1Abram e jara‐ticne 99 bazume Wofuŋzi fuacnerâ ʒiŋuc âzâcnewec: “No Anutu tâpiri rune, go nore maio bahacmâc juzemec.
2Ehame noni gohec ʒâʒâfic ehuc basawecgupe sawe mâririackezemec.”
3Mume Abramzi ʒâŋe maine mâreŋko hetutuckerâ fowec. Eme Anutuzi ʒiŋuc muhuc âzâcnewec:
4“Manakic, no gohec ʒâʒâfic‐nane ekopac i ʒiŋucte: Go ŋic gurune gurune jaŋere mamac erâ juzemec,
5irec go ʒâŋege Abram mocwâc mi mumu Abraham, ʒâŋege iŋuc muzo, no ŋic gurune gurune jaŋere mamac âkendâŋgukopac hâcne.
6Ɋâricfâcge sawe‐jâmbâŋkeniŋte mupaŋkepe ŋic gurune gurune enʒepieŋ, erâ ŋicwofuŋ jaŋe goraonec jaha fua ranʒoŋgopieŋ.
7Eme no go â ɋâricfâcge ŋoŋere Anutu jupemurâ ʒâʒâfic‐nane basanaŋkepe go â apa ŋiric ŋurucfâcge mimiŋzi ɋâric ŋondeŋ‐nâŋecko tatara tâmiric forahuc juocmu sanaŋ.
8Ehame mâreŋ jaba jukomec, Kanaaŋ mâreŋ sâko hâcne, i go â ɋâricfâcge ŋoŋe ro rauc epie fosanaŋke‐ŋareocte ŋarepemu, ehuc Anutu‐ŋeŋic erâ jupemu.”
9Erâ Anutuzi Abraham ʒiŋuc wâc âzâcnewec: “Goki ine ʒâʒâfic‐nane paŋnea soŋaŋkehuc bajuzemec, go â ɋâricfâcge mimiŋzi ɋâric mâmâc.
10Go â ɋâricfâcge ŋoŋe ʒâʒâfic‐nane fokac i aimuŋ soŋaŋkeniŋte mukopac ine ʒiŋucte: Ŋoŋerao ŋic juŋgopieŋ jaŋe mâmâc sasawa sahac tofa‐jeŋicko ma bajarezo.
11Ma bapa ine sahac tofa‐ŋeŋic hetâcnehuc ma bazo, eme izi ŋondeŋ‐nâŋecko ʒâʒâfic fuawec fokac irec ma eocmu.
12Ŋoŋerao gaŋne gaŋne motec fua feniŋmu jaŋe fuarâ fohapie ʒoaŋ gie bapa 8 eme sahac‐jeŋicko ma bafârezo, ŋaŋacne ficko fuakicne erâ wâc ŋic furune moctaonec moneŋzi furine bakicne â gore soc biuckonec mi fuawec jukac e mâmâc.
13Ine hâcne, ficgao fuakicne â moneŋzi furi bakicne jahe mâmâc sahac‐jekicko ma bazo. Ʒâʒâfic‐nanezi iŋuc hâcne sahac‐ŋeŋicko forâ forahuc juzejec.
14Ŋic moc e ʒâʒâfic‐nane qâsuahuc sahac‐ticnao ma mi bapa mâc juocmu, e gurufâc‐ticne jaŋeraonec bârâriepie juju‐ticne omaezejec.”
15Erâ Anutuzi ʒuhuckerâ Abraham dâŋ ʒiŋuc âzâcnewec: “Ŋonâŋge Sarai ere ʒâŋe Sarai mocwâc mi muhuc Sara muzemec.
16No e jambuŋkerâ eraonec ŋokâ moc tahacgupemu. No Sara hâcne jambuŋkepe eraonec ŋic gurune gurune fuarâ junʒepieŋ, erâ eraonec jaha ŋicwofuŋ fua ranʒepieŋ.”
17Mume Abrahamzi ʒâŋe maine mâreŋko hetutuckerâ gâwiehuc ʒiŋuc manasuwec: “Ŋic moc e jara 100 bazume ŋokâ moc sâcne fuacneocmu, erâ Sara e jara‐ticne 90 bazuweczi kogoc moc sâcne roocmu?”
18Abraham e iŋuc ehuc Anutu ʒiŋuc âzâcnewec: “Go mana‐naretec Isimaezi gore maio jufezac me!”
19Anutuzi ine muwec: “Misac, ŋonâŋge Sara eki ŋokâ moc roocmu, ere ʒâŋe Isaka muzemec. Eme noni ehec ʒâʒâfic sanaŋ epe ʒâʒâfic izi ɋâricfâc‐ticne jaŋehec fofehuc juzejec.
20Â Isimaere wâc biac mana‐garekopac. Manakic, no e jambuŋkehuc ecnepe ɋâricfâcne fuarâ sawe mâririackenʒepieŋ. Ere bifuŋko ŋic fekicne 12 fuaniŋmu, erâ manacnepe ŋicguru sâko erâ juocmu.
21Ʒâʒâfic‐nane ine Isakarao basanaŋkepemu e hâcne Sarazi jara faicnao dameŋ ʒiŋucnea roocmu.”
22Anutuzi Abrahamhec dâŋticne iŋuc mutararâ eraonec fahare fewec.
23Ehame Abraham e ŋokâ‐ticne Isimae â kiŋaŋ qaqafâcne ficticnao fuakicne mecne â moneŋzi furi bacjopakicne mecne, ine hâcne ficticnao ŋic jumbiŋ sasawa, i jaŋe rocjoparâ Anutuzi mutâcnewec irec sâcko ʒoaŋ ijaha sahac tofa‐jeŋicko ma bajare‐fârewec.
24Abraham e jara‐ticne 99 eha e jahacne sahac tofao ma bawec,
25â ŋokâ‐ticne Isimae e ine jara‐ticne 13 eha sahacnao ma bawec.
26Ine hâcne Abraham â ŋokâ‐ticne Isimae ʒoaŋ ijaha sahac‐jekicko ma bakicne.
27Ehuc kiŋaŋ qaqafâc‐ticne sasawa, ficticnao fuambiŋ me ŋic moctaonec moneŋzi furi bacjopakicne, jaŋe dameŋ ijaha sahac‐jeŋicko ma bafârekicne.
