IKUƆ́ KÓNTÍMÙ 21:10-17

¹⁰Kɛ̀ di do di dootitɔbɛ̀ kɛ̀ ti Yiɛ̀ nKuyie mbɛ̀ ɑ̃nnɛ́ di nɔu miɛkɛ kɛ̀ di bɛ̀ pĩ̀ḿmú.

¹¹Di miɛkɛ kòò mɔù yɑ̀ di pĩ̀ḿmú tìì dɑɑtì miɛkɛ, onitipòkù mɔù kòo yɛ̀mmɛ̀ ò tɑ, ò bo nɑ kóò tùótɛ́,

¹²kóò tɑnnɛ́ o cĩ́ɛ̃̀tɛ̀ miɛkɛ, kòo nitipòkùu kuó o yùtì kɛ́kékɛ́ o nɔ́nkúótì,

¹³kɛ́dɛitɛ tidɑɑyɑ̀ɑ̀tì ò do ɑ̃ tì, kɛ́ceetɛ titɛtì, kɛ́nkuɔ̀ nho cicɛ nɛ̀ o yɔ̃ bɛ kṹṹ nkɛ dɔ̀ otɑ̃̀nkù, kòò nɛ́ nɑ kóò duɔ́nɛ̀.

¹⁴Kɛ̀ dɛ̀ boní kòo tɛ̃́nkɛ í ò dɔ́, wèe ò yóu, kɛ̀ wèe kɔtɛ ò dɔ́ kɛ̀, ò bɑ́ɑ́ ò fìtɛ́ kɛ́cɔutɛ́ idíítí ò mɛ mbɑ́ɑ́ ò dɔ̀ɔ̀ kudɑɑkù kɛ yɛ̃́ wè ò puokɛmɛ̀ kɛ̀ bɛ̀ wɛ̃nnɛ́ didɔ́ù.

¹⁵Kòo nìtì mɔù po bɛnitipòbɛ̀ bɛ̀dɛ́bɛ̀ kɛ dɔ́ òmɔù kɛ̀ dɛ̀ pɛ̃ɛ̃tɛ́ otɔù kɛ̀ bɛ̀ ò mɔ̀kɛnɛ̀ ibí, ò dɔ́ wè mɛsɑ̀ɑ̀ nkɛ̀ weè kó dɛbirɛ í tú Mpo,

¹⁶ò bo mbɛ̀ toti dìì mɔ̀nnì bɛ̀ dò nkɛ́nte dɛ̀, ò bɑ́ɑ́ duɔ́ nhò dɔ́ wèè nitipòkù kó dɛbirɛ dɛ̀ɛ̀ í tú Mpo, wèè tu Mpo ò nɑ nte dɛ̀, kɛ́yóu ò bo dɛ̀ duɔ́mmɛ̀ ò í dɔ́ wè kó dɛbirɛ dɛ̀ɛ̀ tu Mpo.

¹⁷Ò dò nkɛ́nyɛ̃́mu kɛ́duɔ́ nhonitipòkù ò í dɔ́ wè kó dɛbirɛ dɛ̀ɛ̀ tu Mpo, Mpo kpɛrɛ, kɛ́ dɛ̀ duɔ́ nkɛ̀ dɛ̀ mmɑ̀nnɛ̀ ò duɔ́ ndɛ̀ ò dɔ́ wè, ò duɔ́ ndɛ̀ o kó dɛbirɛ kucɛ mɛ̀dɛ́mɛ̀. Kɛ yɛ̃́ ò í dɔ́ wèè nitipòkù kó dɛbirɛ dɛɛ̀ tumɛ̀ o kó dɛbíketirɛ̀ kɛ dò nkɛ́tiekɛ Mpo kpɛrɛ.