Fufua 11

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Mâreŋŋic sasawa dâŋmarac‐jeŋic mocjaha fowec â wiac ʒâŋene ʒâŋene ijaha sasawa mujumbieŋ.

²Eme jaŋe ʒoaŋ wewefunaopec rahuc juku Sina mâreŋko wâneŋ sâko moc bâfuarâ ira fic hae erâ jumbiŋ.

³Erâ kecʒiŋuc muc manac embiŋ: “Ajoc, nâŋâc afe qâhâckerâ ʒocko rikepene sanaŋkeoc.” Eme afe sanaŋkekicne izi fic bapa qânâ ejarewec â mâreŋ maŋkonec sâfâ izi simeŋ ejarewec.

⁴Eme mumbiŋ: “Ajoc, nâŋâc hae sâko moc barâ ficʒora moc feŋgaŋne feŋgaŋne râe fekupene botâŋnezi sambâŋ âke uazejec. Eme ʒâŋe biŋehec erâ siŋsaŋ qahuc mâreŋne mâreŋne mi ranʒepeneŋ.”

⁵Iŋuc murâ hae sâko â ficʒora bambiŋ i Wofuŋzi honeocte wahawec.

⁶Erâ muwec: “Jâmbomac, jaŋe ŋicguru mocjaha â dâŋmarac‐jeŋic wâc mocjaha, erâ gie baniŋte mu biric embieŋ i mâc fufuŋkene sawa. Efehuc fârine quŋquŋke tâmiric bâfuaniŋmu.

⁷Ajoc, nâŋâc hurâ dâŋjeŋic bâsifuckepene dâŋte kâuc babac enʒepieŋ.”

⁸Wofuŋ e iŋuc muhuc irecnec bârâwiŋ‐jopame mâreŋ sâc rafârembiŋ, ehuc hae qizec sâko bapa i behembiŋ.

⁹Wofuŋzi hae ira hâcne mâreŋŋic dâŋjeŋic bârâc qârâwiŋneme fâuckehuc mâreŋ sâc rafârembiŋte hae irec ʒâŋe Babe mumbiŋ.

¹⁰Kecʒi Semte ɋâricfâc jaŋere ʒâŋe biri: Sem e jara 100 bazume ere bifuŋko Arapakisa fuawec, ine rumi sâko omaewec irec faicnao jara 2 tarame fuacnewec.

¹¹Sem e Arapakisa fuawec dameŋ irecnec jara 500 ʒuhuckerâ juhame ere bifuŋko naru motec gâcne fua fembiŋ.

¹²Arapakisa e jara 35 bazume ere bifuŋko Sela fuawec.

¹³Eme Arapakisa e Sela fuawec dameŋ irecnec jara 403 ʒuhuckerâ juhame ere bifuŋko naru motec gâcne fua fembiŋ.

¹⁴Sela e jara 30 bazume ere bifuŋko Ebere fuawec.

¹⁵Eme Sela e Ebere fuawec dameŋ irecnec jara 403 ʒuhuckerâ juhame ere bifuŋko naru motec gâcne fua fembiŋ.

¹⁶Ebere e jara 34 bazume ere bifuŋko Pelege fuawec.

¹⁷Eme Ebere e Pelege fuawec dameŋ irecnec jara 430 ʒuhuckerâ juhame ere bifuŋko naru motec gâcne fua fembiŋ.

¹⁸Pelege e jara 30 bazume ere bifuŋko Reu fuawec.

¹⁹Eme Pelege e Reu fuawec dameŋ irecnec jara 209 ʒuhuckerâ juhame ere bifuŋko naru motec gâcne fua fembiŋ.

²⁰Reu e jara 32 bazume ere bifuŋko Serugu fuawec.

²¹Eme Reu e Serugu fuawec dameŋ irecnec jara 207 ʒuhuckerâ juhame ere bifuŋko naru motec gâcne fua fembiŋ.

²²Serugu e jara 30 bazume ere bifuŋko Naho fuawec.

²³Eme Serugu e Naho fuawec dameŋ irecnec jara 200 ʒuhuckerâ juhame ere bifuŋko naru motec gâcne fua fembiŋ.

²⁴Naho e jara 29 bazume ere bifuŋko Tera fuawec.

²⁵Eme Naho e Tera fuawec dameŋ irecnec jara 119 ʒuhuckerâ juhame ere bifuŋko naru motec gâcne fua fembiŋ.

²⁶Tera e jara 70 bazume ere bifuŋko ŋokâ ʒiŋuc fuacnembiŋ: Abram, Naho â Haraŋ.

²⁷Kecʒi Tera ere ɋâricfâc jaŋere ʒâŋe: Tera ere bifuŋko Abram, Naho â Haraŋ fuambiŋ. Haraŋ ere bifuŋko ine Loti fuawec.

²⁸Haraŋ e ine mamac‐ticne Tera juhame Kaldea mâreŋ qizec‐ticnao Uru hae ira hâmowec.

²⁹Eme Abram â Naho jahe ŋokac ropic. Abram e ŋonâŋ‐ticne Sarai rowec, â Naho e Haraŋte otâ Milika i ŋonâŋ‐ticne rowec. Haraŋ e otâ jajahec jucnepic, Milika â Isika.

³⁰Sarai e ine ŋokac hufiŋne naru motec tâmiric juwec.

³¹Eme Tera e ŋokâ‐ticne Abram â ŋosa‐ticne Loti, Haraŋte ŋokâ hâcne, â joŋao‐ticne Sarai, Abramte ŋonâŋ, iŋuc rocjopame Kanaaŋ mâreŋko raniŋte Kaldea mâreŋko Uru hae ŋewec i beherâ hata fuŋkembiŋ. Raku hata ombâŋko Haraŋ mâreŋko fisirâ ira ŋembiŋ.

³²Terâ e jara 205 bazurâ Haraŋ mâreŋko ira hâmowec.