Jenesis 4:4-16

⁴Ano Abol eme andrei nadu sipsip ari kasen mwasin handru, ano badeh iy idiy imek. Eme iy edeu i nyara salom mwasin. Eme ya Laban Kindrei badeh sekesek ma aseken Abol ma salom tan.

⁵Arile ta Ken badeh iy baseken handru bwe. Eme badeh Ken i bolosen handru ma ndrinen isi handru en.

⁶Ano badeh Kindrei tiye i ta Ken, “Ou a bolosen ta sasah? Badam asaram ta sasah?

⁷I buku none ou amwekes lakou mwasin, i dah nane ou sekesek; arile ou ndramwesekei kandriyen ndra-in, eme karei ma lomondra ndra-in abe-en ou ma abwe-ek ou udu konam. Eme ou abadok doh?”

⁸Ano badeh Ken tiye sahou i ta nadu tinen Abol, “Talu ka-au kala len.” Eme uru au ame len badeh, Ken eme tubuni iy, eme ma iy idi nadu tinen imek.

⁹Ano Laban eme ndremenya Ken, “Nadu tinem ndraheh?” Eme iy anya, “Jo tanan bwe oh, jo atondrok iy ai?”

¹⁰Ano Laban tiye, “I buku sah ou amwekes budon ndra-in dah? Ndraye nadu tinem asah eden udu bolo ndren kede-eh; eden eme tek ta ou kameh akohok isi saluwen.

¹¹Eme ya i dah kameh munyak kameh andra-i na bales tasah na ou. Munyak badeh ndranyuwi ndraye nadu tinem i buku none ari lakou bohon asak le, na len ou adai iy.

¹²Ya i buku none ou anya atah baso kameh, munyak kameh winiyan bamwekes bateh bwe, ma ou kameh ta tekedek le.”

¹³Eme Ken tiye i ta Laban i buku doh, “Ou tiye sahou badeh maha-an labai eme tek.

¹⁴Ou kameh tikahei jo iu ta munyak ma ta tondrok ai, ma jo kameh edek le ai, ya are ndrondron jo kameh idi le jo ai?”

¹⁵Arile Laban anya eh, “Bwe, i buku none are idi ou, i dah kameh lau ndro taloh amak i saluwem.” Eme Laban atehei kalem i ta Ken ta tiye tanan i tare ndrondron iy badeh sadai iy.

¹⁶Eme Ken iu, iu ta mada Laban ili udu munyak aloh, “Lolo-an Le,” udu loboho an eme loken ta bilin Iden.