Jenesis 4:4-16

⁴Abelnöŋ mewöyök lama kambuŋaŋgö mutuk asuasuhuŋi tosatŋi meköba eŋguba kitipŋi kelökŋinambuk memba kaba Kembugö jöwöwöl ohoyök. Ohoiga Kembunöŋ Abel nanŋi aka jöwöwölŋi etkeka möri ölöwahök.

⁵Ölöwahökmö, Kembunöŋ Kein aka yaŋgö jöwöwölŋi mi ek tököyök. Mewö aiga Keingö irimŋi seholiiga kömbuhiba jemesoholŋan bosoliyök.

⁶Bosoliiga Kembunöŋ Keingöra kewö jii mörök: “Irimgi mönö wuanöŋgöra seholiiga jemesoholgan bosoliza?

⁷Gi yuai ölöpŋi aknöŋga möt aŋgön köl gihibiga ölöp jemesoholgi öhal (hak) akŋan me qahö? Yuai ölöpŋi qahö aknöŋga siŋgisöndokö Toŋan mönö urugahö naŋguŋe kinda göhöra ak gihiba mönömakza. Mewö mönömakzapmö, göŋön mönö miaŋgö soŋgo ala galöm memba luhut alman.”

⁸Kembunöŋ Keingöra mewö jii mörökmö, Keinöŋ töndup munŋi Abelgöra kewö jiyök: “Mönö nanirök nupnöŋ anbit. “Mewö jiiga nupnöŋ anda mala Keinöŋ luhuba munŋi Abel qelanjiba memba qeba qei kömuyök.

⁹Kömuiga Kembunöŋ Kein kewö qesim waŋgiyök: “Mungi Abel mi denike malja?” Qesim waŋgiiga kewö meleŋnök: “Ni qahö mötzal. Ni munangö jegalöma qahö akzal.”

¹⁰Mewö meleŋniga Kembunöŋ jiyök: “Gi wani yuaia akzan? Mötnöŋ, mungahö sepŋan mönö gölmenöhök qeriga mötzal.

¹¹Gölme kiaŋgö numbuŋan aŋaŋiba mungahö sep börögeyök mezawi, nöŋön mönö kiaŋgöreŋök közöl gihibi anman. Jöramörahö mi mönö göhö qake albi öŋgöza.

¹²Közöl gihibiga kölkömöt nup menöŋga gölmenöŋ möriamŋaŋgö ölŋi aŋgön köl gihiiga gölme dop mömölaköba kekelolo aka ölöŋ köla laŋ anda kaba malman.”

¹³Mewö jiiga Keinöŋ Kembugöra kewö jiyök, “Keunaŋgö likepŋi meleŋnöŋga qakne öŋgözawi, miaŋön mönö ösumni oŋgiri lömböriiga bisimamgö osimam.

¹⁴Mötnöŋ, gi merak ni nupqeqe gölmenöhök nuataŋgönöŋga jemesoholgeyök mömölaköba gölme dop kekelolo aka ölöŋ köla laŋ anda kaba malmam. Miaŋgöra kunŋan ni neka ölöp nuŋgui kömumbileŋbuk.”

¹⁵Mewö jiyökmö, Kembunöŋ kewö jii mörök: “Mewö qahö. Kunŋan Kein qei kömuma ewö, miaŋgö likepŋi mönö yaŋgö qakŋe öŋgöiga ambemŋi 7 akŋa. “Mewö jiba kunŋan Kein miwikŋaiba i qei kömumbapuköra sileŋe aiwesök kulem kun alök.

¹⁶Mi aliga Kembugö jemesoholŋi mosöta anda anda gölme qetŋi Laŋlaŋ lilikqilik (Nod) miaŋgöreŋ aŋgota malök. Gölme mi Edenök wehön kotkotŋe göröken ahöza. Mewö.