1Eme Abraham e Mamere ere boriŋ gieonec faharerâ Negebe mâreŋko Kadesi â Suru ŋondeŋ‐jekicko Gerari hae ŋewec, ira ra jaba juwec. Ehuc ŋonâŋ‐ticne Sarare seŋnane muwec.
2Eme Gerari ŋicwofuŋ Abimelec eki kiŋaŋŋic‐ticne soreme ra Sara rowec.
3Anutuzi ine Abimelec ŋafeo guŋko fuacnerâ ʒiŋuc âzâcnewec: “Go ŋokac romec irec hâmocte biŋe ekomec. E ŋic mocte ŋonâŋ jukac irec.”
4Abimelec eki ine ehec moc mi juwecte ʒiŋuc muwec: “Wofuŋ, go ŋicguru tiŋne nâŋe sipiric‐nâpozo mukomec me?
5Abraham e ʒiŋuc nazajec: E seŋnane. Â ŋokaczi wâc mujec: Eki seŋnane. Irec no wiac epac, i maŋɋaɋaoko epac, â menane i wâc bahacmâc.”
6Eme Anutuzi guŋko ʒiŋuc âzâcnewec: “Go wiac i maŋɋaɋacko emec, i no wâc manakopac, erâ noni hâcne e bâuazicte aka hegarehuc sabecguhape nore maio mi sâqoremec.
7Irec go ʒiŋuczia ŋic e ŋonâŋ‐ticne bârisiecnezemec, e porofete jukac, irec go jucmurâ eki gore erâ nunumu gie bazejec. Goki e mi bârisiecnecmuo ine go â wiacfâcge ŋoŋe jâmbomac hâmo‐fâreniŋmu.”
8Eme Abimelec e furicte jâmbâŋ faharerâ kiŋaŋ qaqafâcne hetumaŋ‐joparâ dâŋ i sasawa jaza‐fâreme mâretec hâwic‐jopawec.
9Eme Abimeleczi Abraham hefârerâ ʒiŋuc wiocnewec: “Go wemo wiac enaremeŋ? No wemo wiac sâqocne moc egarepacte go no â ŋicfâc‐nane sahacko râec enâremeŋ? Go norao wiac mi eene emeŋ.”
10Ehuc ʒuhuckerâ Abraham ʒiŋuc wiocnewec: “Go weniŋuc manasuhuc wiac iŋucne emeŋ?”
11Eme Abrahamzi muwec: “No ʒiŋuc manasuhuc wiac i epo: Mâreŋ ʒirec ŋic jaŋe Anutu araŋ mi bacneeŋgopieŋ, irec jaŋe no ŋonâŋ‐nanere erâ qâhâmocnuniŋmu.
12Erâ e wâc jâmbomac seŋnane jukac. E mamac‐nanere otâ hâcne, neŋgoc‐nanere otâ aricne, erâ e ŋonâŋ‐nane ewec.
13Eme Anutuzi munareme mamac‐nanere fic beherâ mâreŋ furunao warepo dameŋ ira noni ʒiŋuc âzâcnepo: ‘Hae ira me ira fisirâ no sâsecnuhuc ʒiŋuc muzemec: E seŋnane.’”
14Eme Abimeleczi lama bulimakao â kiŋaŋŋic ŋokac rocjoparâ Abrahamte biŋe râec‐jopawec, ehuc ŋonâŋ‐ticne Sara mâmâc bârisiecnewec.
15Erâ Abraham ʒiŋuc âzâcnewec: “Manakic, mâreŋ‐nane ʒi maigao forakac, go ira me ira ŋec juc ezo murâ ezemec.”
16Erâ wâc Sara ʒiŋuc âzâcnewec: “Manakic, wiacfâcge jaŋe mana wahacgunʒipiŋte â jaŋere maio mimi gaŋgaŋhec juzicte no seŋge siliwa dâkâne wâŋ tauseŋ râcnekopac.”
17Anutu e Abraham ŋonâŋ‐ticne Sarare erâ Abimelec ere ficko ŋokac jumbiŋ jaŋe mâmâc sasawa ejareme hufiŋ efârembiŋ.
18Irec Abraham e Anutu numucneme Anutuzi Abimelec â ŋonâŋ‐ticne erâ kiŋaŋ ŋokacfâcne jaŋe mocwâc ɋâric bâfuac‐jopaniŋte bâpiaŋ‐jopawec.
