Isaiah 57

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Bu birrimak bininj kabirriyakmen, yiddok ngurridjawarren bu njalekenh? Burrkyak. Bininj nawu birrikongiwern wanjh God kabenkan kore kunwarre yak. Dja minj nangale kamenmenbekkan bu njalekenh.

²Bininj nawu kabirridjalkurduyime kunmak, wanjh kabirringimen kore kunmodmikenh. Bedda kabirridowe dja kunmekbe kabirringehme.

³Wanjh God nawu Yawey kayime, “Ngudda nawu ngurridjalkurduyime kunwarre, wanjh ngurrimray! Ngudda nawu ngurrikurdang, dja ngudda nawu ngurrikadjurren daluk dja bininj kore kunwarrekenh, dja mak ngudda nawu ngurridjalwarre bininj nawu bininj ngundiweykan kore kunwarrekenh.

⁴Nangale ngurridjekmiwong, dja nangale ngurribodmekenhwong, dja mak nangale ngurrimarnedjenwelhme bu ngurrimarneyime kunwarre? Ngudda wanjh ngurrikurrehkurren dja mak ngurriwokburriwe nawu God.

⁵Munguyh ngudda ngurriwurlhme bu ngurridjaldjare kunwarre, dja ngurridjirdmarren dja ngurriyo darnkih kore idols kabirridjabdi. Ngudda ngurrbenbun wurdwurd bu ngurrimarneboddan nawu idols ngudberre, kuhri kuhri ngurrikurduyime.

⁶Ngudda ngurrikolung kanjdji kore kuwarddebarrarn dja ngurrimoyhmang kuwardde manbu mankilehkileh, dja ngurrikan ngurrimarnbun idols. Nakka wanjh ngudda ngudberre gods. Woybukkih ngudda ngurrbenmarneyakarrbom manbomak, dja ngurrbenmarnekurrmeng manme. Kuhni rowk ngurriyime, dja baleh ngudda ngurriyime, yiddok ngaye makwan ngudberre? Burrkyak.

⁷Ngudda ngurriwarddebidbom kaddum duninjh kore kurrulum ba bu ngurridjirdmarren bininj dja daluk. Kumekbe warridj ngurrbenwoni njalenjale kore idols ngudberre.

⁸Dja ngaye ngaburrbun kore kurehred ngudberre ngurribimbarnnameng nawarre bim nawu idols bimbuyindi. Ngaye kandibawon dja ngurringalkerren bininj dja daluk bu ngurridaremerren, wanjh ngurrimadjyerrkerren kore manbalabala ba bu ngurrikuknarren.

⁹Dja mak ngurribarurren manbu oil, dja mak manbu mankalkkidmanjmak, dja ngurrire ngurrimarneboddan kore Molech, nawu idol ngudberreyh. Ngudda wanjh munguyh ngurriyawayawan nakerrnge nawu idols, ngurriyawan djarreh kore kubolkbubuyika, dja mak ngurriyawan kanjdji kurorre kore kundowikenh.

¹⁰Kuhni ngurriyimi, dja wanjh ngurringudjyakworrinj. Dja minj ngurrikayhmeninj ‘Bonj, karribarabom!’ Ngudda ngurringudjworrinj dja minj mak ngurribawoyi.”

¹¹“Nangale ngurrkengeme kunkimuk ba bu ngaye Yawey kankoweng? Ngudda wanjh kandidjalbengmidjdanj dja minj kandiyawoyhburrbuyinj. Minj mak ngurriburrbuyinj kore kukange ngudberre. Yiddok ngaye ngadjalwokyakniwirrinj bu kunkuyeng? Yiddok kuhnikenh bu minj kandikengeme ngaye?

¹²Wanjh bolkkime ngaye djadme ngudberre kore kurobbe. Ngaye rohrokme ngudberre kore baleh ngurriyime kunmakkenh ngudberre, dja kore baleh yiman ngurrikurduyime, dja bonj, ngaye wanjh warrewan ngudberre.

¹³Bu kandimarnekayhme dja kandimarrkdjawan bu ngaye bidyikarrme, wanjh ngaye marneyime kunubewu nawu nawern idols ngudberre ngundibidyikarrme?, Dja burrkyak! Kunmayorrk kabenkan djarreh. Kunmayorrk kunyahwurd wanjh kabenkukburriwe. Dja bininj nawu ngandiwoybukwon ngaye, wanjh kabirridjaldarrkid dja ngandimarneboddan kore Temple ngardduk.” Kuhni rowk yimeng God nawu Yawey.

¹⁴Nawu Yawey kayime, “Ngadjare ngardduk bininj kabirrimre kore ngaye, dja minj njale kabendabke. Ngurriyingkihbolhmarnbu.

¹⁵Ngaye Yawey ngawohrnawohrnan rowk. Ngaye wanjh ngadjalmak God duninjh, dja ngaye ngadjaldarrkid munguyh munguyh. Ngahdi kore kubolkdjamun kaddum heaven, dja mak ngaye ngahdi kukange bedberre bininj nawu kabirriwarnyakmulewarren kore kunwarre, dja minj bedman kabirriburlumerren. Ngaye wanjh ngabenkangemarnbun dja ngabennjilngmarnbun ba bu minj kabirrimarrkbaworren.

¹⁶Ngaye kerrngehkenh ngabenngolekwong nawu bininj ngardduk dja minj ngadjare bu ngabenkangewarrewon bedberre. Kunmekbekenh kunu minj ngaye munguyh ngabendung dja ngabenwidjdjung bedberre.

¹⁷Bedda woybukkih birriyimi kunwarre kore birridedjwarlahworrinj. Wanjh ngaye ngayidduy dja ngakebborledkerrinj bedberre. Ngabenbuni dja bedda birridjalkurduyimi kunwarre.

¹⁸Ngaye ngabenkurdunang dja ngaye ngaye ngadjaldjare bu ngabenmarnbun. Ngaye wanjh ngabenkan kore kunmakkenh dja ngabenbidyikarrme. Dja mak ngaye ngabenkangemarnbun nawu kabirrikangewarre.

¹⁹Bu kuhni ngayime, wanjh birrimekbe bininj nawu Israel benkebmawahmeng ngandiburluburlume. Ngaye ngabenwon kunmodmikenh ngardduk bedberre nawu darnkih kabirrihni dja mak nawu djarreh.

²⁰Dja nawu birriwarre bininj, bedda yiman kurrula bu kunmayorrk kabobidbuyhwe, kundjulng kanjdjibeh dorrengh. Bedda minj kabirringehme.

²¹Dja ngaye nawu Yawey ngayime bu nawu birriwarre bininj minj kabirrimang kunmodmikenh ngardduk.”