1Alatala ito nan falaxi, a naxa, “Ɛ kiti kɛndɛn sa, ɛ tinxinyaan liga, amasɔtɔ n ma marakisin bata maso n ma tinxinyaan makɛnɛnmatɔɔn ni i ra.
2Sɛwan na kanna xa naxan na ligama, adamadiin naxan na suxuma, a yi Matabu Lɔxɔn binya, a mi a rayelefu, a yi a yiin ba fe ɲaxin birin yi.”
3Xɔɲɛn naxan findima Alatala gbeen na, na nama a fala, a naxa, “Alatala n bama nɛn a yamaan yɛ!” Hanma xɛmɛ tɛgɛnna yi a fala, a naxa, “Wudi xaren nan tun n tan na!”
4Amasɔtɔ Alatala ito nan falaxi, a naxa, “Naxanye n ma Matabu Lɔxɔn binyama e yi n nafan feen sugandi, e lu n ma layirin bun ki faɲi,
5n yirena nde luma nɛn e xa n Batu Banxin nun a yinna kui, n yi e xinle sɛbɛ mɛnni alogo ɲinan nama ti e xɔn. Na tɔnɔna e ma dangu dii xɛmɛne nun dii tɛmɛne ra. N xinla naxan fima e ma, na luma nɛn habadan, sese mi a bɛ na.
6Xɔɲɛn naxanye findixi Alatala gbeen na, alogo e xa a batu, Alatala xinla rafan naxanye ma, naxanye birin Matabu Lɔxɔn binyama, e mi a rayelefu, e lu n ma layirin bun ki faɲi,
7n ne xalima nɛn n ma geya sariɲanxin fari, n yi e rasɛwa n xinla maxandi banxini. E saraxa gan daxine nun e saraxane rasuxuma nɛn n ma saraxa ganden fari, amasɔtɔ n ma banxin xili bama nɛn, Ala maxandi banxina siyane birin xa.”
8Marigina Alatalaa falan ni ito ra, a tan naxan Isirayila muxu suxine malanma, a naxa, “N bata ndee malan, n mɔn gbɛtɛye malanma nɛn sa ne fari.”
9Ɛ tan burunna subene, ɛ tan fɔtɔn yi subene, ɛ fa ɛ dɛge!
10Isirayila xun makantanne bata findi danxutɔne ra, e mi sese kolon, e bata findi bare bobone ra, naxanye mi nɔɛ wonwonɲɛ. E luma saxi nɛn, e lu xiye sɛ, xixɔnla yi rafan e ma.
11Barene nan ne ra naxanye seni bɔma, naxanye mi wasama mumɛ! Xuruse rabane nan ne ra naxanye mi sese famuma. E birin sigama e gbee kiraan nan xɔn. Birin biraxi a yɛtɛ tɔnɔn nan fɔxɔ ra.
12E naxa, “Ɛ fa, nxu xa sa dɔlɔn fen! En dɔlɔn min han en xunna yi keli! Tila fan luma nɛn alo to, bayo a gbegbe mɔn luxi.”
