Vinara 21:10-17

¹⁰“Na tahuna e BAKOVI DAGI a Vure ne mua i tuhori mua, mu mulangi na vabinga, mu lakavu ranga pile,

¹¹muri a bakovi tara ne mua ge ngarua tara ngatavine i mata kamumu ne ria ge parangi vona, ge rata maea.

¹²A bakovi iea ge bolea a ngatavine ge lakea na ruma vona, ge pali vuroki lobo a vuna, ge pisi a tagulana limana,

¹³ge kuloi a maka varakia vona. A ngatavine ge made na ruma vona ge taringi e tamana e kinana na keva ge taku, muri ge parangi vona.

¹⁴Muri na tahuna i uka ma i ngaru tabua, ge tonoa ge vano, i uka ma ge ia a vorakato tabu, a vuhuna i turaria i mahita turana. Nahea ge luhoia a ngatavine iea ga vorakato ge matataroa tara bakovi ge konea.

¹⁵“Na tahuna a bakovi i parangi na ngatavine i rua, bara i ngaru hatekea tara, pali a viri tara i uka ma ge ngaru hatekea. Muri ru singou ru poda, pali ra ngatavine i uka ma i ngaru hatekea i poda mugea a bakovi a tabua vona, muri e girihina tara i podea a koma bakovi.

¹⁶Na tahuna a bakovi i ngaru ni veru a maka mahala vona, nahea ge habi a mahala vona lakea na tuna ngatavine i ngaru hatekea.

¹⁷Ge habi balaka rua ne tuna a tabua a maka mahala, ge manga ne huriki a tabua ri bole bala. I muholi ngi e kinana a koma a tabua, i uka ma a ngatavine i ngaru hatekea, pali ra koma iea a tabua, a bakovi iea i vakabelea, bara i bole a maka mahala na tabua.