Isaias 27

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Dutun he timpu, egemiten te Nengazen is meǥarang wey mekeǥeǥehem he ispada zin te kedhimatey te Leviatan, kes edlayewlayew he langgam diyà te zaǥat.

²Dutun daan he timpu, egkanta kew mehitenged te zekelà he sebpet he egkekuwa niw ziyà te pemuleey niw te paras.

³Iyan a, is Nengazen, mid-etiman keniyan he pemuleey te paras. Layun ku heini ebinyaǥi. Ebentayan ku heini te maandew wey mezukilem su para wazà ebpekezezaat kayi.

⁴Naawè en is pauk ku kayi he pemuleey. Piru emun duen egkeehè ku ziyà te kandin he zuǥiyen he zezeisey he menge kayu, egkuntedahan ku sikandin ne ebinsulan ku.

⁵Piru egkelibri sikandin emun ebpekid-emiǥu sikandin kediey, ne edhangyù he pengelangi ku.

⁶Egkeuma is timpu he zutun is menge tig-Israel, he menge kevuwazan ni Jacob, ebpendalid iring te pinemula. Ebpeneringsing heini wey ebpengevukad. Ebpemeǥas heini te mahabet ne ebpekeeneb te tivuuk he kelibutan.

⁷Wazà siluti wey wazà penhimetayi te Nengazen is menge tig-Israel iring te kedsiluti zin wey kebpenhimetayi zin te menge kuntada zan.

⁸Impevihag te Nengazen is menge etew zin su iyan silut din kandan. Midsegseg din sikandan pinaaǥi te kegkesuǥata kandan te mevendes he keramag he ebpuun te edsilaan.

⁹Wey zà sikandan egkepesaylu emun edrupeten dan is menge vatu he pemuhatè dan, ne ebekbeken dan heini, wey id-awè dan is menge tukud he simbulu te ed-ezapen he si Ashera, wey is menge pemuhatà he edtutungan dan te veyewà.

¹⁰Nevengkag en is inged he neliǥuy te verengbeng. Nehimu en heini he mekevulungbulung iring te sibsivayan, ne wazè en ed-ubpà kayi. Nehimu zà heini he penebtavà wey himelayà te menge vaka. Ed-eminen edtebtava te menge vaka is menge zahun te menge subpang.

¹¹Ne hein nengeǥangu en haazà is menge subpang ne nengevadtì heini, ne ed-em-emuren te menge vahi su wey iketavun. Su is menge etew kayi he inged ne wazè dan kedsavut, kenà sikandan egkehizuwan te Megbevayà he mibaal kandan.

¹²Emun egkeume en haazà, edtiǥumen te Nengazen is menge Israilihanen puun te Wahig he Eufrates taman te zal-ug te Ehipto he iring te kedtiǥum te ginunas he trigu.

¹³Dutun he timpu ibpezaǥing is mezaǥing he vudyung. Ne ebpemenlikù diyà te Jerusalem is menge Israilihanen he nekaantus te kegkevihaǥa kandan diyà te Asiria wey Ehipto. Ne ed-ezapen dan is Nengazen, diyà te segradu he vuvungan diyà te Jerusalem.