ṮAKWIIN 4:4-16

⁴dhala Habiil a’di ki ’doyi ushi ḵa’bal kun tana bwanyara/ mo ’pena ma’diny ḵa’bal piti mo dhali ’peni unim buni kun ’thiḵa’thiḵ ki tuntum tuntum mo. Dhali Tap̱a ki c̱iya hirdhe/ gom to ma Habiil jin c̱ina a’di ki me’d mo,

⁵hili goma Kayiin dhali tom piti kun c̱ina a’di ki me’d mo tani a’di diki c̱iya hirdhe/ mo be. Wakan a’di shwakin ma Kayiina nyor kagahara mo dhali jis/em piti bushura/ bushur mo.

⁶Dhali Tap̱a ki owa Kayiin gwo mo ki: Atinta shwana /e anyor kan mo dhali atinta ’bushurkina jis/em pini ki ’bushur kan mo?

⁷Waḵki/ /e mini mii ki ’bore/ mo tani a/e minu diki mish bu’th mowa? Dhali waḵki/ /e diki mii ki ’bore/ mo tani miinthus a’di wup̱ki’d e ’twaŋkal gu’b mo. A’di ona bwa ki /e mo, hili /e mini mii ta tap̱a ap̱o/ a’di mo.

⁸Kayiin ki owa Habiil gwo jin ta’da kam piti mo ki: Dhalki ana iina ka pije/ e bwam bunto mo. Dhali ki uni ’kokin e bwam bunto mo tani aKayiin cuki mis ap̱owa kam piti jin ta’da Habiil mo dhali ’kosh a’di jwa mo.

⁹Dhali yan’ko’d Tap̱a ki owa Kayiin gwo mo ki: Mana Habiil jin ta’da kam pini mo? A’di ki o gwo mo ki: Mishgaa? Aha/ tana manhila kam pema?

¹⁰Dhali Tap̱a ki o gwo mo ki: Atinta miikina /e? ’Twa/ ma bas ma kam pini a’di gwoki’d ’twa/ i aha/ ’pena ’cesh mo.

¹¹Dhali shwane/ /e jeekunu ’pena ’cesh mo, a’di jin ḵa’dki ’twa/ mo mmolosa bas ma kam pini ’peni me’d pini mo.

¹²Ki /e mini ḵora ’cesh mo tani a’di midi doḵ/e dho’th to kagahara gom /e ’peni mom’bi’th is piti mo yisa. /E mini ta jwa ki jwa mo dhali ya yany c̱a/ e mony’ceshi ’baar mo.

¹³Kayiin ki o Tap̱a gwo mo ki: Miim pem jin di aha/ ’ba/ a’di caaca gom aha/ mmoḵal mo.

¹⁴Hili mo mo ma, /e urki aha/ ka pije/ ka cim yansan mo ’pena ’cesh mo. Dhali ’peni jis/em pini mo tani aha/ minu bag mo, dhali aha/ mina ta jwa ki jwa mo dhali ya yany c̱a/ e mony’cesh mo dhali ma a’diyin jin midi gam aha/ mo tani midi ’kosh aha/ jwa mo.

¹⁵Dhali yan’ko’d Tap̱a ki o a’di gwo mo ki: Midi wakan yisa. Waḵki/ jan ṯal ’deŋ kamu/ midi ’kosha Kayiin jwa mo tani mori’c midi di ap̱o/ a’di me’di pesu/ mo. Dhali Tap̱a ki c̱iya Kayiin jamas mo, isi ciki/ ki a’din ’de/ yin jin midi ya ap̱o/ a’di midi diki ’kosh a’di jwa mo.

¹⁶Dhali yan’ko’da Kayiin yaki’d ka pije/ ’peni buŋ’kus gi Tap̱a mo dhali c̱a’b e mony’cesh gi Pa Nud mo, e mom’pesho’k ma Idin mo.