Aisea 13

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Iei ewe kapasen osuni usun Papilon, Kot a pwäri ngeni Aisea nöün Am we mwän lon künan:

²Oupwe aürätä efoch filaik won eu chuk mi amassawa, oupwe kökköri ekewe sounfiu fän akapwas o äkänipöör pwe repwe tolong lon asamen telinimwen ekewe chon tekia.

³Ewe Samol mi Lapalap a püsin akünöü nöün chon pin o körato nöün sounfiu mi pwora o mwänek, pwe repwe apwüngü chokewe a songeitiir.

⁴Oupwe aüseling, a wor akürangen eu mwichen aramas mi chomong won ekewe chuk. Oupwe aüseling, a wor mwökütükütün chomong mwü ra chufengen. Ewe Samol mi Unusen Manaman a amolätä eu mwichen sounfiu fän iten maun.

⁵Ra feito seni fanü toau, pwal seni apilen. Ewer, ewe Samol mi Lapalap a feito fän an song pwe epwe ataala unusen ewe fanü.

⁶Oupwe pupuchör, pun a arap ränin ewe Samol mi Lapalap, ewe rän mi awarato feiengau me ren ewe Kot mi Unusen Manaman.

⁷Iei mine pöün ekewe aramas repwe chök ititiu, letiper epwe kisikisila,

⁸repwe pwal fokun apilükülükingau. Iwe, weires me metek epwe toriir, repwe cheuch usun eman fefin a tori an cheuchen fam. Repwe nenefengen lefiler fän niuokus, nge won meser epwe woparapar.

⁹Iwe, ränin ewe Samol mi Lapalap a arapoto. Epwe eu rän mi fokun ngau pokiten an lingeringer me song mi fokun watte. Iwe, fanüfan epwe pö ren, nge chon tipis repwe rosola me won.

¹⁰Iwe, fün läng me mwicheicher meinisin resap chüen tin, akkar epwe rochola lupwen a tötä, nge maram esap chüen saramaram.

¹¹Iwe, ewe Samol mi Lapalap a apasa, “Üpwe apwüngü chon fanüfan pokiten ar föföringau, pwal ekewe aramasangau pokiten ar tipis. Üpwe aükätiu lamalamtekian ekewe chon tipetekia o atekisonätiu lamalamtekian chon kirikiringau.

¹²Iwe, üpwe achokükünüela aramas pwe repwe chokisikis seni kolt mi mürina, pwal seni kolt seni Ofaia.

¹³Iei mine üpwe achecha läng, nge fanüfan epwe mwöküt seni lenian lon ewe rän, lupwen ngang ewe Samol mi Unusen Manaman üpwe pwärawu ai song mi fokun watte.

¹⁴Ekewe chon ekis mi nom Papilon repwe en me liwiniti aramasan o sü ngeni en me poputän fanüan, usun chök eman chia a sü seni ewe chon tapweri, ika usun chök sip esap wor eman chon foleniir.

¹⁵Iwe, sounfiu repwe posu iö repwe küna o niela ren ketilas chokewe meinisin ra turufiir.

¹⁶Repwe atatakisi nöür semirit me fän meser, repwe angei fän pöchökül pisekin lon imwer o achomanauei pwülüer.

¹⁷Nengeni, üpwe apwökü ekewe chon Metia pwe repwe maun ngeni Papilon, ir chokewe resap aücheani silifer ika tup ren än eman michi ngeniir kolt.

¹⁸Repwe niela ekewe alüal ren ar likapich, resap tongei ekewe mönükol, resap pwal kirikiröch ngeni semirit.

¹⁹Iwe, Papilon ewe mwü mi ling lein ekewe mwü o aüchea me ren chon Papilon epwe usun chök Sotom me Komora, lupwen üa atarela.

²⁰Esap wor aramas repwe chüen nom lon ewe fanü Papilon seni eu täppin aramas tori eu täppin. Iwe, esap wor eman chon Arapia epwe aüetä imwan imw mangaku ikenan, esap pwal wor eman chon fofol man epwe tümwünü nöün pwiin man won.

²¹Iwe, manmwacho seni fanüapö repwe chök nonom ikenan. Ekewe imw mi tala repwe masou ren man mi wörüwör, fukuro repwe fas me lor, nge kuuch mi mwacho repwe ipweipweriir.

²²Iwe, kolak mi mwacho repwe wörüwör me won ekewe imw tekia, nge wolif repwe nonom lon ekewe imwen king. Iwe, a arapoto än Papilon fansoun, nge ränin an feiengau esap mang le waroto.”