1Yerusɑlɛmu, ɑ seewo kpɑ ɑ n bɑllimɔ, domi yɑm bururɑm mu nun nɑɑwɑ. Nɛ, Yinni Gusunɔn yiiko yɑ nun wukiri.
2Wee yɑm wɔ̃kurɑ tem kɑ tɔn tukobu wukiri. Adɑmɑ wunɛ, nɛn yiiko yɑ nun yɑm bururɑsie nɡe sɔ̃ɔ.
3Bwesenu kɑ nin sinɑmbu bɑ koo nɑ bu sĩ yɑm bururɑm mɛ sɔɔ.
4A mɛɛrio ɑ kɑ sikerenɑ. Be kpuro bɑ mɛnnɑmɑ bɑ sisi wunɛn mi. Bɑ kɑ wunɛn bibu wee tontonden di, bɑ wɔndiɑbɑ bɛɛwɑ.
5À n bu wɑ bɑ wee, kɑɑ nuku dobu ko. Wunɛn ɡɔ̃ru ɡɑ koo dorɑ sɑnɑm mɛ bwesenu nu koo kɑ nun ɑrumɑni nɑɑwɑ sɑɑ nim wɔ̃kun ɡuru ɡiɔn di.
6Bɑ koo nɑwɑ kɑ yooyoo dɑbi dɑbiru Mɑdiɑnin di kɑ Efɑn di. Gɑbɑ koo mɑɑ nɑ Sebɑn di, bɑ n wurɑ kɑ turɑre sɔɔwɑ, kpɑ bɑ n nɛ, Yinni Gusunɔ tɔmɑmɔ.
7Bɑ koo nun Kedɑɑn yɑɑ sɑbenu mɛnnɑmɑ, kpɑ bu kɑ nun Nɛbɑyɔtun yɑ̃ɑ kinɛnu nɑɑwɑ ɑ kɑ nu yɑ̃kuru ko ni nu koo mɑn wɛ̃re, kpɑ n nɛn sɑ̃ɑ yeru bɛɛrɛ sosi n kere yellu.
8Mbɑ n wee mɛ, nɡe ɡuru wii wuroru, ǹ kun mɛ nɡe totobɛrɛ ni nu wee nin dirɔ.
9Wunɛn bibɑ bɑ wee tem mi n tomɑn di. Goo nimkuu bɑkɑsɑ su ɡbiɑ su kɑ bu sisi tontonden di, kɑ ben sii ɡeesu kɑ wurɑ bu kɑ mɑn bɛɛrɛ wɛ̃, nɛ, wunɛn Yinni Dɛɛro, nɛ wi nɑ nun wɔlle suɑ.
10Tɔn tukobɑ koo wunɛn ɡɑni seeyɑ, kpɑ ben sinɑmbu bu ko wunɛn yobu bu nun sɑ̃. Yellu, nɑ rɑɑ nun sɛɛyɑsiɑ kɑ mɔru, ɑdɑmɑ tɛ̃, nɛn durom sɔ̃, nɑ wunɛn wɔnwɔndu wɑ.
11Yerusɑlɛmu, wunɛn ɡbɑ̃rɑrun ɡɑmbobɑ bɑ ko n kɛniɑrewɑ bɑɑdommɑ. Bɑ ǹ bu kɛnumɔ sɔ̃ɔ sɔɔ kɑ wɔ̃kuru, kpɑ bwesenu kɑ nin sinɑmbu bu kɑ du bu nun dukiɑ wɛ̃.
12Domi bwese ni nu yinɑ nu nun sɑ̃ mi, nu koo ɡbiwɑ. Bɑ koo ni kpuro kpeerɑsiɑwɑ.
13Libɑnin bɛɛrɛ yɑ koo kpe, domi bɑ koo kɑ nun yen dɑ̃ɑ ɡeɑ nɑɑwɑ ye bɑ mɔ̀ sipɛrɛ kɑ oromu kɑ buyi, kpɑ bu kɑ nɛn sɑ̃ɑ yeru burɑru kuɑ, kpɑ n nɛn wɑ̃ɑ yeru bɛɛrɛ wɛ̃.
14Be bɑ rɑɑ nun dɑm dɔremɔ mi, ben bibɑ koo nɑ wunɛn wuswɑɑɔ bu tii kɑwɑ. Be bɑ rɑɑ mɑɑ nun yɑɑkoru mɔ̀, bɑ koo yiirɑ wunɛn wuswɑɑɔ bu nun sɑ̃, kpɑ bu nun soku Siɔni, Isirelibɑn Yinni Dɛɛron wuu.
15Wunɛ wi tɔmbu bɑ rɑɑ tusɑ bɑ deri, bɑ ku rɑ mɑɑ nɛ wunɛn mi, kon nun ko wuu burɔ sere kɑ bɑɑdommɑɔ, kpɑ ɑ n wunɛn tɔmbu nuku dobu wɛ̃ɛmɔ sere kɑ ben bibun bibɔ.
16Bwese tukunu kɑ nin sinɑmbu bɑ koo nun nɔɔri nɡe mɛ bii mɛro u rɑ win bii bɔm kɛ̃, kpɑ ɑ ɡiɑ mɑ nɛnɑ nɑ sɑ̃ɑ Gusunɔ Yɑkɔbun Yinni dɑmɡii wi u nun yɑkiɑ mɑ u nun fɑɑbɑ mɔ̀.
17Kon de wurɑ yu koorɑ mi sii ɡɑndɑ rɑɑ wɑ̃ɑ, sii ɡeesu mɑɑ mi sii wɔ̃kusu rɑɑ wɑ̃ɑ. Kon dɑ̃ɑ wunɑ n sii ɡɑndu kɔsire ko, kpɑ n kpenu wunɑ n sisu kɔsire ko. Kpɑ n de bu nun kpɑrɑ ɡem kɑ bɔri yɛndu sɔɔ.
18Sɑɑ ye sɔɔ, bɑ ǹ mɑɑ sɑnnɔsun dɑmu nɔɔmɔ wunɛn temɔ. Mɛyɑ bɑ ǹ mɑɑ mu wɔrimɔ bu mɛn yɑ̃nu ɡurɑ kpɑ bu mu deri bɑnsu. Domi kon nun kɔ̃su nɡe ɡbɑ̃rɑru, kpɑ ɑ mɑn siɑrɑ nɛn fɑɑbɑn sɔ̃.
19N ǹ mɑɑ sɔ̃ɔ u koo nun yɑm bururɑsiɑ sɔ̃ɔ sɔɔ. N ǹ mɑɑ suru u koo nun yɑm dɛɛrɑsiɑ wɔ̃kuru. Adɑmɑ nɛ, Yinni Gusunɔwɑ ko nɑ n nun yɑm bururɑsie sere kɑ bɑɑdommɑɔ, kpɑ ɑ bɛɛrɛ wɑ nɛn sɔ̃.
20Wunɛn nuku sɑnkirɑnu kpuro nu koo doonɑ. Domi nɛ, Yinni Gusunɔwɑ ko nɑ n nun yɑm bururɑsie sere kɑ bɑɑdommɑɔ. Sɔ̃ɔ u rɑ du, suru rɑ mɑɑ wɔ̃kuru ko, ɑdɑmɑ nɛn yɑm bururɑm mɛ, mu ku rɑ kpe.
21Wunɛn tɔmbu kpuro bɑ ko n sɑ̃ɑwɑ ɡemɡibu, kpɑ bɑ n tem mɛ mɔ sere kɑ bɑɑdommɑɔ. Nɑ bu ɡirɑwɑ nɡe dɑ̃ɑ kɑ̃ɑsɑ. Bɑ sɑ̃ɑwɑ be nɑ tɑkɑ kuɑ bu kɑ nɛn kpɑ̃ɑru sɔ̃ɔsi.
22Bwese kɛrɑ ye yɑ piiburu bo, yɑ koo ko bwese bɑkɑ dɑmɡirun nuuru. Nɛ, Yinni Gusunɔwɑ kon ye ko fuuku yen sɑɑ yɑ̀ n turɑ.
