrimekbe bininj wanjh kabirribolkmulewan bu Jerusalem wanjh nawu Yawey nuye kunredkimuk, dja mak kabirriyime bu Zion wanjh kunred nuye nawu nadjalkudji nadjalmak duninjh bedberre nawu Israel benkebmawahmeng.”
15“Ngudda wanjh kunkuyeng ngurridjaldi dja ngurrinjilngwarreni, dja minj nangale mak birrimrawinj bu ngundidjahwoyi. Dja mak bininj birriwern ngundidjalwirrihmi. Bolkkime wanjh ngaye ngeykimukwon ba bu ngudda dja nawu ngurrbenmawahme, wanjh ngurridjaldi kunnjilngmak dorrengh bu munguyh munguyh.
16Binihbininj kore kubolkbubuyika dja mak kings bedberre wanjh ngundinahnan, yiman kayime ngalbadjan kayawnahnan ngarre wurdyaw.
17Bu ngurridjalkarrme bronze, wanjh ngaye won gold. Dja bu ngurridjalkarrme iron, wanjh ngaye won ngudberre silver. Dja bu ngudda ngurridjalkarrme kundulk, wanjh ngaye won ngudberre wirlmurrng bronze. Bu ngurrikarrme djal manwarddewern, wanjh ngaye won ngudberre manbu iron. Ngaye won ngudberre ngardduk kunmodmikenh bu yiman ngunmarnewohrnan, dja mak ngaye won ngudberre ngardduk kundjalmak, ba bu yiman ngunmarnewohrnan mandjad duninjh.
18Bu kuhni ngayime, wanjh kunyid kadjalyakmen kore kubolkkimuk ngudberre. Dja minj mak ngurriyawoyhbolknan bu karurrkbakbakme kore ngurrihyo. Ngaye wanjh munguyh kukdjurruddi yiman kayime kawarnamyo ngudberre. Ngudda wanjh ngehke ngudberre, dja ngundidjalburlume.
19Ngaye nawu Yawey bolkwolkan ngudberre munguyh munguyh, dja nawu kundung dja dird, nakka bonj, ngaye ngadjalkudji bolkwolkan ngudberre kore kunbarnangarra dja mak kore kunkak.
20Minj manbu kundung kayawoyhyibme dja minj mak dird karrowen. Ngaye nawu Yawey ngadjalkudji bolkwolkan ngudberre munguyh munguyh. Dja minj mak ngurriyawoyhnjilngwarremen.
21Bu kuhni kayimerranj, wanjh ngudda ngurriwern bininj ngurridjalkurduyime kunmak, dja munguyh ngurriwernhbolkkarrme. Nahni ngardduk bininj rowk nawu ngaye ngabenmarnbom kunbidwi ngardduk, dja mak ngaye yiman ngamimdudji bedberre. Kuhni ngayimeng ba bu birriwarlahkenh bininj rowk wanjh ngaye ngandiburluburlume.
22Wanjh ngurriwernmerren dja mak ngurrimurrngrayekmen. Bininj ngudberre nawu birrimirndekudji, wanjh bedda kabirrimirndewernmerren duninjh. Bu kabolkyimerran kore ngaye ngayingkihkarremarnbom, wanjh werrkwerrk ngaye ngadjalkurduyime.”
