Aisaia 56

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Genuai Bidigo te po wali, “Dage eno we bidi dabe, odao. Eno dagebolo te eno bomai po polobadu mawai dao. Tama eno dage dali te sesemane elaluabo po me dąų walai dao. Dagego te po si bugagia wali peyu, te wiegi yai doloba pai kolesaga naga iyąo, magi baso meni, te eno dage tau selama, ma sabo sogo, te pąba pedelai dao. Awe, dagego eno doloba pai kolesaga ebo tamadi sueibao.

²Te we bidi dabego wiegi yai doloba pai kolesaga wali peyu, te Sabat sogode bomo yai po bugagia wali peyu, te dwai kolesaga isąbo we bidi, augwa wiegi yai pemene yao. Eno augwaliba wiegi yai sę yaibao,” Genuai Bidigo te po wali.

³Te gasa tǫ kantri we bidi dabe augwaligo te agai po wali pabo homu dąų olama, te Genuai Bidigo we bidi dali bidali, augwade digi te tiwai po wagio, “Te Genuai Bidigo da te agai we bidi dabe dali bidimainu me iligobeo.” Augwaligo te tiwai po wagio. Te augwaligo aga domo diani bidi, agai te tama homu me elamuo, “Te ena wai meniama, te ena nogi meni yaibao,” wagio. “Ena te sasia pai ni me deli tiwai da,” homu igio. Menio.

⁴Genuai Bidigo te tiwai po wali, “Te tobage tiwai bidi dabego te Sabat side bomo yai po wali peyu, te eno godolo homu ebo kolesaga wali peyu, te eno ena we bidi dabe dąų wali bomai po tigidali wali pobaso da,

⁵teda eno te dąį me deli tiwai te augwaligo nogi te eno tempel be tomode muai elalueibao. Tama sesemane sogo te we bidi dabego sulama, te augwali homu koneaibao. Te augwaligo genuai nogigo te wai dabe ame nai elaluali bidi dabego nogi aiyaba mu elalueibao. Te eno augwali nogi mu silimainogo me iligobeo,” wali.

⁶“Te gasa tǫ kantri we bidi dabe augwaligo te eno po wali pabo homu dąų olama, te eno we bidi dali bidalubo, te augwali ena dologoba aselama, te ena godolo homu mu elama, te enabolo lotu po weyu, te Sabat side bomo yai po wali peyu, tama te eno we bidi dali po dąų wali po tigidali te wali pali da,

⁷augwa wiegi yai yaibao. Te eno bulu du Saionba te augwali eno odasa paibao, te augwali eno bede bidiyu, wiegi yai pemene yaibao. Te augwa te siago tigidali domainu ebo ofa dabe eyu, te gasa tobage ofa dabe eno altade yaibao. Te eno augwaligo ebo ofa godolo homu yaibao, magi baso meni, eno be da te tigidali bulu tǫ kantri we bidi aselama, te enaba gedu haluasa wagasabo be elalubo dao.”

⁸“Ena God, Genuai Bidi, eno te Israel we bidi ma sisinibao, te boi bidi dabego sela pelama, kalabus igi pai, eno te tiwai po obao. Te eno gasa we bidi dabe me selama, te eno sisinani hani we bidi dali bidimainogo odasa asaibao,” te po wai dao.

⁹Te Israel polalubo bidi dabego te we bidi dabe bugagia me tonalusiąbaso, te Genuai Bidigo te po wai, “Asiąo, dage boi bidi dabe. Dage te uni hasa dabe te bulu du buside bidalubo asiąo,” wai. “Dage aselama, te Israel polalubo bidi dabe dolagasao. Te polalubo bidi dabego te tǫ kantri dwai sęgo elalagasainu ebo po te we bidi dabeba wabo sę elalubao. Tiali goli, augwa sę bugagia me ebeo. Menio. Augwali te gedu widai bage tiwai te taun tauade te boi bidi asobo tonalubo tiwai bidali. Tama augwali te pedauwali pania sai yowi tiwai te nai wi sabo bidi asobode gągą wabo usu isąwai bidali. Te augwa tobolude dwasianu kolesaga me elalubeo.

¹¹Augwali te nai hauwa tuabo homu ebo yowi tiwai bidali, te dwasianu pągąsiąbo ąǫ yai. Augwali te sipsip tonalubo bidigo aga sę ebo konesiąbo tiwai yali. Deli deligo te augwa homu wali pelama, te aga tau sabo nai naga homu koneai dao.

¹²Te augwali sisinibo sogo, augwali mebago te tiwai po wali, ‘Ae, tegobao, eno te wain ąį selama, te da tųdu pelama, te dena godolo yaliba usu nigi paibao. Te do da wabo sogo, da ma sisinama, te umabo mu ma tueibao,’ wabo dao.”