Bomai Po 21:10-17

¹⁰Tama Mosesgo po geninama weyu, te po wali, “Te Genuai Bidi dago God agai dage tau selama, tama dagego te boi hwįbo gasa bidi aiyaba elalubaso da, tama dagego te boi bidi dabe meba kalabus ilibaso da,

¹¹te bidi me deli dage hani tomode agai te sawi yai we me deli te kalabus yali bidi hani tomode bidibo suaibao, tama agai te we sabo homu yaibao.

¹²Te da, te bidi naga te we naga beba odasa pelama, tama te we agai aga tobolu nisi sese togwa sąmainao, tama me agai nogo dani sese togwao.

¹³Tama agai te wego te kalabus hanude gudali te ugwa sese sela sąmainao, te gasa ugwa gudao. Tama aga te bede bidiyu, aga ida aya hagede gela odubadi, te polua deli pomainao, tama nosali nago te we sagameo.

¹⁴Tama tialima, nosali da, nago aga godolo ma isąma ebaso da, teda nago aga olo ma taga palao. Magi baso meni, nago aga bomo elama, kegelama, tama dage si te pagela piali dao. Tilama, nago te olo sę we dao homu elama, tama gasa bidi mego abelemainao homu me elamo dao. Mu menio,” Mosesgo te po wai.

¹⁵Tama Mosesgo po geninama weyu, te po wali, “Tialima, bidi mego te we si sai baso da, tama agai te we me deli naga godolo mu elama, tama agai me we kuna godolo isąma ebaso da, tama te wego aga gomunai ogwa ame nenama, tama nosali me wego me ogwa ame nobaso me.

¹⁶Tama te bidi aga homugo te aga isibo sogo augwaligo te nai dabe te ogwa dabe dali dobayabo homu ebaso da, teda agai te gomunai ogwago sabo doado bage sa muyu, te aga godolo ebo wego ogwabolo magio. Menio.

¹⁷Agai te e kolesaga wali peyu, tama tiao. Agai te doado bage bugulama, tama te ogwa wegi augwali tigidali deli delibolo maiabo nai dodolama, tama te hasia mu ame nani ogwa agabolo te doado bage me manama, agabolo mawainogo sa muao. Te agabolo maiabo nai te dadagano pabo sę tama yao. Magi baso meni, te da te bidi aga hasia mu te ame nai ogwa dao. Tama aga da te aga ayago gomunai ogwa mu dao, tama agai te gomunai ogwago te sabo doado bage nosali somainao,” wali.