1Kuhni nawu Yawey kabenmarneyime nuye bininj, “Ngurridjalkurduyimen kore mandjadkenh, dja mak kore kunmakkenh. Kaluk darnkih kabolkyime kore ngaye wanjh ngamre ngehke ngudberre dja kuhni kandinan ngaye nawu ngadjalmak duninjh.
2Bininj nawu kuhni munguyh kadjalkurduyime wanjh ngaye ngamarnekurduyime kunmak nuye. Namekbe bininj kawernhburrbun manbu kunbarnangarra Sabbath ngardduk, dja minj kawarrewon mahni kunbarnangarra, dja mak minj kunwarre kakurduyime.”
3“Bininj nawu kumwam birriraworrinj ngardduk bininj wanjh yuwn bu kayime, ‘Aba, nawu Yawey minj kanbawon ngaye be ngarriraworren nuye bininj!’ Dja bininj nawu bindikornamdadjkeng dja wurdyawyak, wanjh nakka yuwn bu kabirriyime, ‘Aba, ngaye ngawarre, dja minj ngabenkebmawahme!’
4Kuhni nawu ngaye Yawey ngayime birrimekbe bininj: Ngudda nawu ngundikornamdadjkeng, bu ngurriwernhburrbun ngardduk Sabbath kunbarnangarra, dja mak bu ngurridjalkurduyime kore ngaye ngadjare, dja mak ngurriwernhkarrme kore ngaye ngawokkurrmerren,
5wanjh ngaye ngeykimukwon ngudberre kore ngardduk Temple ba bu bininj ngundingeyburrbun munguyh. Kuhni wanjh kunkimuk, dja bu ngurrbenkebmawahme wanjh djal kunyahwurd! Ngaye ngeywon ngudberre kunngey manbu minj munguyh kayakmen.”
6Nawu Yawey kabenyolyolme birribuyika bininj, kayime, “Ngaye ngadjare bininj kabirrimre kore ngaye. Nawu birridjenbubuyika bininj, bu bedda kabirrikurrmerren kore ngaye, dja kabirridjare ngandimarnedurrkmirri dja ngandimarnedi yiwarrudj, dja bu bedda ngandingeyburlume dja ngandimarneboddan,
7wanjh kamak. Ngaye ngabenkan kore kuwarddekimuk kubolkdjamun ngardduk. Dja mak ngaye ngakimang kore kunrurrk ngardduk manbu yiwarrudjkenh dja ngabennjilngmarnbun kumekbe. Bedda wanjh ngandiwon namakmak, dja ngandimarnekinje mayh kore altar ngardduk, wanjh ngaye nganjilngmakmen bedberre. Kuhni ngayime dja ngadjare birriwarlahkenh bininj kabirrimre kubolkbubuyikabeh kore ngardduk kunrurrk ba bu bedda rowk kabirridi yiwarrudj.
8Ngaye nawu Yawey dja ngadjalworhran rowk. Wanjh ngayolyolmerren bu ngaye ngabenmirndemang bininj nawu Israel benkebmawahmeng kore kubolkbubuyika birribebbehdi. Kaluk ngaye ngabenmirndemang birribuyika bininj warridj dja ngabenkurrme bu kabirridjarrkmirndewernmerren nawu korroko birrimirnderri.” Kuhni rowk nawu Yawey kayime.
9Nawu Yawey yimeng, “Ngudda mayh nabang nawu ngurrikang kabbal dja mak nawu ngurriyo kore manberrk, wanjh ngurrimray, ngurrbenbaye nahni bininj.
10Nawu bininj ngabenkurrmeng ba bu kabindinahnan birribuyika ngardduk bininj rowk wanjh yiman kayime kabirrimimdubbe, dja kabirrimayaliyak. Bedda yiman kayime duruk nawu wokyak, dja kabirridjaldjare kabirribukirrinan dja kabirridjalkodjkeyo munguyh.
11Bedda wanjh yiman kayime duruk nawu kabirridjalngun munguyh dja minj kabirriworrhmiworren. Dja mak bedda yiman kayime birrimayaliyak shepherds nawu kabirridjalnahnarren kore djal bedmanwi.
12Bedda yiman kayime kabirribebbehkayhme, ‘Mah! Karrire karribomang manbang ba bu karribongubongun manbowern. Yoh, bolkkime kamak, kaluk malaywi wanjh kawernhmak!”’
