1Abraham e dameŋ ʒora jufeku ŋicqizec ewec. Ehame Wofuŋ e Abraham wiac sasawa jambuŋkecnewec.
2Iŋuc eme Abrahamzi kiŋaŋŋic‐ticne micne, fic hae â wiac sasawa qizeckerâ irec soŋaŋ juwec, e hâcne ʒiŋuc âzâcnewec: “Go mege gâjoŋ‐naneo râehuc
3Wofuŋ, sambâŋ â mâreŋ jahere Anutu, ere maio ʒiŋucte mupaŋkezemec: Go Kanaaŋ ŋic ŋondeŋko jukopac jaŋere naru moc rorâ ŋokâ‐nane mi râcnezemec.
4Aricne, go ŋokâ‐nanere ŋonâŋ moc bâfuacmurâ nore fufua mâreŋko mame sâkofâc‐nane juŋgopieŋ jaŋerao razemec.”
5Mume kiŋaŋŋiczi âzâcnerâ muwec: “Ŋokac e no bâjâpecnurâ mâreŋ ʒira wareocte mi afeckeme weniŋuc epemu. No ŋokâge mâreŋ beherâ waremeŋ ira mocwâc jowarâ risiepemu me mâcne?”
6Iŋuc mume Abrahamzi muwec: “Aricne jâmbâŋ, go ŋokâ‐nane ira moc mi bârisie‐jâmbâŋkezemec.
7Wofuŋ, sambâŋte Anutu hâcne, mamac‐nanere fickonec â mame sâkofâc‐nane jaŋere mâreŋkonec jowacnu warewec eki dâŋ mupaŋkehuc ʒiŋuc nazawec: ‘Ɋâricfâcge jaŋe mâreŋ ʒi hâcne jarepemu.’ Wofuŋ eki hâcne ŋokâ‐nanere ŋonâŋ moc mâreŋ irecnec bâfuacmurâ aŋelo‐ticne ecneme bânie‐gareocmu.
8Eme ŋokac e bâjâpecguocte mi afeckeocmuo ine mumupaŋgezi fârimâc eme irec manabâc mi ezemec. Ehuc ŋokâ‐nane ine sifu mâreŋ ira moc mi jowa razemec.”
9Iŋuc mume kiŋaŋŋiczi meticne Abraham gâjoŋnao râerâ dâŋ i mupaŋkecnewec.
10Erâ kiŋaŋŋic e bomboŋ‐ticnere kamelefâc jaŋeraonec 10 rocjopawec, erâ bomboŋ‐ticnere boreŋ ʒeŋaŋ wiac fuŋne fuŋne i mâmâc ameckerâ rawec. Rahuc juku Mesopotamia mâreŋko, Naho ere haeo hâcne fisiwec.
11Hae mendâŋko ine opâ ʒâkâŋ fowec. Eme hae owâ ririŋte ŋokac jaŋe ira hâcne opâ fianiŋte haeonec waha jumbieŋ. Eme kiŋaŋŋic e dameŋ ira kamele ejareme waha fombiŋ.
12Eme muwec: “O Wofuŋ, bomboŋ‐nane Abraham ere Anutu, go miŋecgac baficnuhuc bomboŋ‐nane Abraham bubiaŋ qacnezemec.
13Manakic, no ʒira opâ ʒâŋeo domahape hae rune jaŋere narufâc opâ fianiŋte wahaniŋmu.
14Eme naru moc wahame, ‘Opâ kiruŋge naretec opâ nâpe,’ iŋuc âzâcnepe manarâ muocmu: ‘Nâc, eha kamelefâcge opâ jarepe nânʒepieŋ wâc,’ naru e hâcne kiŋaŋŋicge Isaka ere biŋe bâwosâemeŋ, no iŋuc manarâ ʒiŋuc mana tarapemu: Go ŋicbomboŋ‐nane bubiaŋ qacnekomec.”
15Dâŋ i mi mutarahame izia Rebeka opâ kiruŋ‐ticne hâporâ warewec. Rebeka e Milika ŋokâ‐ticne Betuele ere otâ fuarâ juwec, Milika e ine Abraham ɋaticne Nahore ŋonâŋ.
16Naru e ine sahac hawari biaŋ‐ticnehec, erâ naru ʒeŋoŋ juhuc ŋic mocte biŋe biac mi ewec. E opâ ʒâŋenao hurâ opâ fiarâ wefuwec.
17Wefuhame kiŋaŋŋic e erao gasacke ra muwec: “Mana‐naretec kiruŋgaonec opâ piticne nâpe.”
18Eme eki muwec: “Bomboŋ‐nane, nâc,” murâ izia opâ kiruŋ‐ticne rorâ sicnecneme nâwec.
19Eme nâ gapec eme ʒiŋuc âzâcnewec: “No kamelefâcge jaŋe iŋuc jaha opâ fia‐jarepe nâ gapec enʒepieŋ.”
20Iŋuc murâ picpac jaha opâ otoo hoŋkeme hume mocwâc fiaocte opâo huwec. Iŋuc ehuc kamelefâc‐ticne sasawa opâ fia‐jare‐fârewec.
21Ŋic eki ine dâŋ mi mumu mâc wareckehuc domawec, ehuc kecʒiŋuc manasuwec: Wofuŋ e gie‐nane jambuŋkeocmu me mâcne, i mana tarazepac.
22Eme kamele jaŋe opâ nâ gapec epie tarame ŋic e maŋŋuruc moc golzi bakicne, â maŋguc jajahec, furi‐jekic fekicne i râcnewec.
23Erâ muwec: “Go more otâ, i nazac. Erâ mamacgere ficko sâcne fonaŋmu?”
24Eki muwec: “No Betuelere otâ, Betuele e ine Milika â Naho jahere ŋokâ.”
25Iŋuc murâ ʒuhuckerâ muwec: “Kamele jaŋere jawa wiac â nânâ bocjaha fonârekac â guŋfic‐nâŋec fokac wâc.”
26Eme ŋic e daperâ Wofuŋ numucnehuc muwec:
27“Bomboŋ‐nane Abraham ere Anutu, Wofuŋ hâcne, e maŋuruchec juhuc mumupaŋ‐ticnere fârine bomboŋ‐nane mi sakarecnewecte muteŋ bâteŋ ecnezo. Wofuŋ e fâretiŋ jaha jowacnume bomboŋ‐nanere soctofa jaŋere ficko ware fisipac.”
28Naru e ine gasacke rarâ neŋgoc‐ticnere ficko fe fisirâ wiac sasawa irec dâŋ binaŋ ewec.
29Eme Rebekare seŋ moc juwec, ʒâŋene Labaŋ, eki ŋic opâo domawec erao gasacke rawec.
30I ʒiŋucte: E qoticnerao maŋŋuruc mecne â menao megâŋ ŋewec i honewec, erâ wâc ŋiczi dâŋ binaŋ ewec i qoticnere mickonec manawec. Iŋuc hone manac erâ izia rawec hâcne. Ŋic e ine kamelefâcne jaŋehec opâoa domawec.
31Eme muwec: “Wofuŋzi jambuŋguwec go wefuc me! Wemocte hae râpeo domakic? No fic biac emasaŋkepac, â kamele jaŋere ŋeŋe fofo irec sawane wâc fokac.”
32Eme ŋic e ficko ferâ kamele jaŋere sate wiac hetarawec. Ehame kamele jaŋere jawa wiac â nânâ râembiŋ. Erâ ŋic ehec jumbiŋ jaŋere kike ʒuʒure opâ i mâmâc râembiŋ.
33Eme irec faicnao nânâ râcnembiŋ. Eki ine muwec: “No dâŋ bajukopac i mupe mi manahapie nânâ jâpec mi nâpemu.” Eme Labaŋ muwec: “Murâ muc.”
34Eme ʒiŋuc muwec: “No Abrahamte kiŋaŋŋic.
35Wofuŋzi bomboŋ‐nane jambuŋkeme ŋic fekicne ewec jukac. Ehame qowi fuŋne fuŋne â bulimakao, siliwa â gol, kiŋaŋŋic â kiŋaŋ ŋokac, kamele â doŋgi wiac râcne tahac ewec.
36Â bomboŋ‐nanere ŋonâŋ e ŋokac qizec erâ sifu bomboŋ‐nanere ŋokâ moc rowec. Eme Abraham e wiac‐ticne sasawa ere meo râe‐fârewec.
37Erâ no mumupaŋ dâŋticne kecʒiŋuc i reŋkezo mupaŋkepemurâ nazawec: ‘Go Kanaaŋ ŋic, mâreŋ‐jeŋicko jukopac, narufâc‐jeŋic jaŋeraonec ŋokâ‐nanere ŋonâŋ moc mi rozemec.
38Go mamac‐nanere haeo â mame sâkofâc‐nane jaŋerao ŋokâ‐nanere ŋonâŋ moc bâfuazemec.’
39Iŋuc mume no bomboŋ‐nane ʒiŋuc âzâcnepo: ‘Ŋokac e mi mecne afeckerâ bâjâpecnuocmu.’
40Eki ine ʒiŋuc nazawec: ‘No Wofuŋte maio juwefuhuc juekopac, eki hâcne aŋelo‐ticne soreme gohec juhuc baficgume mame sâkofâc‐nane jaŋerao â mamac‐nane ere fickonec ŋokâ‐nanere ŋonâŋ moc sâcne bâfuacmu.
41Go iŋuc etec mumupaŋ dâŋ i fârinehec eme taraocmu. Me mame sâkofâc‐nane jaŋerao fisitec ŋokac sakare‐garepie mumupaŋgezi fârimâc eme irec manabâc mi ezemec.’
42“Eme no miŋecgac opâ ʒâŋeo fisirâ ʒiŋuc mupac: ‘Wofuŋ, bomboŋ‐nane Abraham ere Anutu, go gie bapemurâ warekopac irec baficnutec fârine fuaocte gazakopac mac,
43no ʒira opâ ʒâŋeo domakopac, eme naru moc opâ fiaocte wahame, “Kiruŋkonec opâ piticne naretec nâpe,” no iŋuc âzâcnepe dâŋ
44ʒiŋuc bâtikierâ nazaocmu: “Nâc, eha kamelefâcge iŋuc jaha fia‐jarepe nânʒepieŋ.” Iŋuc mume ere mupemu: Wofuŋzi bomboŋ‐nanere ŋokac biŋe bâwosâewec hâcne.’
45No maŋnanezi iŋuc muhuc mutarahape Rebekazi opâ kiruŋ hâpo fârâ opâ ʒâŋeo hurâ opâ fiajec. Eme no ʒiŋuc âzâcnepac: ‘Opâ narec nâpe.’
46Mupe izia opâ kiruŋ rorâ mujec: ‘Nâc, ehame kamelefâcge fia‐jarepe nânʒepieŋ wâc.’ Iŋuc mume napac â eki kamele gumec‐jopajec wâc.
47Tarame wiocnehuc mupac: ‘Go more naru?’ Eki mujec: ‘No Betuele ere otâ, e ine Naho â Milika jahere ŋokâ.’ Iŋuc nazame maŋŋuruc sâkenao râepac â megâŋ ine meombâŋ‐ticnao hecnepe fejec,
48erâ daperâ Wofuŋ, bomboŋ‐nane Abraham ere Anutu hâcne, e numucnehuc muteŋkepac. Eki hâcne bomboŋ‐nane ɋaticnere otâ Abraham ŋokâ‐ticnere ŋonâŋ ropemurâ hata biaŋnao jowacnuwec.
49Eme ʒi nazaniŋ: Ŋoŋe bomboŋ‐nane maŋuruc ecnehuc bubiaŋ qacnezo muŋgopieŋ me weniŋuc? Arictac eme nazanʒepieŋ wâc, eme no hata‐nane fâreopec me qanaopec sâcne rapemu.”
50Iŋuc mume Labaŋ â Betuele jahe ʒiŋuc muhuc âzâcnepic: “Wiac keci Wofuŋtaonec i, irec nâhe dâŋ iŋuc me iŋuc, biaŋne me sâqocne sâcne mi munacmu.
51Rebeka e gore maio domakac hâcne, irec bomboŋgere ŋonâŋ eocte Wofuŋzi dâŋ muwec irec sâcko ehuc jowa razemec, eme Wofuŋzi muwec sâc sanaŋkezejec.”
52Eme kiŋaŋŋic e dâŋjeŋic mupie manarâ Wofuŋ dapecnehuc ʒâŋe maine mâreŋko hetutuckewec.
53Erâ faharerâ mafa wiac siliwa â golzi bakicne erâ ŋaqi wiac rorâ Rebeka râcnewec â boreŋ wiac furi sâko gâcne neŋgoc hahac jahec‐ticne wâc jactewec.
54Iŋuc erâ kiŋaŋŋic Eliesa â ŋic ehec fisimbiŋ jaŋe mâmâc nânâ opâ nârâ ŋafeme waha fombiŋ. Hae fureme faharepie muwec: “Râecnupie bomboŋ‐nanerao rape.”
55Rebeka neŋgoc hahacne jahe ine mupic: “Naru e woka moc me ʒoaŋ 10 nâŋehec juku razejec.”
56Eki ine muwec: “Wofuŋ e hata juju‐nanere guriŋne bame biaŋkewec irec mi niŋgiŋnunʒepieŋ, bomboŋ‐nanerao rapemurâ râecnuniŋ.”
57Mume mupic: “Nâhe naru hefârerâ e jahacne wiocnenac.”
58Murâ Rebeka wiocnerâ ʒiŋuc âzâcnepic: “Go ŋic ʒi ehec razo mukomec?” Eki muwec: “No razo mukopac.”
59Iŋuc mume jaŋe seŋjeŋic Rebeka â jauŋ ŋokac‐ticne â Abrahamte kiŋaŋŋic â ŋicfâc‐ticne râec‐joparâ
60Rebeka mu jambuŋ ecnehuc ʒiŋuc âzâcnembiŋ: “O seŋnâŋec, go ŋic tauseŋne tauseŋne jaŋere neŋgoc ezemec erâ ɋâricfâcge jaŋe râsifâc‐jeŋic jaŋere fic hae rauckenʒepieŋ.”
61Iŋuc mupie Rebeka â kiŋaŋ narufâcne jaŋe faharerâ kamele faio ferâ ŋehuc ŋic bâjâpepie rambiŋ. Kiŋaŋŋic eki ine Rebeka soŋaŋkehuc rawec.
62Isaka eki ine opâ moc ʒâŋene “Juju runezi honecnuekac ere opâ ʒâŋe” ira raweckonec warewec. E Negebe mâreŋko ŋec juc ewec.
63Eme ʒoaŋ moc ira hae owâ ririŋte Isakazi gieo rawec. Ra juhuc ʒâŋe fime rame kamele warepie honec‐jopawec.
64Eme Rebeka e iŋuc jaha ʒâŋe fime rame Isaka honerâ kameleonec waharâ
65kiŋaŋŋic ʒiŋuc wiocnewec: “Ŋic kecocna gieonec warekac e mo?” Kiŋaŋŋiczi âzâcnewec: “E bomboŋ‐nane hâcne.” Iŋuc mume qârufac rorâ ʒâŋe mai‐ticne sâockewec.
66Kiŋaŋŋic eki ine wiac ewec bawec irec dâŋ binaŋ Isaka ecne‐fârewec.
67Tarame Isakazi Rebeka neŋgoc‐ticne Sara ere qoruc bozeo jowa ferâ ŋonâŋ‐ticne rorâ âgo ecnewec. Ehuc e jahacne maŋ bâmiriŋkerâ neŋgoc‐ticnere busâqoc i behewec.
