Talun Ngana 4:4-16

⁴Pe Apel mene nena sipsip tengene ana mur hel nge urana toto ke poi tunginga ia pule. Pe Non Soke mutena taua Apel nena tunginga.

⁵Pe Kaen nena tunginga Non Soke mutena taua ero. Pomalam Kaen letena inin pe iech ero toto.

⁶Pe Non Soke onteia Kaen ke teke, “Iong mam letem inin pe o iech ero ia utar?”

⁷Nenge teke o poia poinga nge pengpeng lape e longele lem tunginga. Pe nenge teke o poia poinga nge pengpeng ero, lape poinga poreke ngana heporeke tote iong. Ke poinga poreke ngana mutena tau tote iong pe iong o mes ke kerkereng ke o hekousue.

⁸Iok nga hoena Kaen hele lange tina Apel ke teke, “Ita nai tala ke ta i rara nga ich nenge ana heilil mana!” Iok iri nai tela ke te i rara nga lamau pe Kaen ngira taua tina Apel pe hune i ke mete.

⁹Pe Non Soke onteia Kaen ke teke, “Kaen! Tim Apel ngai?” Pe Kaen hele, “E eteia i ero. Ia iau mam ak ume ma nenge e nauelele i mam?”

¹⁰Pe Non Soke NeHalang hele, “Pomere nenge o poia poinga poreke ngana nem mam?” O longo la, tim eina kou lele nga ich pe tang atat nge Iau.

¹¹Pe ich kou hanna pangpanga ke tontone tim eina nenge perim poia. Ke heueu nei, lape lek keke iong ke o i rara mana nga ich.

¹²Pe nga etue nenge o umume am nga ich, ute pele nge lape haka ke nek ero. Pe lape mulim e nge o tu ia ero. Lape o i rara manmana nga ich.

¹³Pe Kaen hele lange Non Soke ke teke, “Melmelenga nenge o tunge at nge iau nem, palaungana toto pe lape heporeke tote iau iam.

¹⁴O nau at, heueu nei o lope hote iau lamai pe lape e la ke e talkome toto nga matam ol. Lape e i rara mana nga ich iange mulik e nge e tuia ero. Pe nenge teke mele saolia iau lape hune iau ke e mete.”

¹⁵Pe Non Soke hele lange i ke teke, “O matau ero! Nenge teke mele hune iong, mele nem lape ameia ana melmelenga nge palaungna toto.” Ol pe Non Soke tal heke lala e lange i ke mele nenge saolia i hune i ero.

¹⁶Iok Kaen ua hot nga Non Soke matana pe la ke tu nga ich nenge ene “Irara.” Ana ich tu nga kilenge ilina hele nenga lut nga ume nenge Paratiso.