Vuhuna 4:4-16

⁴Pali e Abel i bole a maka tuna sipsip a tabua i vi. Lakea e BAKOVI DAGI i ngarua a nihabi ne Abel,

⁵pali a nihabi ne Kain, i uka ma i ngarua. Ngane e Kain i madihi a hatena, i robo a matana.

⁶Muri e BAKOVI DAGI i nanea e Kain, “I navai i madihi a hatemu, i robo a matamu?

⁷Ioe bara o rata a rabu malamala bara ngarua a nihabi vomu. Ioe, i uka ma o rata a rabu malamala, a rabu hale i pesi kalidoga ge rabalaki ioe. O matakari a nilaho vomu, bara i lobo a naro hale vomu.”

⁸Ngane e Kain i turea e tarina, i ta maea, “Abel, tu lakea na hania.” Lakea ru vano. Na tahuna ru bele na hania, lakea e Kain i ubi matea e tarina.

⁹Muri e BAKOVI DAGI i nanea e Kain, “Avia e tarimu e Abel?” E Kain i koli mule i ta maea, “I uka ma a masia. Ra iau, ge iau a vora ni matakari e tarigu?”

¹⁰Lakea e BAKOVI DAGI i ta maea, “A ra o ratea ke? O longo valai! A darane tarimu i tangi valai nau pali na malala, ga kolia a nimate vona.

¹¹Ngane bara ruduraha ioe, ga lili tala ioe na malala, ra i todo a darane tarimu na limamu.

¹²Ngane na tahuna o leho na malala, i uka ma ge vakabele a maki ni kani vomu. I uka ma go made tata, bara o kanipede viliha.”

¹³E Kain i kide i ta maea, “I kupo polo a maka maregoa nau.

¹⁴Ngane o lili tala iau na malala bara kapiloho na matamu. Bara a uka tanga, a kanipede. Pali e re i matavisi iau bara i rabalaki iau.”

¹⁵E BAKOVI DAGI i koli mule, i ta maea, “I uka ma ge mavonga. A viri bara i rabalaki ioe bara i bolea a nikoli dagi balaka polorua.” Muri i rua ne Kain tara kilakila ne vona ni matakilaka vona, i uka ma ni gi rabalaki.

¹⁶Muri e Kain i pea e BAKOVI DAGI, i vano i made na robo e Nod, na tabeke na nirikena haro o Iden.