Fufua 4:4-16

⁴Â Abe e iŋuc jaha lamafâcne mârâc fufua irecnec moc hezurâ wokemaŋne rorâ bâzi rikewec. Eme Wofuŋzi Abe jahacne â bâzi‐ticne hone biaŋkewec.

⁵Kaiŋ â bâzi‐ticne ine hone takirewec. Iŋuc eme Kaiŋ e mâretec aarickeme ʒâŋe maine enduŋkewec.

⁶Eme Wofuŋzi Kaiŋ âzâcnewec: “Wemocte aaricgume ʒâŋe maige enduŋkekomec?

⁷Go biaŋne jutec mana‐garepe sâckeocmu. Biaŋne mi jucmuo ine sâqocnezi motâc râpeo soŋkerâ ruc bagareocmu. E gore hâcne ecnekac, go ine aka hecnezemec.”

⁸Eme Kaiŋzi ɋaticne Abe âzâcne muwec: “Nâhâc gieo ranac.” Mume gieo ra jupic, ehuc Kaiŋzi fahare ɋaticne Abe qarâ qâhâmowec.

⁹Eme Wofuŋzi Kaiŋ ʒiŋuc wiocnewec: “Ɋage Abe wena jukac?” Eki muwec: “Mi manakopac, no ɋananere soŋaŋ me?”

¹⁰Eme Wofuŋzi muwec: “Go wemo wiac emec? Ɋagere soczi mâreŋko wira wâwâsic enareme manakopac.

¹¹Irec sâwec faigao fekac, ehuc mâreŋ, micne aŋkehuc ɋagere soc megaonec rorâ nâjec, mâreŋ izi jâpecgukac.

¹²Hesarac gie batec mâreŋzi guec‐ticnere fârine sakare‐garezejec. Eme wise wise juhuc ra ju ware ju ezemec.”

¹³Eme Kaiŋzi Wofuŋ âzâcnewec: “Okacne narekic i bâmâmâckekopac.

¹⁴Go miŋecgac gie hesarac mâreŋkonec jâpecnukomec, irec ʒâŋesoŋ bagarerâ wise wise juhuc ra ju ware ju epemu, ehame ŋiczi bâfuacnurâ qâhâmocnuniŋmu.”

¹⁵Eme Wofuŋzi muwec: “Iŋuc misac, moc e Kaiŋ qâhâmome okacne arec 7 irec sâc râcnezo.” Iŋuc murâ Kaiŋ sahacnao maqâreŋ moc râewec, moczi moc bâfuarâ qanʒipiŋte.

¹⁶Eme Kaiŋ e Wofuŋte maionec rarâ mâreŋ moc ʒâŋene Nodi, Edeŋ ʒoaŋ wewefu‐ticnao, ira juwec.