Tigidali Nai Gagalama Nigali Side 4:4-16

⁴Tama Abelgo te gomunai sipsip wai dabe meba selama, tama agai augwali elali. Tama agai te meba dwagi yai ili dabe me selama, tama ofa yali. Yawego dwagi yai homu pemene te Abelbolo elama, te aga ofa dali me tiali,

⁵tiali goli agai te Kein dali, aga ofa dali, te agai godolo me ebeo. Tama Keingo wado homu dwai mu elama, tama agai gesabidi hulia sigi pai.

⁶Tialima, Yawego Keinbolo te po wali, “Magi baso nage dwai sębę ebawe? Tama magi baso nago gesabidi gasagi yai pedelaliwe?

⁷Te nago dwagi yai kolesaga eyu da, teda eno nage dali dwagi yai homu yaibao. Tiali goli, nago dwai kolesaga eyu da, teda dwai sę ebo kolesaga nage pąde bidiyu, tama tego nage godolo eyu, tama nage aiyaba elaluabo sogo tonalubao, te moni nasi yai bulu hasa tiwai dao. Tiali goli, nago bomo elama, te dwai sę ebo kolesaga aiyaba elaluao,” Yawego Keinbolo te po wai.

⁸Tama nosali Keingo aga ama Abelbolo te po wai, “Da si gasaba gana dwasianu biligi pinao,” wali. Augwali si te nosa elalubo tǫba biligi pali, tama Kein hodaluyu, tama aga ama ela muani.

⁹Nosali Yawego Keinbolo hanalu wai, “Naga ama Abel mena bidibowe?” Tama Keingo te po wali, “Eno konebeo. Magi yaliwe? Nago homugo ena te eno ama tonalubo bidi naga bidimainogowe?”

¹⁰Tialima, Yawego Keinbolo te po wai, “Nago magi baso te dwai dwai sę yaliwe? Te naga amago kaneme te tǫba gelali, tama te kaneme te bidi me deli dogoni tiwai elama, tama i wabo eno odali, ‘Boi eyu, Kein ela muao,’ te tiwai po obao.

¹¹Megi te eno nage dolabo bomai po obao. Nage te naga gi sę yabo tǫde bidibo gudulama, paibao. Magi baso meni, te naga nogogo digi te naga ama kaneme te tǫba gelalio. Tama te tǫ te penane dalalubo tiwai elama, tama te kaneme tualio.

¹²Tama tibaso, nago nai te tǫde bulubaso da, te nai bugagia me hologobeo. Te nago page bulu mu meniama, tama nage te tǫ sibi usu nama, te bulu wau bilibo bidi tiwai bidaibao,” te po wai.

¹³Tama Keingo Yawebolo te po wali, “Te nago enabolo mabo sęgę te genuai mu dao. Eno te sęgę tolobo usugobeo.

¹⁴Te nago ena e tǫde nago gedude me te sela sąwaibao po wai. Te ena bidabo bulu meniama, tama ena subigila te tǫde bilaibao. Tama bidi me deligo te ena suali da, teda agai ena ela muaibao,” wali.

¹⁵Tiali goli, Yawego te po wai, “Menio. Te nage bidi me deligo ela muyu da, mu tama te eno genuai sęgęgo wei ponaibao.” Tialima, Yawego te dąį me deli Keinde muani, tama bidi dabego aga suyu, tama te dąį ilali subaso da, teda augwaligo aga me ela mugobeo.

¹⁶Tama Kein te Yawe bidibo madi tagalama, wi pelama, tama tǫ me deli teba bidigi pali, te augwaligo te tǫ nogi poali “Subigila Bilibo,” te nogi poali. Te tǫ te Iden gi elaluali madi te giliga asobo badu elaluai.