Sâcmutâc Hâsine 21:10-17

¹⁰“Ŋoŋe râsifâc‐ŋeŋic jopaniŋte ʒikao rahuc Wofuŋ Anutu‐ŋeŋiczi meŋeŋicko râec‐jopame kâpâcwâru bacjopaniŋmu.

¹¹Ehame ŋoŋeraonec moczi kâpâcwâru ŋic jaŋere ŋondeŋko ŋokac hawari biaŋ moc honerâ ere aŋackeme ŋonâŋ‐ticne eocte rohuc

¹²ficticnao jowa rame qizec susuc â mesârâ‐ticne bâtâcne‐fârezejec.

¹³Erâ ŋaqi‐ticne raŋɋane hetararâ ŋic ere ficko juhuc neŋgoc mamac jahec‐ticne jahere ki busâqoc ehuc juhame mosa moc hâmozejec. Eme irec faicnao ŋiczi ehec juhame ŋonâŋ‐ticne ezejec.

¹⁴Eme juku ʒâhec ine ere aŋac mocwâc mi manahuc soreme ira me ira razo murâ razejec, mâc ehec juju fofo ewecte furinere erâ mi sorezejec â kiŋaŋ qaqa wâc mi bazejec.

¹⁵“Ŋic moc ŋokac jajahec rocjofarâ maŋticnezi moc âgo ecnehuc moc hone takireocmu. Eme jahe juku motec kiweckerâ rocjofanicmu. Ehame ŋokac hone takic ecnekicne ere moteczi bâbâni fuaocmuo

¹⁶ine mamaczi merâfâc bâtâc bapa dameŋko ira ŋokac âgo ecneekac ere motecte maname feha mafa bocjaha râcnehuc ŋokac hone takic ecneekac ere motec ine afecne sawa mi râcnezejec.

¹⁷Aricne, hone takic ecneekopac ere motec e mârâc fufua‐nane, iŋuc mana tarahuc wiac focnekac sasawa irecnec ŋemâcne jaha râcnezejec. E mamacte mârâc motec, irec hâcne wiac iŋuc râcnezo.