Fufua 25

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Abraham e juku mocwâc ŋokac moc bawec, ʒâŋene Ketura.

²Eme eki ŋokâ ʒiŋuc rocjopawec: Ʒimiraŋ, Jokisaŋ, Medaŋ, Midiaŋ, Isibake â Sua.

³Jokisaŋ ere bifuŋko ine Seba â Dedaŋ jahe fuapic, eme Dedaŋ ere ŋokâfâc ine ʒiŋuc fuambiŋ: Asurim, Letusim â Leumim.

⁴Midiaŋ ŋokâfâcne ine ʒiŋuc: Efa, Efere, Hanoki, Abida â Elda, ŋic i jaŋe sasawa Ketura ere ɋâricfâc hâcne.

⁵Abraham eki ine moneŋ mafa wiac‐ticne Isaka râcne‐fârewec.

⁶Ŋonâŋocfâc‐ticne jaŋere ŋokâfâc ine mâc taha wiac gâcne jarerâ Isakahec mi junʒepieŋ muhuc ʒoaŋ wewefunaopec mâreŋ fokac ira sorec‐jopame rafârembiŋ.

⁷Abraham e jufeku jara‐ticne 175 bazuwec.

⁸E jujâmbâŋkeku ŋicqizec erâ hâmowec. Ehuc mimiŋnefâc‐ticne hâmombiŋ jaŋerao ʒuhuckewec.

⁹Eme ŋokâ jahec‐ticne Isaka â Isimae jahe Makepela hawecko duckepic. Hawec i Hitiŋic Zoari ŋokâ‐ticne Eferoŋte gieo fowec. Gie i hâcne Mamere ocniŋucnao fowec.

¹⁰Gie i Abrahamzi Hitiŋic jaŋeraonec furine bawec. Ira hâcne Abraham â ŋonâŋ‐ticne Sara ducjofakicne.

¹¹Eme Abrahamzi hâmome Anutu e ŋokâ‐ticne Isaka jambuŋkewec. Isaka eki ine opâ moc ʒâŋene “Juju runezi honecnuekac ere opâ ʒâŋe”, ira ŋec juc ewec.

¹²Abraham ŋokâ‐ticne ʒâŋene Isimae, Sara kiŋaŋ naru‐ticne Aigita ŋokac Hagazi rowec eraonec ŋic fuambiŋ jaŋere binaŋ ʒine hâcne:

¹³Isimae ŋokâfâcne jaŋere ʒâŋe ʒi, fua rambiŋ sâc râekicne hâcne: Mârâc ŋokâ‐ticne Nebajoti izi Kedara, Adibele â Mibesam,

¹⁴erâ Misima, Duma â Masa,

¹⁵Hadadi â Tema, Jeturu, Nafisi erâ Kedema.

¹⁶Ŋic i jaŋe hâcne Isimaere ŋokâfâc, ʒâŋe‐jeŋic i hae‐jeŋic â qoruc boze‐jeŋic ŋerakac sâc mukicne. Jaŋe guru‐jeŋicte sâc ŋicwofuŋ 12 jumbiŋ.

¹⁷Â Isimae dameŋ‐ticnere fuŋne ine ʒiŋuc: E jufeku jara 137 bazurâ hâmohuc mame sâkofâc‐ticne jaŋerao ʒuhuckewec.

¹⁸Jaŋe Hawila â Suru, Aigita mâreŋ ʒoaŋ wewefunaopec mâreŋ ŋondeŋ moc ira jumbiŋ. Soctofafâc‐ticne jaŋere mâreŋ heririŋko juwec hâcne.

¹⁹Ʒi Abrahamte ŋokâ Isakare binaŋ.

²⁰Isaka e jara‐ticne 40 bazurâ Rebeka ŋonâŋ‐ticne rowec. E ine Mesopotamia mâreŋkonec Aramea ŋic Betuele ere otâ Labaŋte seŋ.

²¹Eme Isaka e ŋonâŋ‐ticnezi hufiŋ juwecte ere erâ Wofuŋ numucnewec. Eme Wofuŋ e manacneme Rebekazi motec kiweckewec.

²²Ehame kogoc jajahec jahe neŋgocte bumaŋko hehec epire ʒiŋuc muwec: “Iŋuc fuame wemocko jupemu?” Erâ ra Wofuŋ mu wioc ecnewec.

²³Eme Wofuŋzi ʒiŋuc âzâcnewec: “Bumaŋgao ŋicguru jajahec fokopirec, ŋicguru jajahec goraonec fuarâ râwiŋnenicmu hâcne. Ŋicguru moczi mocte femicne erâ juocmu, bâbânizi ʒâhec ere kiŋaŋ qaocmu.”

²⁴Eme motec roro dameŋ‐ticne maickeme bunaonec mi funʒuŋ fâri fuazepirec i!

²⁵Bâbâni fuawec ere sahac i bâbâroŋ â ŋaqi kanʒaŋnehec iŋucne, irec ʒâŋe‐ticne Esau mukicne.

²⁶Izi ɋaticne fuawec, e meticnezi Esau kike kiririŋnao bahuc fuawecte ʒâŋene Jakobo mumbiŋ. Isaka e jara‐ticne 60 eha ŋokâ jahec‐ticne fuapic.

²⁷Eme motec jahe juku sokarâ Esauzi wosaŋeŋ gie bahuc irec fuŋne manawec, ehuc kâteo kosa jujujec, Jakobo eki ine ŋic pectâcnezi haeo juhuc gie bawec.

²⁸Isaka e kâte qowire boc aŋackewecte maŋticne Esaure kâcɋene domawec, Rebeka e ine Jakobore maname joroc biaŋ‐ticne ewec.

²⁹Eme Jakobo e juku nânâ wiac rikewec. Ehame Esauzi kâteonec fisirâ nânâre betaŋkehuc

³⁰Jakobo ʒiŋuc âzâcnewec: “Wiac bâbâroŋ keci moc biac naretec nâpe, no nânâre hâmo sâqorekopac i!” Irec hâcne ʒâŋe‐ticne Edom mukicne.

³¹Jakobozi ine muwec: “Mârâc fufuare wiac biŋege qikiŋne‐narec.”

³²Mume Esauzi dâŋ ʒiŋuc bâtikiecnewec: “Manakic, no hâmopemu irec bucne, irec mârâc fufuare wiac biŋe qanarekicne izi wemocko moc baficnuocmu.”

³³Jakobozi muwec: “Qanaŋ mupaŋke‐narec.” Eme mupaŋkecnehuc mârâc fufuare wiac biŋe‐ticne Jakobo qikiŋnecnewec.

³⁴Eme Jakobozi Esau poroŋ â basac bâbâroŋ rikekicne râcnewec. Eki ine nânâ opâ nârâ faharerâ rawec. Esau e iŋuc ehuc mârâc fufua‐ticnere wiac biŋe qaisockewec.