Gesese 4:4-16

⁴Na Abela ena mamoe eawoina natu‐ealahoudi, tubutubu‐lolodi i ledima. GUIAU Abela ena ainauia i heasisiei,

⁵na Kaina eo ena ainauia nige i nualoloedi. Arinai Kaina i ouyalayala ariri, eo ana ao i hebaaea.

⁶GUIAU i ribalau Kaina arinai i ene, “Paana saha u ouyalayala, eo paana saha am ao u hebaaea?

⁷Ena em abi se dudurai, abo se nualoloem, e nige’e? Ena em abi nige se dudurai, baaea dobila eai i wesewesem, ena gadosisi bena i abim, na oa mo bena u saepoini.”

⁸Kaina i ribalau ena tau Abela arinai i ene, “U laoma ta lau oea eai.” Isi taudi labui se lage’o oea eai abo Kaina i toro ena tau Abela i lului abo i eatu’nui.

⁹GUIAU abo i ribalau Kaina arinai ie ene, “Em tau Abela wa ia haedi?” I heuio i ene, “Ibai: bena eau egu tau tauitawataina wa?”

¹⁰GUIAU i ene, “Saha ue abi ina? Em tau osinana arinana tano eai i dou‐saema arigu eai.

¹¹Tano wa awana i dabari em tau osinana oa nimam eai ie abi ia ede i ribahematem ta.

¹²Oa tano abo u giari, iamo adidirina taba nige i leawa’uioi; oa abo taudago eo tauelitata tanoubu eai ta.”

¹³Kaina abo i ribalau GUIAU arinai i ene, “Egu maisa i lai ariri, nige gonoana ea bahei.

¹⁴U ita, wau tano eai ta u aiduiegu; oa matam eai hinage abo ea tauyamui; eau abo taudago eo tauelitata tanoubu eai ta, ena esau i lobaigu abo i unuigu.”

¹⁵Abo GUIAU arinai ie riba i ene, “Taba nige’e! Ena taba esau Kaina i unuhemate, ana gum abo i hearo, ma haligigi‐labui.” Abo GUIAU heiheinoina ie tore Kaina arinai, ata tau esau i lobai abo i unui.

¹⁶Kaina GUIAU matana abo i laugabaei, ia abo Nodi oeana eai ie mia, Edena teha aruabu eai.