Genesis 4:4-16

⁴Meneng si Abel se nemallì te penganay nati te menge karniro din, aw iniyaw din iyan, aw inibing din se melambò onod niyan amon ibegay din iyan diyà te Timanem. Neluba se Timanem ki Abel aw sìyan imbegay din.

⁵Meneng wedà keluba se Timanem ki Cain aw sìyan imbegay din. Yan ontò neopal si Cain aw timàmod.

⁶Penga niyan, minikagi se Timanem diyà ki Cain, “Kenà mèpiya se pegkeopal nikaw. Kenà mèpiya se pegtàmod nikaw.

⁷Aw metòlid se inangen nikaw, yan meluba a kamno. Meneng aw eked ka peg-inang te metòlid, delisegen ka den i Satanas amon meg-inang ka te salà. Dàgen ka peden te peg-inang no te salà, meneng keilangan domaeg ka kenyan.”

⁸Wedà kenamay, minikagi si Cain diyà te kedowa din si Abel, “Taking ka kanak doton te pawà.” Pegdateng dan doton te pawà, inimetayan i Cain se kedowa din.

⁹Mig-insà se Timanem diyà ki Cain, “Kenan lay se kedowa no si Abel?” Timaba sikandin, “Inday. Kenà a teletonggò te kedowa ko.”

¹⁰Minikagi se Timanem, “Ontò den medaet se ininang no seini. Iling te egpengenganay se dipanog din diyà kanak lekat te tanà.

¹¹Lekat seini, ipelumun ko sikona. Eked den kepakay aw meg-obong ka te tanà, so tanà se inegseban te dipanog te kedowa no te pegpengimatay no kandin.

¹²Aw todà ka megpawà, eked pongo se tinanem nikaw. Keilangan gayed ka meglegeb dini lanto te tanà.”

¹³Minikagi si Cain, “Pelaban melima se pegpelumun no kanak, aw eked a peketayod kenyan.

¹⁴Eked a no den pepewai, aw ipekesayo a no den lekat kamno. Keilangan gayed a meglegeb dini lanto te tanà. Aw ketelaan a te doma otaw, imetayan a din.”

¹⁵Meneng minikagi se Timanem diyà kandin, “Eked iyan ketoman, so aw doen mengimatay kamno, mekepito pa se kedaet te pelumun domateng diyà kandin.” Penga niyan, doen pengilala imbegay te Timanem diyà ki Cain amon eked sikandin imetayi te otaw meketalà kandin.

¹⁶Penga niyan, timanan si Cain te Timanem, aw mig-ogpà sikandin doton te ogpeanan te Nod, lenged te eglibtakan te Eden.