1मेको नाक्ती परमप्रभु यावेमी आ हिंचा ङा, ठेयब नु सक्ति पाइश्शो तरवारमी खेदा पना पन लेव्याथन माइश्शो बुस्स कली सजाइ गेब। ग्रेशा गाक्ब बुस्स लेव्याथन नु समुन्द्रम बाक्ब ठेयब जन्तु कली साइक्ब। भजन संग्रह ७४:१४
2मिनु मेको नाक्ती “नेल्ल क्येङा रिम्शो अङगुर रू का बाक्ब” दे कुम्सो पने। यसैया ५:१-७
3गो, परमप्रभु यावेमी मेको कली गेना हना यो कोव़शा, ब्वाक्कु लुक्नुङ। मरिम्शो मदुम्ल, दे गो मेको कली नाक्दो नाक्ती कोव़नुङ।
4गो मगाइक्नुङ। चू चोंक वाम हना, गो मेको आन कली लडाइ तोशो खोदेंशो पा, तुल्शा चोङमी वा।
5मोदेंशो मदुम्त हना, मेको गो नु गारशा, आं कली वारच सेल्ब। आं कली वारच सेल्ब।
6मिनु नोले ङा नाक्तीमी याकूबम आ शाक्श थोक्ब। इस्राएल फू बोइश्शा, नक राशी दाप्ब। मिनु रागी नेल्ल मेको आन फल फुलमी ब्रीब।
7मार, परमप्रभुमी आ कली तुप्ब आन कली तुप्शो खोदेंशो पा मेको आन कली यो तुप्बा? परमप्रभुम आ कली साइक्ब आन कली साइश्शो खोदेंशो पा मेको यो साइक्चा पुंइसमा? येरमीया ३०:११
8ग्याइश्शा लाइक्चा पुंइसीशो रागी रे ग्रुंइशो मुर नु लडाइ पाइतीनी। परमप्रभुमी मेको आन कली मुइश्शा, पूर्ब ङा फश पवानु, ठेयब फश गिवारमी योल्पाइक्ब।
9मोपतीके मेको रे पा याकूब आ मुर आन दोस क्याम्सीब। मेको आन पाप पशो आ पर्बम मो पचा पुंइसीशो बाक्तेक्म। मेकोमी चढ़ेतीके ङा फुल्लु खरी खोदेंशो पा फस सेल्ब। मिनु मूर्ति पाइश्शो थाम नु धूप चोशा चढ़ेतीक काइ मलीपाइक्ब। लेवी २६:३०
10मारदे हना गारो हिरशो सहर मुर मबाक्तीके दुम्त। मेकेर गोरशो रागी खोदेंशो पा मुर मबाक्नीम। मेकेर बाछा जोशा नांइसीनीम। मिनु आ राशी ब्वाइनीम।
11मिनु मेको आ राशी सोव़शा, जिक्नीम। मिनु मीश मुरपुकी जाक्शा, चोचा कली शी खुप्नीम। मारदे हना मेकोपुकी रुप्तीक मपाइश्शो थर ङा मुर बाक्नीम। मोपतीके मेको आन कली सेल्बमी मेको आन कली शिशी मपाइब। येरमीया ४:२२; ब्यवस्था ३२:१८
12मिनु मेको नाक्ती परमप्रभु यावेमी युफ्रेटीस खोला रे इजीप्त ङा ब्वाक्कु मबाक्शो खोला सम्म अन्न तुप्ब। गे इस्राएल ङा मुरपुकी का का पा खुप्चा पुंइसीनीनी।
13मेको नाक्ती ठेयब तुराही का ग्रीब। मिनु अस्सुर रागीम जाम्शो नु इजीप्त रागीम खेदा पचा पुंइसीशो मुरपुकी जाक्नीम। मिनु यरूसलेम ङा परमप्रभु यावे आ डांडामी आ कली ठेयब सेल्नीम। यसैया ११:११-१२; योएल ३:५
