Esayi 13

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Yéeneb bii ñeel na Babilon, muy peeñum Esayi doomu Amocc.

²Yéegeleen ab raaya kaw tund wu ne duŋŋ, joorleen ñii, tàllal-leen loxo, ñu jàlle bunti kàngam yi.

³Maa jox ndigal ñi ma beral sama bopp, maa woo sama jàmbaar ñiy réy-réylu, ne leen ñu sottal mbugal mi samam sànj laaj.

⁴Coowal mbooloo ngoog ca tund ya, mel ni ñu baree bare! Riirum nguuri nguur yu daje, di xeeti xeet! Aji Sax ji Boroom gàngoor yi mooy dajale gàngooru xare.

⁵Mooy bawoo fu sore, fa asamaan digalook suuf. Aji Sax ji laak gàngoor gi muy mbugale, ngir yàqtesi réew mi mépp.

⁶Yuuxuleen! Bésub Aji Sax ji moo dëgmal, te ni sànkute gu bawoo fa ci Aji Man ji lay dikke.

⁷Moo tax yoxoo yoxo yoqi, xoloo xol jeex,

⁸ñu tiita tiit, yaram di fuddook a metti, ñuy baddaañu ni kuy matu; ku ne jàq, di xulli sa moroom, kanam ya sël-sëleendoo.

⁹Bésub Aji Sax jaa ngii di ñëw, bés bu néeg, bésub mer ak sànj muy tàkk, nara gental suuf, te bàkkaarkat ya la fay fàkkas.

¹⁰Biddiiw mbaa dëllooñ dootu leeral; jant ay fenke lëndëm, weer dakkal leeram.

¹¹Maay delloo àddina mbonam, yool ku bon tooñam, maay sàggi sagub ku reew, detteel puukarey ku néeg.

¹²Maay def nit gëna jafee gis wurus, ba doom aadama raw wurusu Ofir.

¹³Moo tax maay gësëm asamaan, suuf yëngoo fa mu tege ndax sànjum Aji Sax ji Boroom gàngoori xare yi, keroog ba meram di tàkk.

¹⁴Ku nekk ay fekkiy bokkam, rawi cam réewam, mbete kéwél gu ñuy rëbb, mbaa xar mu amul sàmm.

¹⁵Ku ñu ci gis, jam la, ku ñu jàpp, saamar rey la;

¹⁶seeni doom, ñu moxoñe fi seen kanam, seeni kër, ñu sëxëtoo, seeni jabar, ñu tëdde.

¹⁷Maa ngii di xabtal fi seen kaw waa Medd, ñi xintewoowul xaalis, faalewuñu wurus.

¹⁸Seeni fitt lañuy rajaxee xalelu góor, duñu ñeewante gone, duñu xool tuut-tànk gëti yërmande.

¹⁹Babilon nag, mooy gànjaru réew yi ko wër, di teraanga ji Kaldeen ñiy sagoo, waaye Yàllaa koy tas, mu ne tasar ni Sodom ak Gomor.

²⁰Deesatu fa dëkk, xanaa gental ba fàww. Màngaan dootu fa samp xayma, sàmm dootu fa gooral.

²¹Ay rabi àll a fay goore, kër ya fees aki looy, bànjóoli dëkke fa, kéwél di fa curpee.

²²Bukki mooy sabe fa tata ya, till nangu kër yu bakkane ya. Àppu Babilon jege na, ay fanam du fi wees.