Isaias 56

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Iyan heini egkeǥiyen te Nengazen: “Ipeehè niw is hustu he kukuman wey veeli niw is metazeng, su kenè en egkeuǥet edlibriyen ku en sikiyu wey egkeehè niw is ketazeng ku.

²Utew zeysey is etew he ebaal wey edtuman te ebpeveelan ku zutun te Andew te Kedhimeley. Wey zeyzey zaan is etew he wazà mebaal te mezaat.”

³Is kenà menge Israilihanen he mibpeveyveyaan dan is untung dan te Nengazen, kenà ereg he ed-isip he kenà sikandan idtampu te Nengazen te menge etew zin. Ne is menge etew he migkapun ne kenà daan ereg he ed-isipen he tenged te kenà sikandan ebpekaanak, kenà sikandan egkehimu he zuma te menge etew te Megbevayà.

⁴Su iyan heini egkeǥiyen te Nengazen: “Edtuvazan ku is migkapun he menge etew he edtuman te ebpeveelan ku mehitenged te Andew te Kedhimeley, wey ebaal te menge vaal he ebpekelipey kediey wey edtuman te kebpekid-uyun ku.

⁵Edtuǥutan ku sikandan te kedseled diyà te valey ku ne ebeǥayan ku sikandan te zengeg he lavew pa te zengeg he egkezawat dan emun duen dan menge anak. Kenà sikandan egkelipatan te menge etew te taman te taman.

⁶“Edtuvazan ku zaan is kenà menge Israilihanen he insarig dan kediey is untung dan su edsilbiyan e zan, ebmahalen e zan, wey ed-ezapen e zan, ne edtumanen dan is menge ibpetuman ku zutun te Andew te Kedhimeley, wey edtumanen dan is kebpekid-uyun ku.

⁷Ed-uwiten ku sikandan diyà te segradu he vuvungan ku, ne edlipayen ku sikandan diyà te valey ku he elempuanan. Edewaten ku ziyà te pemuhatà he para kediey is menge pemuhat dan he edtutungen wey zuma pa he menge pemuhat; su is baley ku egngezanan te valey he elempuanan te menge etew ziyà te langun he menge nasyun.”

⁸Migkaǥi zaan is Nengazen he MEGBEVAYÀ he midtiǥum te menge vinihag he menge Israilihanen te, “Edtiǥumen ku pa is duma, gawas duen te zaan en he netiǥum ku.”

⁹Uvey kew is menge etew ziyà te menge nasyun he iring kemesipala te menge langgam, ne dèdeeti niw is menge etew ziyà te Israel.

¹⁰Su is menge pengulu zan he iyan pezem impevantey kayi he nasyun, henduen be te menge lakap wey wazè dan ketau. Iring sikandan te menge perevantey he asu he emew he kenà ebpekeǥevu. Iyan dà egkesuatan dan is kedleku, kedlipezeng, wey kebpeneǥeinep.

¹¹Iring sikandan te leǥezen he menge asu he kenà egkepezaan. Menge perevantey sikandan te Israel he wazè dan kedsavut. Is kada sevaha kandan mibpenigudu en mebaal te egkesuatan din te ebaal ne iyan dà edtinguhaan din is kandin dà he keupiyaanan.

¹²Ke sikandan te, “Hendini kew, su egkuwa kiw te inumen ne ebpelelangut kiw! Iring ded kayi is ed-ul-ulahan tew keeselem, ne edhimuwen tew he edhuna pa he zekelà is egkeinum tew!”