Fufua 7

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Eme Wofuŋzi Noa ʒiŋuc muhuc âzâcnewec: “Go â wiacfâcge ŋoŋe wokeo fefârenʒepieŋ, go ŋicguru ʒi jaŋere ŋondeŋko mitihec jukomecte honecgupe biaŋkekac.

²Irec go qowi nânâne jaŋeraonec 7, 7, ŋicne â ŋokacne aŋa sâsâc â qowi mi nânâne jaŋeraonec jajahec jajahec rowosâec‐jopac.

³Â sawa wipe jaŋeraonec iŋuc jaha 7, 7, ŋicne â ŋokacne rocjopatec gohec wokeo fefârenʒepieŋ, mâreŋte faio wiac jujunere ukicnezi omaezacte.

⁴Eme no ʒoaŋ 7 tarame mupe hoe micsâko mâreŋko hehuc domahame ŋafe ʒoaŋ 40 taraocmu. Iŋuc ehuc wiac jujune bâfuapo i mâmâc sasawa mâreŋkonec bâsirowe‐fârepemu.”

⁵Eme Noazi Wofuŋte micdâŋ i reŋkehuc efârewec.

⁶Noa e jara 600 bazume faicnao rumi sâkozi mâreŋko fisiwec.

⁷Fisizo ehame Noa e jahacne â ŋonâŋ‐ticne erâ ŋokâ joŋaofâcne jaŋe mâmâc wokeo fefârembiŋ.

⁸Ehame qowi nânâne â mi nânâne, erâ wipe â homa gisic wiac i jaŋe

⁹jajahec jajahec sasawa, ŋicne ŋokacne aŋa sâsâc, iŋuczi Noahec wokeo mâmâc fembiŋ, Anutuzi Noa mutâcnecnewec irec sâc jâmbâŋ fembiŋ hâcne.

¹⁰Eme ʒoaŋ 7 hâcne tarame mâreŋko rumi sâko fisiwec.

¹¹Noare jara dameŋ 600 irec mosa 2‐re ʒoaŋ gie bapa 17 ira opâ â hâwec ʒâkâŋ neŋgocne juwicnec soka siwiŋ ewefuhapie sawaonec opâ motâc aŋkeme

¹²hoe micsâko jâmbâŋ hehuc foha ʒoaŋ 40 â ŋafe 40 ewec.

¹³Eme ʒoaŋ ijaha Noa â ŋonâŋ‐ticne erâ ŋokâfâcne Sem, Ham â Jafete â ŋonâŋfâc‐jeŋic, jaŋe mâmâc wokeo fefârembiŋ.

¹⁴Erâ hae qowi â kâte qowi fuŋne fuŋne â homa gisic wiac fuŋne fuŋne â wipe fuŋne fuŋne suhuc fakechec jaŋeraonec jajahec jajahec sasawa,

¹⁵ŋicne ŋokacne aŋa sâsâc jaŋe wâc Noahec fefârehapie mâsi sâko i hâcne fuawec.

¹⁶Wiac jujune moc mi behekicne, Anutuzi Noa mutâcnecnewec sâc fefârembiŋ. Fefârehapie Wofuŋzi motâc herâ sahacnao ki bawec.

¹⁷Ehame rumi sâko hâcne fisime opâ jaŋe siwiŋne fehuc woke eferenʒoŋkepie mâreŋkonec fahare fewec.

¹⁸Eme opâ jaŋe soka siwiŋ ehuc hâhâwicne qaratiepie wokezi opâ faio rac warec ewec.

¹⁹Eme opâ jaŋe mâreŋ faio mocwâc âke sue feku tiki ʒora doma raŋgopieŋ i mâmâc sasawa qâuruc‐jopa‐fârembiŋ.

²⁰Opâzi tiki botâŋ‐jeŋic sirickewec ine kubi 15 irec sâc.

²¹Iŋuc eme mâreŋ faio wiac jujune omaewec, wipe mecne, hae qowi mecne, kâte qowi mecne, â homa gisic wiac mecne, mâreŋko babarâ jueŋgopieŋ, erâ wâc mâreŋŋic mâmâc, jaŋe sipiricke‐fârembiŋ.

²²Mâreŋko wiac jujune, nokafehec, jaŋe hâmo‐fârembiŋ.

²³Iŋuc ehuc Anutuzi mâreŋko wiac jujune sasawa, ŋic me qowi me gisic wiac, me wipe, i jaŋe bâsirowec‐jopa‐fârewec. Noa â ehec woke maŋnao jumbiŋ, jaŋe sawa akic‐jopawec.

²⁴Eme opâ sâko jaŋe mâreŋ faio siwiŋne fehapie ʒoaŋ 150 tarawec.