ESAII 57

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Bɛ̀ɛ̀ wetí bɛɛ̀ kɔ̃ mbɑ́ òmɔù í dɑkɛ, kɛ̀ bɛnìtìbɛ̀ mɔ́mmɔmbɛ duò kɛ̀ bɛ̀ bùútóo, bɛsɑ̀ɑ̀bɛ̀ kɔ̃ mbɑ́ òmɔù í dɑkɛ.

²Bɛ̀ tɑtimu diwɛ̀ì miɛkɛ, bɛ̀ɛ̀ tũ timɔ́mmɔnti bɛ̀ yóó duɔ́mu kɛ́om̀pɛ̀.

³Díndi onitipòkù wèè nɑ̀ɑ́ nKuyie mpɑ̃ɑ̃nɑ́ɑǹtì o kó ibí kɔtɛnɛ̀ní diɛ̀, díndi fɛyɑnfɛ̀ fɛ̀ɛ̀ n yóu kɛ tũntì tũntì yɛbɔkɛ̀.

⁴Wennì nwe di dɑúmɛ̀? We nkpɛ́í nkɛ di entímɛ̀? Di pɛ́rímúnɛ̀ we inɔ́ndiɛ? Di mɛ̀nkɛ tú itookperí yɛmbɛ̀ mbɛɑ̀? Siyɑ́ɑ̀bìsí yɛmbɛ̀ kó fɛyɑnfɑ̀ɑ̀?

⁵Díndi bɛ̀ɛ̀ dɔunɛ̀ ditɔbɛ̀ dɛtie diɛrɛ̀ yɔ, díndi bɛ̀ɛ̀ kɑ̀tì dɛbɔɔtie nkó mɛdɛ́ɛ̀, díndi bɛ̀ɛ̀ feu ibí tidúótì miɛkɛ, díndi bɛ̀ɛ̀ feu ibí titɑ̃dèntì miɛkɛ.

⁶Kɛ tóú ikó nkó yɛtɑ̃́ɑnniyɛ, kɛ dɔɔri yɛbɔkɛ̀, kɛ yɛ̀ cou mɛnɑɑ̀ kɛ yɛ̀ pɑ̃ɑ̃ ntidiitì kó yɛpɑ̃rɛ̀, dɛndɛ bo n nɑrikɑɑ̀?

⁷Ditɑ̃diɛrì ĩ́nkɛ̀ nkɛ di wɑɑ̀mmɛ̀ di dúɔ̀ kɛ dɔunɛ̀ ditɔbɛ̀, kɛ dɛ ndekù kɛ feu iwũɔ̃.

⁸Kɛ nuu ndi bɔkɛ̀ di bòrɛ̀ kɛ diri yɛtɛyɛ̀ di ɑ́nnùduotí, kɛ m bùtínnɛ́ kɛ dɛì di yɑ̀ɑ̀tì kɛ dekù kɛ pɛ̃kùnko di dúɔ̀, kɛ̀ bɛ̀ di dɔunɛ̀ kɛ pɛ́u mucɔ̃́ntimu, kɛ̀ di dɔ́ bɛ̀ ndi dɔunɛ̀ kɛ̀ di yɑu bɛ fɛi.

⁹Kɛ tɔu mɛkùɔ̀ mpɛ́u kɛ kɔ̀tɛnɛ̀ okpɑ̀ɑ̀tì diɛwè borɛ̀, kɛ kpèé mɛkùɔ̀ nfɔ̃ɔ̃mɛ kɛ toú mbɛnìtìbɛ̀ kɛ bɛ̀ tɔ̃nnɛ̀ dɛdɛ́tirɛ̀, kɛ bɛ̀ tɑnnɛ́ kudɔnkù.

¹⁰Di tũ̀nnɛ dɛ kó icɛ kɛ ɔ̀u di mɛ nyí bɑntɛ́ dɛ̀ tumɛ̀ dɛtetìrɛ̀, kɛ kpɑɑ́ mɔkɛ muwɛ̃rímú, bɑ́ di í ɔ̀u.

¹¹Di do yĩɛ̃kù we? Di do yɔ̀tɛ we kɛ́nɑ́kɛ́ siyɑ́ɑ̀bìsí, bɑ́ di tɛ̃́nkɛ í dèntɛní n kpɛ́í, bɑ́ di í dɑ̀ɑ̀tɛ n kpɛ́í? N do nyuo nwe, n cĩ́ɛ̃́kɛ́ kɛ̀ dɛ̀ mɔ̀ntɛmu dɛɛ̀ te kɛ̀ di í n dé.

¹²Di yɛ̀mmɛ̀ dò ndi í cɑ̀kɛmu, kɛ̀ n nɛ́ yóó di dɑɑ́, nkɛ̀ di tɔ̃mmú nɑɑ́ dɛtetìrɛ̀.

¹³Di bo kuɔ́ ndìì mɔ̀nnì, di bɔkɛ̀ yɛ̀ɛ̀ di murí yɛ̀ bo di dɛɛtɑ́ɑ̀? Kuyɑɑkù kuù yóó yɛ̀ nɛinɛ̀ yɛmɔu, m bo yɛ̀ fùùtɛ muyɑɑ́, bɛ̀ɛ̀ n duɔ́ mbɛmɑ́ɑ̀ bɛɛ̀ yóó tiekɛ dihɛì, bɛɛ̀ yóó kɑri n tɑ̃sɑ̀ɑ̀rì.

¹⁴Kɛ̀ ti Yiɛ̀ nKuyie mbɛ́i nkɛ dɔ̀: Ɛnnɛnɛ̀ kucɛ, tũntɛnɛ̀ ku, dɛitɛnɛ̀ mɛbétímɛ̀ mɛmɔu n nìtìbɛ̀ kó kucɛ miɛkɛ.

¹⁵Ntɛ Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ kɛ bo sɑ̃́ɑ̃̀, kùù yètìrì tu kpɑ mɛyɛi nhò tu mù: N kɑ̀rì bo kɛĩ́nkɛ̀ nkɛ kɛ̀ n dò mpɑ́í pɑ́í, kɛ nɛ́ bonɛ̀ wèè bo mɛyɛǹcɑɑ̀rìmɛ̀ miɛkɛ, kòo yɛ̀mmɛ̀ cɑ̀ɑ̀rɛ̀ m mɛ̀ cɑ́tìnnɛ, kɛ nɑ́ríkùnnɛ wèè bo mɛhɑ́ɑ́rìmɛ̀ miɛkɛ o kɔ̃mɛ.

¹⁶N yí yó nhɑ̃ kɛ di sɛ́í, m miɛkɛ í yó nhɑ̃ kɛ di cɔ́ú, kɛ̀ dɛ̀ í dò mmɛmmɛ yɛnitiwɛ̃rɛ̀ bo kú, bɛmbɛ n dɔ̀ɔ̀ bɛ̀.

¹⁷Isidɑyɛɛribɛ kó mɛyetímɛ̀ mɛɛ̀ do te kɛ̀ m miɛkɛɛ bɛ̀ yɛ̀ dimɔ̀nnì sɑ́m̀pɔ́rì miɛkɛ, kɛ̀ m bɛ̀ potɛ́ kɛ́ bɛ̀ bùtínnɛ́ kɛ̀ bɛ̀ mɛ mbɑɑ ncĩ́ɛ̃́kɛ́ kɛ́kpénkùnnɛ bɛ to, kɛ́ntũ bɛ̀ dɔ́ ìì cɛ.

¹⁸M bɑntɛ́mu bɛ cɛ imɔu, n nɛ́ yóó bɛ̀ miɛkùnnɛmu, kɛ́ mbɛ̀ ni, n yóó bɛ̀ bɑ́ntɛ̀mu bɛmbɛ nɛ̀ bɛ̀ bɛ̀ wɛ̃ ndidɑbònnì,

¹⁹kɛ́ bɛ̀ duɔ́ nyɛnɔ̀ bɛ̀ bo nni nsɑ̃ntínɛ̀ yɛ̀, bɛ̀ɛ̀ bo mɛdɛ́timɛ̀ nɛ̀ mɛtɔ́ɔ́mmɛ̀ kɛ̀ bɛ̀ɛ pɛ́tɛ́ mɛdɛɛtímɛ̀. N yóó di miɛkùnnɛmu mí ndi Yiɛ̀ nKuyie mmíì bɛ́i.

²⁰Bɛnitiyɛibɛ biɛ dònnɛ̀ dɑ̀mɛ́ɛ̀rì dòmmɛ̀ mmɛ, bɛ̀ ɔ̃ɔ̃ í nyĩ só dimɔ̀nnì mɑrì, yɛnɛ́fĩ̀nfĩ̀rɛ̀ ɔ̃ nyiitimu kɛ kónnì, kɛ uutoo tiyontì dɛ̀ɛ̀ tu dɛsĩ̀nnɛ̀.

²¹Ti Yiɛ̀ nKuyie mbɛ́immu kɛ tú: diwɛ̀ì í mbo bɛnitiyɛibɛ kpɛ́í.