Fufua 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Sina ŋicwofuŋ Amarafe, â Elasa ŋicwofuŋ Arioko, â Elam ŋicwofuŋ Kedo‐Laome erâ Goim ŋicwofuŋ Tidali

²jaŋe ŋicwofuŋ 5 kecʒiŋuc jaŋehec qaqac embiŋ: Sodom ŋicwofuŋ Bera, â Gomora ŋicwofuŋ Birisa â Adama ŋicwofuŋ Sinaba â Zeboim ŋicwofuŋ Semebe erâ Bela ŋicwofuŋ. (Bela i Ʒoari irec ʒâŋe moc.)

³Ŋicwofuŋ i sasawa jaŋe Sidim wâneŋko (Sidim i Hâwec Hâmocne irec ʒâŋe moc) ʒâʒâfic erâ tumaŋnembiŋ.

⁴Jaŋe jara 12 Kedo‐Laome kiŋaŋ qacnehuc jumbiŋ, jara namba 13‐ko ine e râpeckembiŋ.

⁵Eme jara namba 14‐ko Kedo‐Laome â ŋicwofuŋ ehec jumbiŋ jaŋe ware Asitero‐Karanaim haeo Refaim ŋic jopambiŋ, izi ware Ham haeo Ʒuŋim ŋic jopambiŋ, izi ware Kiriatim wâneŋko Emimŋic jopambiŋ,

⁶izi ware Seiri tikio Horite ŋic jopa jâpec ejare raku Eleparaŋ haeo, mâreŋ burocnere qaŋeŋnao fisimbiŋ.

⁷Erâ irecnec raku Eŋmisipa haeo (i Kadesi hae irec ʒâŋe moc) fisirâ ŋic mâreŋ ira jurambiŋ jaŋe joparâ Amori ŋic Hazazoŋ‐Tama haeo mâmâc jopambiŋ.

⁸Eme Sodom ŋicwofuŋ, Gomora ŋicwofuŋ, Adama ŋicwofuŋ, Zeboim ŋicwofuŋ, â Bela ŋicwofuŋ i jaŋe Sidim wâneŋko ʒika qaniŋte rambiŋ.

⁹Ra fisirâ ŋifec domahapie ŋifec Elam ŋicwofuŋ Kedo‐Laome, â Goim ŋicwofuŋ Tidali, â Sina ŋicwofuŋ Amarafe, erâ Elasa ŋicwofuŋ Arioko i jaŋe domambiŋ. Ŋifec 4 domambiŋ, ŋifec 5.

¹⁰Sidim wâneŋko ira mâreŋ sâfâ irec nombâŋ i mâreŋ sâckerâ forawec. Eme râsi jaŋe Sodom â Gomora ŋicwofuŋ jahe jofa jâpec ejactepie wisepire ŋicfâc‐jekic gâcne nombâŋko humbiŋ â tiwâne jumbiŋ jaŋe tiki mâreŋko wiserâ rambiŋ.

¹¹Irec râsi jaŋe Sodom â Gomora haeonec mafa mecne nânâ mecne rofârerâ barâ rambiŋ.

¹²Ehuc Abram hahac‐ticnere ŋokâ Loti Sodom haeo ŋec juc ewec, e jahacne â mafa‐ticne iŋuc jaha rorâ amecke rambiŋ.

¹³Eme ʒikare nâfocne ŋic moczi fisi Hebiraio ŋic Abram biŋe âzâcnewec. Abram e dameŋ ira Amori ŋic Mamere ere boriŋ gieo ŋec juc ewec, â Mamere qomâ jahec‐ticne Esikola â Anera jahe wâc Abramhec ʒâʒâfic erâ jumbiŋ.

¹⁴Abram e ine motecoc‐ticne niŋgiŋko barâ rakicne biŋe i manarâ izia ŋicfâc‐ticne ʒikare fuŋne mamana, ʒare‐jeŋic 318, e jahacne ficko fuakicne sasawa rocjopame râsi bâjâpec‐jopa raku Daŋ haeopec fisimbiŋ.

¹⁵Eme Abramzi ŋicfâcne bâfâuc‐jopame gurune gurune ehapie ŋafeo râsi ututuŋ fisi‐jarerâ jopa jâpec ejare raku Hoba haeo Damasko faic‐ticnao fisimbiŋ.

¹⁶Fisirâ mafa jowac rofârehuc motecoc‐ticne Loti â mafa wiac‐ticne, erâ ŋokac â ŋic ŋokac gâcne wâc mâmâc bârisiec‐jopa‐fârewec.

¹⁷Abram e Kedo‐Laome â ŋicwofuŋ âgofâcne jopa jâpec ejareku risehame Sodom ŋicwofuŋ e fahare Sawe Wâneŋ, ʒâŋene moc Ŋicwofuŋ Wâneŋ ira hâcne bâfuaocte rawec.

¹⁸Ehame Salem ŋicwofuŋ Melikisede, Anutu Femicne ere taha bapa juweczi Abram poroŋ â waiŋ bacne rawec.

¹⁹Erâ jambuŋkehuc dâŋ ʒiŋuc muwec: “Anutu Femicne e Abram jambuŋkezejec, Anutu sambâŋ mâreŋ bâbâfua eki hâcne.

²⁰Erâ Anutu Femicne mucne bacnezo, eki hâcne râsifâcge megao râec‐jopajec.” Eme Abram e wiac sasawa teŋkonec wâŋ irec sâc râcnewec.

²¹Ehame Sodom ŋicwofuŋ e Abram ʒiŋuc muhuc âzâcnewec: “Ŋic ŋokac bârisiec‐jopa‐narec, mafa ine fogareoc.”

²²Mume Abramzi Sodom ŋicwofuŋ ʒiŋuc âzâcnewec: “Wofuŋ Anutu Femicne hâcne, sambâŋ â mâreŋ irec bâbâfua, erao musanaŋkekopac.

²³No qoruc ɋâɋâtâ muc me kikehuhu bâmbândeŋ me wiac piticne i me i goraonec mi ropemu; go ʒiŋuc muzicte: Noni Abram mafa qâmiecnepo.

²⁴Mâc motec jaŋe suanʒeŋ nâmbieŋ izi fozejec, erâ ŋic nohec jumbeneŋ, Anera, Esikola â Mamere jaŋe ine sâcjeŋic ronʒepieŋ.”